ရွှေဖီမြေ၊ မတ်လ ၁၅ ရက်
တအာင်းတပ်- TNLA နဲ့ ကိုးကန့်တပ်- MNDAA အကြား ဖြစ်ပွားနေတဲ့ တိုက်ပွဲတွေကို တွေ့ဆုံဆွေးနွေးနည်းနဲ့ အဖြေရှာဖို့ ကျန်းမာရေးမိသားစု (မန္တလေး) က ဒီနေ့ မတ်လ ၁၅ ရက်မှာ ထုတ်ပြန်ချက် ထုတ်ပြီး တိုက်တွန်းထားပါတယ်။
မြန်မာပြည်သူတွေရဲ့ တော်လှန်ရေးမျှော်မှန်းချက်၊ တော်လှန်ရေးမှာ အသက်ပေးသွားတဲ့ ရဲဘော်တွေ၊ နှစ်ဖက်အဖွဲ့အစည်းမှာ တော်လှန်ရေးကို ရှေ့ရှုပြီး အလုပ်လုပ်ကိုင်နေတဲ့ CDM ကျန်းမာရေးဝန်ထမ်းတွေရဲ့ မျက်နှာကို ထောက်ထားပြီး မိတ်ဖက်ပြဿနာကို တွေ့ဆုံဆွေးနွေးရေးနည်းနဲ့ ဖြေရှင်းဖို့ မေတ္တာရပ်ခံတယ်လို့ ဆိုပါတယ်။
ကျန်းမာရေးမိသားစု (မန္တလေး) ဟာ တအာင်းတပ်နဲ့ ကိုးကန့်တပ်တွေ ထိန်းချုပ်နယ်မြေတွေထဲအပြင် တော်လှန်ရေးနယ်မြေတွေမှာ ဆေးသင်တန်းပေးတာ၊ ကျန်းမာရေးဝန်ထမ်းတွေကို စေလွှတ်ပြီး ဆေးကုသပေးနေတဲ့ ကျန်းမာရေးအဖွဲ့အစည်း ဖြစ်ပါတယ်။
မနေ့ မတ်လ ၁၄ ရက် မနက်ပိုင်းကစပြီး ကွတ်ခိုင်မြို့အပါအဝင် မူဆယ်မြို့ (၁၀၅) မိုင်၊ နမ့်ဖတ်ကာ၊ မုံစီး စတဲ့ နေရာ ၅ ခုထက်မနည်းမှာ TNLA ရဲ့ တပ်စခန်းတွေကို ကိုးကန့်တပ်ဘက်က အင်အားထောင်ချီ အသုံးပြုပြီး ထိုးစစ်ဆင်တိုက်ခိုက်ခဲ့ကာ ဒီနေ့အထိ တိုက်ပွဲ ဆက်လက် ပြင်းထန်နေပါတယ်။
အချင်းချင်းအကြား ဖြစ်ပွားနေတဲ့ တိုက်ပွဲတွေကို ချက်ချင်းရပ်ပြီး နိုင်ငံရေးနည်းလမ်းနဲ့ တွေ့ဆုံဆွေးနွေး အဖြေရှာဖို့ ကိုးကန့်တပ် MNDAA နဲ့ တအာင်းတပ် TNLA တို့ကို အမျိုးသားညီညွတ်ရေး အတိုင်ပင်ခံကောင်စီ (NUCC) ကလည်း ထုတ်ပြန် တောင်းဆိုထားပါတယ်။
တအာင်းတပ်ဘက်ကတော့ MNDAA နဲ့ တအာင်းတပ်တို့အကြား ဖြစ်ပွားနေတဲ့ ပြဿနာတွေကို တွေ့ဆုံဆွေးနွေး ညှိနှိုင်းရေးနဲ့ ကြိုးစား အဖြေရှာသွားမယ်လို့ မနေ့ မတ်လ ၁၄ ရက်မှာ ထုတ်ပြန်ထားပါတယ်။
ကိုးကန့်တပ်ဘက်ကတော့ လက်ရှိ ဖြစ်ပွားနေတဲ့ တိုက်ပွဲတွေကို တအာင်းတပ်ဘက်က တာဝန်ယူရမယ်လို့ ထုတ်ပြန် ပြောဆိုထားပြီး တအာင်းတပ်ကို အပြင်းအထန် ထိုးစစ်ဆင် တိုက်ခိုက်နေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
