ရွှေဖီမြေ၊ ဇူလိုင် ၂၂ ရက်၊ တန့်ယန်း
ကွတ်ခိုင်မြို့ကနေ ထောင်ဖောက်ပြေးသွားပြီး သက်ငယ်အဓမ္မပြုကျင်မှု ကျူးလွန်ခဲ့တဲ့ ဆရာဝန် အောင်ဖြိုးနိုင်ဟာ တန့်ယန်းမြို့က မိုင်ဆုန်ဆေးရုံမှာ တာဝန်ထမ်းဆောင်ရာကနေ သတင်းတွေတက်လာတဲ့အတွက်ကြောင့် ဖမ်းဆီးမခံရဘဲ ထပ်မံထွက်ပြေးသွားကြောင်း သတင်းအရင်းအမြစ် အမျိုးသားတစ်ဦးရဲ့ ပြောပြချက်အရ သိရပါတယ်။
၎င်းအသက် ၃၇ နှစ်အရွယ် ဒေါက်တာ အောင်ဖြိုးနိုင်ဟာ ပြီးခဲ့တဲ့နှစ် နိုဝင်ဘာ ၁ ရက်က ထောင်ဖောက်ပြေးသွားပြီး ပြီးခဲ့တဲ့လ ဇွန်လမှာ တန့်ယန်းရှိ ပုဂ္ဂလိက ဆေးရုံဖြစ်တဲ့ မိုင်ဆုန်ဆေးရုံမှာ ခွဲစိတ်ဆရာဝန်အဖြစ် တာဝန်ထမ်းဆောင်နေပြီး လက်ရှိမှာတော့ ၎င်းနေရာကနေ ထပ်မံထွက်ပြေးသွားပြီဖြစ်ပါတယ်။
ဖြစ်စဉ်သိရသူ သတင်းအရင်းအမြစ်က “အဲ CDM ဆရာဝန်က စစ်ကောင်စီရဲ့ အကူအညီနဲ့ဘဲ တခြားမြို့ကို ပြေးသွားပြီ။ အဲမှာရှိတဲ့ ပုဂ္ဂလိက ဆေးရုံတွေက ရဲတွေ၊ စစ်သားတွေကို ငွေပေးထားပြီး တစ်ခုခုဆို လာဖမ်းရင် ထွက်ပြေးလို့ရတယ်။ ဟို လူယုတ်မာလဲ ဘယ်မြို့က မိန်းကလေးတွေကို ဒုက္ခပေးအုံးမလဲမသိဘူး” လို့ ပြောပါတယ်။
၎င်းမိုင်ဆုန်ဆေးရုံဟာ ပြီးခဲ့တဲ့ ဇူလိုင် ၂၀ ရက်ကစပြီး ယာယီ ပိတ်ထားဆဲ ဖြစ်သလို လက်ရှိမှာတော့ ဝန်ထမ်း ၁၀၀ နီးပါးက အလုပ်လက်မဲ့ဖြစ်နေကြောင်း အထက်ပါသတင်းအရင်းအမြစ်က ပြောပါတယ်။
ဆေးရုံ ပြန်ဖွင့်နိုင်ဖို့ကိုလည်း စစ်ကောင်စီအပြင် သက်ဆိုင်ရာတွေနဲ့ ဆေးရုံအုပ်က ဆွေးနွေးညှိနှိုင်းမှုတွေ လုပ်နေရကြောင်း ဒေသခံတွေက ပြောပါတယ်။
ထွက်ပြေးနေဆဲဖြစ်တဲ့ ဒေါက်တာ အောင်ဖြိုးနိုင်ကို ရှမ်းတောင်၊ ရှမ်းမြောက်နဲ့ ရှမ်းအရှေ့ရှိ လူထုတွေက တွေ့ခဲ့ပါက သက်ဆိုင်ရာကို တိုင်ကြားဖို့နဲ့ ရှောင်ရှားနိုင်ဖို့ တိုက်တွန်းလိုကြောင်း အဲသတင်းအရင်းမြစ်က ရွှေဖီမြေကို ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
