ပို့လဘား၊ ဇန်နဝါရီ ၆ ရက်၊ ဝက်လက်
စစ်ကိုင်းတိုင်း ဝက်လက်မြို့နယ်မှာ စစ်ကောင်စီတပ် ဗုံးကြဲတိုက်ခိုက်လို့ ၂ လအရွယ် သားကလေးငယ်တစ်ဦးအပါအဝင် ၃ ဦးသေဆုံးပြီး ၁ ဦးဒဏ်ရာရရှိခဲ့တယ်လို့ Wetlet Information Network က ဒီနေ့ ထုတ်ပြန်ထားပါတယ်။
ဒီနေ့ ဇန်နဝါရီ ၆ ရက် မနက် ၉ နာရီခွဲကျော်မှာ ဝက်လက်မြို့နယ် တောင်ခြမ်း ပေါက်ကန်ဘူတာကျေးရွာကို စစ်ကောင်စီတပ်က ဂျက်ဖိုက်တာနဲ့ ပေါင် ၃၀၀ ဗုံး ၃ လုံး ကြဲချတိုက်ခိုက်ခဲ့တာ ဖြစ်ပါတယ်။
မြေပြင်သိရှိသူ တစ်ဦးက”၂စီးနဲ့ တစ်နေရာဆီ ကျဲတာ။ ရေသောက်ကုန် စာသင်ကျောင်းနဲ့ဘုန်းကြီးကျောင်း ပျက်ဆီးမှုရှိတယ်။ ၁ဦးထိခိုက်မှုရှိတယ်။ ပေါက်ကန်ဘူတာဘက်မှာလည်း နေအိမ် ၁လုံးပျက်ဆီးပြီးတော့ ကလေး ၁ယောက်နဲ့လူကြီး၂ယောက် သေဆုံးတယ်” လို့ ပြောပါတယ်။
ဗုံးကြဲတိုက်ခိုက်မှုကြောင့် ၂ လသားကလေးငယ်တစ်ဦးအပါအဝင် အသက် ၇၀ နှစ်အရွယ်ရှိတဲ့ ဒေါ်မြနဲ့ အသက် ၆၀ နှစ်အရွယ်ရှိတဲ့ ဒေါ်တင်တင်ဌေးတို့ သေဆုံးခဲ့တာဖြစ်ပြီး အသက် ၄၀ နှစ်အရွယ် အမျိုးသမီးတစ်ဦး ထိခိုက်ဒဏ်ရာရရှိကာ နေအိမ်နဲ့ ကားတစ်ချို့လည်း မီးလောင်ပျက်စီးခဲ့ပါတယ်။
ပြီးခဲ့တဲ့ ဒီဇင်ဘာ ၂၃ ရက်ကလည်း ဝက်လက်မြို့နယ် ငါးပတ်ချောင်းကျေးရွာကို စစ်ကောင်စီတပ်က ဗုံးကြဲတိုက်ခိုက်ခဲ့တာကြောင့် ကလေး၂ ဦးအပါအဝင် ၇ ဦးသေဆုံးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
