ရွှေဖီမြေ၊ မေလ ၉ ရက်၊ မန်တုံ
တအာင်းတပ်မတော် ထိန်းချုပ်ထားတဲ့ တအာင်းဒေသ မန်တုံမြို့ပေါ်မှာလည်း ဆိုင်ကယ် ခိုးမှုတွေ ထပ်မံ ဖြစ်ပွားနေတာကြောင့် သူခိုးတွေကို ဖမ်းဆီးအရေးယူပေးဖို့ ဒေသခံတွေက တောင်းဆိုနေကြပါတယ်။
မန်တုံမြို့ပေါ်မှာ အရင်က ဆိုင်ကယ် ပျောက်ဆုံးမှု မရှိသလောက် နည်းပါးခဲ့ပေမဲ့ ၂၀၂၆ ခုနှစ် ဧပြီလကစပြီး ဘုန်းကြီးကျောင်းဝန်းအတွင်းနဲ့ အိမ်ရှေ့ ရပ်ထားရာကနေ ခိုးခံနေရတယ်လို့ ဒေသခံအမျိုးသမီးတစ်ဦးက ရွှေဖီမြေကို ပြောပါတယ်။
“အရင်တုန်းက မန်တုံမြို့မှာ ဆိုင်ကယ် ပျောက်တာတွေ တစ်ခါမှ မရှိဖူးဘူး။ ဒီ ၂၀၂၆ မှပဲ ဆိုင်ကယ်တွေ ခဏခဏ ပျောက်လာတယ်။ ၄ လပိုင်း လဆန်းပိုင်းနဲ့ လကုန်ပိုင်းတုန်းကဆိုရင် ၅ စီးလောက် ပျောက်သွားတယ်။ တစ်ပြိုင်နက်တည်း ၂ စီး ခိုးခံရတာတွေလည်းရှိတယ်။ အခြေအနေ တော်တော်ဆိုးလာတယ်”
ဧပြီလအတွင်း မန်တုံမြို့ အောင်မင်္ဂလာ မြို့လယ်ကျောင်းမှာ တစ်ညအတွင်း ဆိုင်ကယ် ၂ စီး ခိုးခံရသလို တရုတ် ယဉ်ကျေးမှုခန်းမအနီး လမ်းဘေးမှာ ရပ်ထားတဲ့ ဆိုင်ကယ်တစ်စီးလည်း ပျောက်ဆုံးသွားကြောင်း သိရပါတယ်။
ဒါ့အပြင် မန်တုံမြို့ ကညနရုံးဝင်းထဲအထိ ဆိုင်ကယ် ဝင်ရောက်ခိုးခံရတဲ့ဖြစ်စဉ်လည်း ရှိခဲ့တယ်လို့ ဒေသခံတွေက ပြောပါတယ်။
မနေ့ မေလ ၈ ရက် ညနေ ၇ နာရီဝန်းကျင်ကလည်း အမျိုးသားတစ်ဦးဟာ မိုးမိတ်-နမ့်ဆန်လမ်းခွဲအနီးမှာရှိတဲ့ အိမ်တစ်အိမ်ရှေ့မှာ ဆိုင်ကယ် ရပ်ထားရာကနေ ခိုးခံလိုက်ရတယ်လို့ နောက်ထပ် ဒေသခံအမျိုးသမီးတစ်ဦးက ပြောပါတယ်။
လက်ရှိ မန်တုံမြို့ပေါ် မူးယစ်ဆေးဝါး သုံးစွဲသူတွေ ပြန်များလာပြီး အွန်လိုင်းဂိမ်းဖြစ်တဲ့ စလော့ဂိမ်း ဆော့ကစားသူတွေလည်း များလာတာဟာ ဆိုင်ကယ်ခိုးမှု များလာရတဲ့ အကြောင်းအရင်းတစ်ခု ဖြစ်နိုင်တယ်လို့ အထက်ပါ ဒေသခံအမျိုးသမီးက ယူဆပါတယ်။
အခုလို ဆိုင်ကယ် ပျောက်ဆုံးမှု များလာတာကြောင့် ဒေသခံတွေအနေနဲ့ သွားလာရေးအတွက် စိုးရိမ်နေရပြီး စိတ်လုံခြုံမှုလည်း လျော့နည်းလာတဲ့အတွက် တာဝန်ရှိသူတွေအနေနဲ့ ထိထိရောက်ရောက် စုံစမ်းဖော်ထုတ်ကာ အရေးယူပေးစေလိုတယ်လို့ ၎င်းက ဆက်ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
