မာည်းရူပ၊ ကျံရ်နိုဗဲမ်ဘာ ဆငည်း 26၊ လာဆေဝ်
တိုအီးကီုင်းလာဆေဝ်ကဲအူအီးက္လာင်း တဖုင်ဆျှိုည်ဖီမျေဒါႈ ဒီဘိူန်းတံပ်ကညာအာဏာဆီုက်ဇေဝ်ကဲတထိင်ခြဲ ကပီုန်ဆျှံမ်ကဒါႇပိူည် ခေဲင်ကီုင်းလာဆေဝ်နီန် ကောန်အီပ်ုန်အူအီးကတူႈအီပဴင်အ်ုန်ဒါဆနာတ် ဘာတ်ကဆဝ်းအောႏ။
အမှိူဝ် ကျံရ်နိုဗဲမ်ဘာ ဆငည်း 25 ဇူန်အံပ်ကပံတ် 6 နြီဒိူန် ရီမ်းပြောပါင်ဒီယံင်းတကား အ်ုန်အီဂေါည်တောပ်ဒေင်ဒါင်း လာဆေဝ် – တေင်နီနီန် ကောန်အီပ်ုန်အူအီး ခိင်ဘဒေဲႈအ်ုန်တဆဲင်ကယ် ငျားအီပဴင်ဟာဝ်းအ်ုန် ဒါဆနာတ်အောႏ။
တိုအီးကီုင်းလာဆေဝ် ကောန်အီမာည်းအူအီးက္လာင်းတဖုင်ဆျှိုည်ဖိီမျေဒါႈ “ ထာန်နံပ်အော အာဝ်မိုႈစိ ကဲကဖါ်ႇ။ ကဲပဴင်ဟာဝ်းလိူည် ဘာည်းဒီန်။ ကဲဒါဆနာတ် ပဴင်ဟာဝ်းအ်ုန် 4 ပိုင်း။ လဟာဝ်းတည်အ်ုန်။ နံင်မိုႈလိူည် ပံင်လည်အူန်းကဲတနောႈယိုး။ ကဇေန်နီး ပလာဆေဝ် မိုႈဒိုႇအီးဘာဆနာတ်”
အ်ုန်ဆီုပ်ဒါႈဘိုး ကောန်အီပ်ုန် ကဝ်အီကတူႈ အီပဴင်အ်ုန်ဒီန် အ်ုန်မိုႈအီရေဲန်ဇီုင်းကာန်အပြီဂါင် ကတာည်းနီန် ကံပ်ရောတ်ကဇေန်နီး ညှံမ်ဘိူန်းစိ တိုည်းကဝ်အီပဴင်ဟာဝ်းဒီန်။
တိုအီးအရာပ်လာဆေဝ်ကဲ က္လာင်းဒါႈ ဘံန်ဗီရ်ထိင်ခြဲ တံပ်ကညာအာဏာဆီုက်ဇေဝ်ကဲတ ကီုင်းလာဆေဝ်နီန် အ်ုန်ဂေါည်ဂေါည်ပဲန်ဟာဝ်း အမှုစိုန် ကာည်း အမှုကဖါ်ႇကား ကာည်း ဆဴင်ကယ်နီန်အောႏ။
ခည်ကျံရ်အံက်တိုဘာ ဆငည်း 13 ဒိူန်မာ် ခေဲင်ကီုင်းလာဆေဝ် ပဇံင် 7 ရီမ်းပြောက္လာႈလုံလောနီန်မာ် ကားအူကြောင်ကတူႈဖါ်ႈစိုန် ငျားအီဖါ်ႇဟာဝ်းကားအောႏ။
ဂေါႇပ်ုန်လီပ်ကမိုန်ဒဲႈခယ်ကဲ အ်ုန်အီမိုႈဒီပ်ုန်ထိင်ခြဲ တံပ်ကိုကာင် MNDAA ကဲ ကီုင်းလာဆေဝ်နီန် ကဲဗီရ်အာပ်ဒဲႈတ တံပ်ကညာအာဏာဆီုက်ဇေဝ်ကဲ ခည်ကျံရ်အေပ်ြုရ်ဒိူန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
