ရွှေဖီမြေ၊ မေလ ၇ ရက်၊ နမ္မတူ
တအာင်းတပ်မတော် – TNLA ထိန်းချုပ်ထားတဲ့ ရှမ်းမြောက် နမ္မတူမြို့ပေါ်နဲ့ ကျေးရွာပိုင်းတွေမှာ ဆိုင်ကယ်ပျောက်ဆုံးမှုတွေ ဆက်တိုက်ကြုံနေရတယ်လို့ ဒေသခံတွေထံက စုံစမ်းသိရှိရပါတယ်။
ပြီးခဲ့တဲ့ မေလ ၄ ရက်နေ့တုန်းကလည်း မိုင်းဆင်ကျေးရွာခံတွေက နမ္မတူဆေးရုံမှာ ဆေးကုသနေတဲ့ ဆွေမျိုးတွေကို သွားရောက်ကြည့်ရှုချိန် ဆေးရုံအပြင်ဖက်မှာ ဆိုင်ကယ်ရပ်ထားခဲ့ရာကနေ ပျောက်ဆုံးသွားခဲ့တယ်လို့ မိုင်းဆင်ဒေသခံ အမျိုးသမီးတစ်ဦးက ရွှေဖီမြေကို ပြောပါတယ်။
“၄ ရက်နေ့တုန်းက ကျမတို့ ရွာကလူတွေ ဆေးရုံမှာ သူတို့တူလေးဆီ သွားလည်တာ။ ဆိုင်ကယ်ပျောက်သွားတယ်။ ဆိုင်ကယ်က အသစ်ပဲ ရှိသေးတယ်။ အဲဒီနေ့မှာပဲ ဆေးရုံလာတဲ့ တခြားလူတစ်ယောက်ရဲ့ ဆိုင်ကယ်လည်း ပျောက်သွားသေးတယ်။ တစ်ရက်တည်း ၂ စီးပျောက်သွားတာ” လို့ ၎င်းက ပြောပါတယ်။
အဲဒီနေ့မှာဘဲ နမ္မတူဆေးရုံမှာ နောက်ထပ်လာရောက် ဆေးကုသနေတဲ့ လူနာနဲ့ မိသားစုဝင်တွေရဲ့ ဆိုင်ကယ်တွေလည်း တစ်ပြိုင်နက်တည်း အခိုးခံလိုက်ရတယ်လို့ သိရပါတယ်။
ဒါ့အပြင် ဒီမေလ ပထမပတ်အတွင်းမှာပဲ နမ္မတူမြို့ပေါ်က အမျိုးသမီးတစ်ဦးလည်း ဆိုင်ထဲ ဈေးဝယ်နေစဉ် ဆိုင်ကယ်အခိုးခံရပြီး ပျောက်ဆုံးသွားခဲ့တဲ့ ဖြစ်စဉ်လည်း ဖြစ်ပွားခဲ့တယ်လို့ သိရပါတယ်။
ပြီးခဲ့တဲ့ မေလ ၃ ရက်နေ့ကလည်း နမ္မတူမြို့နယ် ပန်လုံကျေးရွာအုပ်စုအတွင်းမှာရှိတဲ့ ကျေးရွာတွေမှာ ဆိုင်ကယ် အခိုးခံရတာတွေ ဖြစ်ပွားခဲ့တယ်လို့ ဒေသခံတွေက ပြောပါတယ်။
နမ္မတူမှာ အခုလို ခပ်စိတ်စိတ် ဆိုင်ကယ်ပျောက်ဆုံးတာတွေ မကြာခဏ ဖြစ်ပွားနေတာကြောင့် ဒေသခံတွေအကြား စိုးရိမ်မှု မြင့်တက်နေပြီး တအာင်းတပ်အနေနဲ့ လုံခြုံရေးအပေါ် တိုးမြှင့်ဖို့ကိုလည်း တောင်းဆိုထားကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
