ပို့လဘား၊ မေလ ၁၈ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ တရုတ်-မြန်မာနယ်စပ် ရှမ်းမြောက် မူဆယ်မြို့မှာ ကျားဖြန်လုပ်ကိုင်သူ ၃၈ ဦး ဖမ်းဆီးရမိခဲ့တယ်လို့ စစ်ကောင်စီက သတင်းထုတ်ပြန်ထားပါတယ်။
မနေ့ မေလ ၁၇ ရက်မှာ မူဆယ်မြို့ စွမ်စော်ရပ်ကွက်ရှိ ကျားဖြန်ရုံတစ်ခုကို စစ်တပ်က ဝင်ရောက်စီးနင်းခဲ့ရာ တရုတ်နိုင်ငံသား ၄ ဦးအပါအဝင် မြန်မာနိုင်ငံသား ၃၈ ဦးကို ဖမ်းဆီးရမိခဲ့တာပဲ ဖြစ်ပါတယ်။
ဒေသခံအမျိုးသမီးတစ်ဦးက “သူတို့ ဖမ်းတာ ဟုတ်တယ်။ ဟန်လုပ်ပြနေတာ ဖမ်းပြီးရင် သူတို့ ပြန်လွှတ်ပေးတာပဲ။ ခေါင်းဆောင်တွေကို မဖမ်းနိုင်ဘူးလေ။ သူတို့ပစ္စည်းတွေနဲ့ သူတို့လက်အောက်ကသူတွေပဲ ဖမ်းပြတာ။ ပြီးရင် သူတို့ပြန်လွှတ်ပေးမှာပဲ။ သတင်းအရင်ပေးပြီး သူတို့လာဖမ်းတာလေ ခေါင်းဆောင်တွေက အရင်ပြေးပြီပေါ့” လို့ ပြောပါတယ်။
ဒါ့အပြင် ကျားဖြန်တွေ အသုံးပြုနေတဲ့ အဆောက်အဦး၊ ဖုန်းမျိုးစုံ ၁၅၅ လုံး၊ ကွန်ပြူတာ အလုံး ၃၀၊ တရုတ်ငွေ ယွမ် ၁ သောင်း(သိန်း ၆၀ ကျော်)၊ မြန်မာငွေ ၁၀ သိန်းကျပ်နဲ့ ကား ၂ စီးကိုလည်း သိမ်းဆည်းရမိခဲ့တယ်လို့ ထုတ်ပြန်ထားပါတယ်။
ပြီးခဲ့တဲ့ ဧပြီ ၂၉ ရက်မှာလည်း မူဆယ်မြို့နယ် တော်ရွက်ရပ်ကွက်မှာရှိတဲ့ ကျားဖြန်ရုံကို စစ်ကောင်စီက ဝင်ရောက်စီးနင်းခဲ့ရာ ကျားဖြန်လုပ်ကိုင်သူ တရုတ်နိုင်ငံသား ၂ ဦးနဲ့ မြန်မာနိုင်ငံသား ၁၂ ဦးအပါအဝင် ၎င်းတို့အသုံးပြုတဲ့ အဆောက်အအုံ၊ စတားလင့်စက်နဲ့ ဆက်စပ်ပစ္စည်းတွေကိုလည်း သိမ်းဆည်းရမိခဲ့တယ်လို့ ဆိုပါတယ်။
ဧပြီ ၂၉ ရက် ညနေ ၄ နာရီခွဲကလည်း မူဆယ်မြို့ ဟိုမွန်ရပ်ကွက်အတွင်း တရားမဝင် ဝင်ရောက်နေထိုင်ကြတဲ့ တရုတ်နိုင်ငံသား ၂၆ ဦးကိုလည်း ဖမ်းဆီးရမိခဲ့ဖူးပါတယ်။
အခုလို ဖမ်းဆီးမှု ရှိနေပေမဲ့ မူဆယ်မှာ ဌာနဆိုင်ရာတွေကို အခွန်ဆောင်ပြီး ကျားဖြန်လုပ်ကိုင်တဲ့ လုပ်ငန်းတွေ အများစု ရှိနေဆဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
