ရွှေဖီမြေ၊ မေလ ၁၂ ရက်၊ ပန်ဆန်း
“ဝ”တပ်မတော်- UWSA က တရုတ်နိုင်ငံဘက်က ဖမ်းဆီးပေးဖို့ တောင်းခံထားတဲ့ ကျားဖျန့် (အွန်လိုင်း ငွေလိမ်လည်မှု)ဦးဆောင်သူ ၄ ဦးနဲ့ ၎င်းတို့နဲ့ဆက်စပ်ပါဝင်သူ ၃၉ ဦးကို တရုတ်ထံ လွှဲပြောင်းပေးခဲ့တယ်လို့ “ဝ”ပြည် တရားစီရင်ရေးကော်မတီ- WSP က ထုတ်ပြန်လာပါတယ်။
ကျားဖျန်း ၄၃ ဦးဟာ တရုတ်နိုင်ငံသားတွေဖြစ်ကြပြီး ပန်ဆန်းခေါ် ပန်ခမ်းမြို့ရှိ မုန်အာ နယ်စပ်ဂိတ်ကနေတဆင့် တရုတ်ထံ လွှဲပြောင်းပေးခဲ့ကြောင်း မနေ့ မေလ ၁၁ ရက်မှာ ထုတ်ပြန်ထားတာပါ။
အခုလို တရားခံ လွှဲပြောင်းပေးခြင်းအားဖြင့် “ဝ”ပြည် တရားစီရင်ရေးကော်မတီနဲ့ တရုတ်တို့အကြား သတင်းအချက်အလက် မျှဝေခြင်း၊ အမှုပူးပေါင်းစစ်ဆေးခြင်း၊ ဥပဒေစိုးမိုးရေး ပူးပေါင်းဆောင်ရွက်ခြင်းတွေကို ပြသခြင်းဖြစ်တယ်လို့ ဆိုပါတယ်။
UWSA ဟာ တရုတ်က ဖမ်းဆီးပေးဖို့ အကြောင်းကြားတဲ့ ကျားဖျန့်တွေကို ဆက်တိုက် ဖမ်းဆီးပြီး တရုတ်ထံ လွှဲပြောင်းပေးတာ၊ ကျားဖျန့်နဲ့ဆက်စပ်မှုရှိတဲ့ တပ်ဖွဲ့ဝင်တွေကို အရေးယူတာတွေ ဆက်တိုက် လုပ်ဆောင်လာနေသလို ဒေသထဲ တရားမဝင် ဝင်ရောက်လာတဲ့ တရုတ်နိုင်ငံသားတွေကိုလည်း ဆက်တိုက် ပြန်ပို့နေပါတယ်။
ပြီးခဲ့တဲ့ မေလ ၈ ရက်မှာလည်း UWSA က မိုင်းလားတပ်- NDAA နဲ့ ပူးပေါင်းပြီး တရုတ်နိုင်ငံသား ၁၀ ဦး ပါဝင်တဲ့ ကျားဖျန့်လုပ်ကိုင်သူ ၇၈ ဦးကို မိုင်းလားမြို့ တာလော့နယ်စပ်မှာ ဖမ်းဆီးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
