ရွှေဖီမြေ၊ မေလ ၇ ရက်၊ ဖားကန့်
ကချင်ပြည်နယ် ဖားကန့်မြို့နယ်က လုံးခင်းကျေးရွာမှာ မိုင်းပေါက်ကွဲမှုကြောင့် ကလေးငယ် ၁ ဦး သေဆုံးပြီး ၂ ဦး ဒဏ်ရာရရှိခဲ့တယ်လို့ ဖားကန့်ဒေသခံတစ်ဦးက ရွှေဖီမြေကို ပြောပါတယ်။
ဒီနေ့ မေလ ၇ ရက် မနက် ၁၁ နာရီဝန်းကျင်မှာ လုံးခင်းရွာရဲ့ ဘုန်းကြီးကျောင်း လမ်းခွဲမှာ ထောင်မိုင်းတစ်လုံး ပေါက်ကွဲခဲ့ပြီး အဲဒီပေါက်ကွဲမှုကြောင့်ပဲ ထိခိုက်သေဆုံးခဲ့ကြတာလို့ ဆိုပါတယ်။
ဒဏ်ရာရရှိသူ ၂ ဦးကလည်း စိုးရိမ်ရတဲ့ အခြေအနေမှာ ရှိတယ်လို့ ဖြစ်စဉ်သိရှိသူ တစ်ဦးက ရွှေဖီမြေကို ပြောဆိုပါတယ်။
၎င်းက “ကလေးငယ်ကတော့ ဝမ်းဗိုက်ထိပြီးတော့ ဆုံးသွားပါပြီ။ ကလေးအမေကတော့ လက်နှစ်ချောင်း ပြတ်သွားတယ်။ သူ့ဦးလေးက ဒဏ်ရာစိုးရိမ်ရတယ်။ ဆေးရုံတင်ထားရတယ်။ အဲဒီမိုင်းကတော့ ထောင်မိုင်းဘဲ။ မနက်က ဆိုင်ကယ်နဲ့ လာရောက်ချထားတာ” လို့ ပြောပါတယ်။
မိုင်းပေါက်ကွဲမှုကြောင့် အသက် ၄ နှစ်ဝန်းကျင်အရွယ် မိန်းကလေးငယ် ၁ ဦး သေဆုံးပြီး ဒဏ်ရာအပြင်းအထန်ရရှိသွားသူတွေကတော့ အမျိုးသမီး ၁ ဦးနဲ့ အမျိုးသား ၁ ဦးဖြစ်တယ်လို့ သိရပါတယ်။
အဆိုပါ မိုင်းကို ဘယ်သူဘယ်ဝါက လာရောက်ထောင်သွားတယ်ဆိုတာကိုတော့ မသိရဘူးလို့ ၎င်းက ဆက်ပြောပါတယ်။
အလားတူ ဒီနေ့ မနက်ပိုင်းတုန်းကလည်း စစ်ကောင်စီတပ်ဘက်က ဖားကန့်ဗျူဟာကုန်းကနေ လုံးခင်းရွာထဲကို လက်နက်ကြီးတွေ ပစ်ခတ်တိုက်ခိုက်နေတယ်လို့ နောက်ထပ် ဒေသခံတစ်ဦးက ပြောပါတယ်။
ပြီးခဲ့တဲ့ မေလ ၄ ရက်တုန်းကလည်း ဖားကန့်ဗျူဟာကုန်းမှာ တပ်စွဲထားတဲ့ စစ်ကောင်စီတပ်က လုံးခင်းကျေးရွာနဲ့ လယ်ပြင်ကျေးရွာထဲကို လက်နက်ကြီး ပစ်ခတ်ခဲ့တာကြောင့် ဒေသခံ ၂ ဦး ထိမှန်ဒဏ်ရာရရှိခဲ့တယ်လို့ သိရပါတယ်။
ဒီနေ့ မေလ ၇ ရက်မှာ ဖားကန့်မြို့နယ်ထဲမှာ တိုက်ပွဲတွေ ငြိမ်သက်နေပေမယ့် နှစ်ဖက် စစ်ရေးတင်းမာမှုတွေတော့ ဆက်လက်ရှိနေတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
