သုတ၊ ဖေဖော်ဝါရီ ၁၀ ရက်၊ ကျောက်မဲ
ရှမ်းမြောက် ကျောက်မဲမြို့အဝင်မှာ ညီနောင်မဟာမိတ် (၃) ဖွဲ့ ထိန်းချုပ်ထားတဲ့ တရုတ်-မြန်မာ နယ်စပ်ဂိတ်ကနေ တရုတ်ထုတ်ကုန် တင်ဆောင်လာတဲ့ ကုန်ကားတွေကို စစ်ကောင်စီတပ်က ဖမ်းဆီးနေတယ်လို့ ရွှေဖီမြေက စုံစမ်းသိရှိရပါတယ်။
စစ်ကောင်စီတပ်က ရှမ်းမြောက် နမ့်ဆန်–မိုင်းငေါ့–ကျောက်မဲ လမ်းပိုင်းကနေ တရုတ်ထုတ်ကုန် တင်ဆောင်လာတဲ့ ကုန်ကားတွေကို ကျောက်မဲမြို့အဝင်မှာ ပြီးခဲ့တဲ့ ဖေဖော်ဝါရီ ပထမအပတ်ကစပြီး ဖမ်းဆီးမှုတွေ ပြုလုပ်လာတာလို့ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“၂ ရက်လောက် လမ်းပိတ်သွားတယ်။ ၇ ရက်နေ့မှ ပြန်ဖွင့်ပေးတာ။ တရုတ်နိုင်ငံ ထုတ်ကုန်တွေကိုတော့ မပေးဝင်ဘူး။ အကုန်ဖမ်းတယ်။ တောင်ပေါ်ကား အတက်အဆင်းတွေကိုတော့ သွားလာခွင့် ပေးတယ်” လို့ ဆိုပါတယ်။
စစ်ကောင်စီတပ်က ညီနောင်မဟာမိတ် (၃) ဖွဲ့ ထိန်းချုပ်ထားတဲ့ တရုတ်–မြန်မာ နယ်စပ်ဂိတ်ကနေ ထွက်လာတဲ့ ကုန်ပစ္စည်းတွေကို ပြည်မဘက် မရောက်အောင် ရှမ်းမြောက် လားရှိုး–မိုင်းရယ် လမ်းပိုင်းမှာလည်း စစ်ဆေးမှုတွေ တင်းကြပ်ပြီး ဖမ်းဆီးမှုတွေ ပြုလုပ်နေပါတယ်။
ဒါ့အပြင် ပြီးခဲ့တဲ့ ၂၀၂၅ ခုနှစ် နိုဝင်ဘာလကုန်ကတည်းက လားရှိုး–သီပေါမြို့ကို ဆက်သွယ်ထားတဲ့ သီပေါတံတားကို စစ်ကောင်စီက လက်ရှိအချိန်အထိ ပိတ်ထားတာကလည်း တရုတ်ထုတ်ကုန်တွေ မဝင်နိုင်အောင် ကန့်သတ်ပိတ်ပင်ထားတာဖြစ်တယ်လို့ သုံးသပ်မှုတွေ ရှိနေပါတယ်။
စစ်ကောင်စီရဲ့ ဒီလို ကန့်သတ်ပိတ်ပင်မှုတွေဟာ ညီနောင်မဟာမိတ် (၃) ဖွဲ့ဆီကို အခွန်ဝင်ငွေတွေ မစီးဆင်းနိုင်အောင် ပြုလုပ်နေတာဖြစ်တယ်လို့ နယ်စပ်ကုန်သည်တွေက ရွှေဖီမြေကို ပြောဆိုထားပါတယ်။
တရုတ်–မြန်မာ နယ်စပ်ကုန်သွယ်ရေးအတွက် အရေးပါတဲ့ ၁၀၅ ကုန်သွယ်ရေးဇုန်ကို ညီနောင်မဟာမိတ် (၃) ဖွဲ့ဖြစ်တဲ့ တအာင်းတပ်မတော် (TNLA)၊ အာရက္ခတပ်တော် (AA) နဲ့ ကိုးကန့်တပ် (MNDAA) တို့က ထိန်းချုပ်ထားတဲ့ ချင်းရွှေဟော် နယ်စပ်ဂိတ်ကို လက်ရှိမှာ ကိုးကန့်တပ်က ထိန်းချုပ်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
