ဝတ်ရည်၊ မေလ ၂၂ ရက်၊ ခင်ဦး
စစ်ကိုင်းတိုင်း ခင်ဦးမြို့နယ်မှာ စစ်ကောင်စီတပ်ရဲ့ လေကြောင်း တိုက်ခိုက်မှုကြောင့် ဒေသခံ ၄ ဦး သေဆုံးခဲ့ပြီး ၈ ဦးထက်မနည်း ဒဏ်ရာ ရရှိခဲ့တယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
မနေ့ မေလ ၂၁ ရက် ည ၉ နာရီမှာ ခင်ဦးမြို့နယ် ရွာစဉ်ရွာကို ဂျက်ဖိုက်တာနဲ့ လေကြောင်းကနေ ဗုံးကြဲတိုက်ခိုက်ခဲ့တာလို့ ဆိုပါတယ်။
ဒေသခံအမျိုးသားက “သေဆုံးတဲ့အထဲက အမျိုးသမီးတွေလည်း ပါဝင်ပါတယ်။ ဒဏ်ရာ ရရှိတဲ့သူတွေလည်း ၈ ယောက် မကပါဘူး။ ဒေသခံတွေကိုသာ ပစ်မှတ်ထားပြီး လေကြောင်း တိုက်ခိုက်နေတာပါ” လို့ ဆိုပါတယ်။
အသက် ၆၂ နှစ်၊ ၂၇ နှစ်အရွယ် အမျိုးသမီး ၂ ဦးနဲ့ အမျိုးသား ၂ ဦး သေဆုံးခဲ့တာဖြစ်ပြီး နေအိမ် ၂၀ ကျော်လည်း ထိမှန်ပျက်စီးခဲ့တယ်လို့ ဆိုပါတယ်။
စစ်တပ်ဟာ ၎င်းတို့ လက်လွှတ်ခဲ့ရတဲ့ မန္တလေးတိုင်းအပါအဝင် စစ်ကိုင်းနဲ့ မကွေးတိုင်းအတွင်းက နယ်မြေတွေကို မြေပြင်ထိုးစစ် လုပ်ဆောင်နေသလို လေကြောင်း တိုက်ခိုက်မှုလည်း လုပ်ဆောင်တာကြောင့် ဒေသခံတွေအနေနဲ့ လေကြောင်းရန်ကို အထူးဂရုစိုက် နေထိုင်ကြဖို့ကိုလည်း တော်လှန်ရေးတပ်ဖွဲ့ဝင်တွေက တိုက်တွန်းထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
