လွေးလာဝ်ဇာရ်၊ ဇူလိုင် ၂၃ ရက်၊ မြိုင်
မကွေးတိုင်း မြိုင်မြို့နယ်နဲ့ ပေါက်မြို့နယ်မှာ ၁ လအတွင်း စစ်ကောင်စီတပ်က ဒေသခံ ၂၄ ဦးကို သတ်ဖြတ်သွားခဲ့တယ်လို့ အညာမြေ အရပ်ဖက်လူမှုအဖွဲ့အစည်း-မြိုင်က မနေ့ ဇူလိုင် ၂၂ ရက်မှာ ထုတ်ပြန်ထားပါတယ်။
ပြီးခဲ့တဲ့ ဇွန်လ ၂၃ ရက်ကနေ ဒီလ ဇူလိုင် ၂၃ ရက်အထိ စစ်ကောင်စီတပ်ရဲ့ စစ်ကြောင့်တွေဟာ ဒေသခံတွေကို ရက်ရက်စက်စက် သတ်ဖြတ်သွားခဲ့တာလို့ သိရပါတယ်။
ပြီးခဲ့တဲ့ ဇွန်လ ၂၃ ရက်မှာ မြိုင်မြို့နယ်ထဲကို ပထမအကြိမ် စစ်ကြောင်းထိုးခဲ့ပြီး မြိုင်နယ်တောင်ပိုင်း သာစည်ရွာက အမျိုးသားတစ်ဦး၊နှမ်းဆီကန်ရွာ အမျိုးသားတစ်ဦး ၊မိတ္ထီလာရွာက အမျိုးသားနှစ်ဦး၊ ဝက်ပုတ်ရွာက ပြည်သူတစ်ဦး၊ကုန်းရွာက တစ်ဦး စုစုပေါင်း ၆ ဦးကို သတ်ဖြတ်ခဲ့ပါတယ်။
ဒါ့အပြင့် ပြီးခဲ့တဲ့ ဇူလိုင် ၂ ရင်မှာလည်း ပေါက်နယ် ထောက်ရှာပင်ကျေးရွာထဲကို စစ်ကြောင်းဝင်ရောက်ခဲ့ပြီး ရွာထဲက စိတ်မနှံ့တဲ့ အမျိုးသမီးတစ်ဦးအပါအဝင် ဒေသခံ ၅ ဦးကိုသတ်ဖြတ်သွားခဲ့ပါတယ်။
ဇူလိုင် ၁၈ ရင်မှာလည်း ကွန်လပ်ကျေးရွာကို စစ်ကြောင်းဝင်ရောက်ခဲ့ပြီး အမျိုးသားတစ်ဦးရဲ့မီးရှို့သတ်ဖြတ်ထားသောရုပ်အလောင်းတစ်လောင်းနဲ့ ဘောတုံကျေးရွာက မီးရှို့သတ်ဖြတ်ထားတဲ့ ရုပ်အလောင်း ငါးလောင်း၊ သံချောင်းကျေးရွာထဲက စိတ်ကျန်းမာရေးချို့ယွင်းနေတဲ့ အမျိုးသားတစ်ဦး စုစုပေါင်း ၈ ဦးကို ရက်ရက်စက်စက် သတ်ဖြတ်ထားခဲ့တယ်လို့ ဆိုပါတယ်။
အလားတူ မြိုင်နယ်ထဲကို စစ်ကြောင်းဝင်ရောက်ခဲ့ပြီး ကန်နက်ရွာက အမျိုးသားနှစ်ဦး၊ မြင်းကိုးသစ်ရွာက အမျိုးသားတစ်ဦး၊ ကိုင်းတောမရွာက အမျိုးသားတစ်ဦး၊ ဝါးရင်းချိုင်ကျေးရွာက အမျိုးသားတစ်ဦး စုစုပေါင်း ၅ ဦး ကိုသတ်ဖြတ်ပြီး အလောင်းဖျောက်ထားခဲ့တယ်လို့ အညာမြေ အရပ်ဖက်လူမှုအဖွဲ့အစည်း-မြိုင် ထုတ်ပြန်ချက်အရ သိရပါတယ်။
အညာမြေ အရပ်ဖက်လူမှုအဖွဲ့အစည်း-မြိုင်ရဲ့ တာဝန်ရှိသူတစ်ဦးက “စစ်ကြောင်းတွေက နေ့တိုင်းထိုးနေတယ်။ ဒီနေ့အထိဘဲ။ ဒေသခံတွေက ထွက်ပြေးတိမ်းရှောင်ရတုန်းဘဲ။ ဒီနေ့လည်း တင်းမရွာရောက်နေတယ်။ အခုထိ ရှိတုန်းဘဲ။ အဲနားတစ်ဝိုက်က ရွာတွေအကုန်လုံး ရှောင်းနေရတယ်။ အဓိက ရေနံမှော်အနီးကရွာနဲ့ ရေနံလုပ်သားတွေလည်း ရှောင်နေရတယ်။
စစ်ကောင်စီတပ်ရဲ့ စစ်ကြောင်းထိုးမှုကြောင့် လက်ရှိအချိန်အထိ ဒေသခံ ၁ သောင်းကနေ ၂ သောင်းနီးပါးဟာ ဘေးလွတ်ရာကို ထွက်ပြေးတိမ်းရှောင်နေကြရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
