ယာရူစိင်၊ ဇွန်လ ၂၈ ရက်၊ သီပေါ
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် သီပေါမြို့ပေါ်က နေအိမ်တစ်အိမ်ကို အမျိုးသား ၂ ဦးဟာ သေနတ်ထောက်ပြီး ဓားပြ တိုက်ခဲ့တယ်လို့ သီပေါမြို့ခံတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဇွန်လ ၂၄ ရက် ညနက်ပိုင်းမှာ သီပေါမြို့ ညောင်ကိုးပင်ရွာမှာ ကလေးတွေသာ ရှိနေတဲ့ နေအိမ်ကို အမျိုးသား ၂ ဦးက သေနတ်နဲ့ ခြိမ်းခြောက်ကာ ဓားပြ တိုက်ခဲ့တာလို့ ဆိုပါတယ်။
“သူတို့မိဘတွေက ခြံ သွားအိပ်ကြတာ။ အဲကလေးတွေက ကျောင်းတက်တာဆိုတော့ အိမ်မှာပဲ နေခဲ့ရတာလေ။ ညအချိန်မှာ တံခါးလာခေါက်တော့ ကလေးတွေက သူတို့မိဘထင်လို့ ဖွင့်ပေးလိုက်တာ။ ကလေးတွေကို သေနတ်ထောက်ပြီး ရွှေတွေ ထုတ်ခိုင်းတာ။ အိမ်ထဲလည်း ဝင်မွှေပြီး ပိုက်ဆံက ၃ သိန်း ပါသွားတာ။ ကလေးတွေပဲ ရှိမှန်းသိလို့ ဓားပြ လာတိုက်တာဖြစ်မယ်”
အဆိုပါကိစ္စကို သက်ဆိုင်ရာ အုပ်ချုပ်ရေးမှူးက ကြားဝင်ညှိနှိုင်းပေးခဲ့ပြီးနောက် ဓားပြအဖွဲ့ကို ရှာဖွေအရေးယူတာ မလုပ်တော့ဘဲ အမှုကို ရပ်တန့်လိုက်တယ်လို့ ဆိုပါတယ်။
ဒါ့အပြင် ရဲစခန်းဘက်ကလည်း ဒေသခံတွေအနေနဲ့ လုံခြုံရေးကို အထူးဂရုပြုပြီး သတိရှိရှိနဲ့ နေထိုင်ကြဖို့ကိုသာ မှာကြားခဲ့တယ်လို့ ပြောပါတယ်။
နောက်ထပ် ဒေသခံတစ်ဦး ပြောတာက “ညောင်ကိုးပင်ဘက်မှာက ခဏခဏဖြစ်တယ်။ လူအသွားအလာ နည်းတာဆိုတော့လေ။ ဇာတ်စုဘက်လည်း ဇွန်လ တတိယအပတ်က ညအချိန်မှာပဲ သူခိုးတွေက အိမ် ဖောက်ဝင်တာမျိုး လုပ်တယ်။ လူမရှိတဲ့အိမ်တွေ ပိုဆိုးတယ်” လို့ ပြောပါတယ်။
သီပေါမှာ အခုလို နေအိမ် ဖောက်ထွင်းခံရတာ၊ ဆိုင်ကယ် ခိုးခံရတာနဲ့ ဓားပြတိုက်မှုတွေ ဖြစ်ပွားနေတာကြောင့် ဒေသခံတွေဟာ လုံခြုံးရေးအတွက် စိုးရိမ်နေကြတယ်လို့ ပြောပါတယ်။
သီပေါမြို့က ရပ်ကွက်အများစုမှာ သူခိုးတွေဟာ ညဘက် လူအိပ်ချိန် သန်းခေါင်ယံမှာ နေအိမ်ထဲအထိ အုပ်စုလိုက်ဖွဲ့ပြီး နေအိမ် ဖောက်ထွင်းပြီး ခိုးယူတာတွေ မကြာခဏ ဖြစ်ပွားနေတယ်လို့ ဒေသခံတွေက ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
