လွေးဇွန်မိုး၊ မတ်လ ၂၄ ရက်၊ ကွတ်ခိုင်
ကွတ်ခိုင်မှာ ကိုးကန့်တပ်- MNDAA က တအာင်းတပ်- TNLA ကို ထိုးစစ်ဆင်တိုက်ခိုက်ခဲ့တဲ့ တိုက်ပွဲအတွင်း အနည်းဆုံး နေအိမ် ၁၂ အိမ်၊ ဘုန်းကြီးကျောင်း ၃ ကျောင်းနဲ့ စာသင်ကျောင်း ၁ ကျောင်း ပျက်စီးခဲ့တယ်လို့ ဒေသခံတွေဆီက သိရပါတယ်။
ပြီးခဲ့တဲ့ မတ်လ ၁၄ ရက် မနက်မှာ စတင်ခဲ့တဲ့ တိုက်ပွဲကြောင့် လွယ်ဆိုင်ရွာ ဘုန်းကြီးကျောင်း၊ စာသင်ကျောင်းနဲ့ နေအိမ် ၉ အိမ် ပျက်စီးခဲ့တယ်လို့ ဒေသခံအမျိုးသားတစ်ဦးက ပြောပါတယ်။
“အစည်းအဝေးမှာတော့ သူတို့(MNDAA) ပြန်ပြင်ပေးမယ်လို့ ပြောတာပဲ။ အသစ်အတိုင်း ပြန်ဖြစ်အောင်လို့လည်း မပြောပါဘူး။ ပြန်ပြင်ပေးမယ်ပဲပြောတာ။ သူတို့ကိုလည်း အကုန်လိုက်ပြပြီးပြီ။ သူတို့က အထက်ကို ပြန်တင်ပြအုံးမယ်တဲ့”
အလားတူ ဟိုကျန့်ရွာက နေအိမ် ၃ လုံး၊ မန်ထန်ရွာ ဘုန်းကြီးကျောင်းနဲ့ ရွှေကမ္ဘာအေး ဘုန်းကြီးကျောင်း ထိမှန်ပျက်စီးခဲ့ကြောင်း ရွှေဖီမြေက ကောက်ယူရရှိထားတဲ့ စာရင်းအရ သိရပါတယ်။
ကိုးကန့်တပ်ဘက်က ပျက်စီးတဲ့နေအိမ်တွေကို လာရောက်ကြည့်ရှုသွားတာ ရှိသလို စာရင်းတွေလည်း ကောက်ယူသွားတာရှိပြီး လက်ရှိအချိန်ထိတော့ တစ်စုံတစ်ရာ ထောက်ပံ့ပေးတာ မရှိသေးဘူးလို့ ဒေသခံတွေက ပြောပါတယ်။
အလားတူ ကွတ်ခိုင်တိုက်ပွဲအတွင်း MNDAA ရဲ့ ဒရုန်းဗုံး၊ သေနတ်နဲ့ပစ်ခတ်မှုကြောင့် ကလေး ၁ ဦးအပါအဝင် ဒေသခံ အနည်းဆုံး ၈ ဦး သေဆုံးခဲ့ပြီး ကလေး ၄ ဦးအပါအဝင် ဒေသခံ ၇ ဦး ဒဏ်ရာ ရခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
