မာည်းရူပ၊ ကျံရ်ဇူန်လည် ဆငည်း 5၊ နောင်ခေဝ်
ကဝ်အီဘိူန်း အခွါင်းအရေးကြောႈက္လာင်းခေဲင် PSLF/TNLA ကဲ အ်ုန်အီမိုႈ လိုည်းယေဦးက္လာင်း ခေဲင်ပ်ုန်ကဘ္လာင်းကဲတ ဆဒါင် အဒိူဝ် ကျံရ်ဇူန်လည် ဆငည်း 5 နီန်ဒါႈ ဒီဘိူန်းတံပ်ဆီုက်တအာင်းကဲတထိင်ခြဲ ပကီုင်းနောင်ခေဝ်နီန် ကနာည်နံင်အာဝ်က္လိုတ်ႎီရ် တံပ်ဆီုက်တအာင်းကဲ ဒါႇကီုင်းနောင်ခေဝ်နီန် ကဲနံင်ဆီုပ်တီုက်ဟာဝ်းအူန်းအောႏ။
အ်ုန်က္လာင်းဒါႈ “ ကဇေန်နီး အာဝ်မိူဝ်ႈစိ ဘည်ဘ္လပ္လေႈယဲ ကနာည်နံင် က္လိုတ်ႎီရ်ဒါႇကီုင်းနောင်ခေဝ်နီန်၊ ဘည်ကတူႈယဲတ က္လိုတ်ႎီရ်နီန်မာ် အာဝ်မိူဝ်ႈ။ ယဲရဲန်အူန်း ကနည်နံင် တီုက်ယာ်ႈဟာဝ်း”
လိုည်းယေဦးဆီုပ်ဒါႈဘိုး ကဆီုဝ်တိုအီးအရာပ်ကဲမာ် အာဝ်လိုစိ ညှူမ်ပ်ုန်ကိက်ပ္လိူရ်ႈလေႈ လော်ဘီ တံပ်ကညာအာဏာဆီုက်ဇေဝ်ကဲ ဘည်ခူရ်က္လာည်း ခေဲင်ပ္လေါည်ကတီုက်ကပဴင် နောင်ခေဝ်နီန်အောႏ။
တံပ်ကညာအာဏာဆီုက်ဇေဝ်ကဲ ကနာည်နံင်ႎီရ်ဘိူန်းကဲတလာ်ထိင်ခြဲ ကီုင်းနောင်ခေဝ်နီန် ဒါပွံတ်ရဲင်ဘ္လောမ်ဒါဟြဲင်လေႈ ထိုးလီပ်ဒေဲႈဖါ်ႈ ကဒါႇတံပ်ဆီုက်တအာင်း TNLA ကဲမာ် ကနာည်နံင်အာဝ်ဇောႈကီုင်းနောင်ခေဝ်နီန် ဟည်ႎီရ်တီုက်ဟာဝ်းအောႏ။
ကဝ်အီဂေါည်ခေဲင် ပ္လေည်ကတီုက်ကပဴင်ကဲ က္လာင်းတဖုင်ဆျှိုည်ဖီမျေဒါႈ ဆီုက်ငါးတံပ်ကညာအာဏာဆီုက်ဇေဝ် ကဲအီထိုးလီပ်ဒေဲႈကဒါႇရဝ်အုမ္မတီးနီန် ဟည်ရောတ်ရီမ်းပြောရဝ် ကျောက်ကြမ်း အ်ုန်အီကဒိုင်းတောပ် ကီုင်းနောင်ခေဝ်နီန် 4 မဲင်အောႏ။
ကဲဒါႈ တံပ်ကညာအာဏာဆီုက်ဇေဝ် ကဲအီထိုးလီပ်ဒေဲႈ ကဒါတောင်ခမ်းနီန်မာ် ဟည်ရောတ် ပရဝ်မျက်ချင်းနု အ်ုန်အီကဒိုင်းတောပ် ကီုင်းနောင်ခေဝ်နီန် 4 မဲင် ကဒါႇဒီန်မာ် အ်ုန်ဂီုည်ဆီုပ်ပဲန်အူန်းပ္လေါည်ကတီုက်ကပဴင်အောႏ။
ကဝ်အီဂေါည်ခေဲင်ပ္လေါည်ကတီုက်ကပဲင်နီန် အူအီးက္လာင်းတဖုင်ဆျှိုည်ဖီမျေဒါႈ “ ဆကဆ ကဲအီဂေါည်ကဒါႇ အုမ္မတီးနီန် ကဲဟည်ရောတ်ရီမ်းပြော ကျောက်ကြမ်း။ ကဲအီဒေဲႈကဒါႇတောင်ခမ်းမာ် ဟည်ခ္လေါႈရဝ်မျက်ချင်းနု။ ပ္လေါည်ကတီုက်ကပဴင်နီန် အ်ုန်ဂီုည်ပဲန်ကရဲင်အူန်း”။
တံပ်ကပိုမ် ကာည်း တံပ် TNLA ကဲ တီုက်ဘိူန်းဟာဝ်း တောပ်ပည် တံပ်အ်ုန်အီမိုႈ တံပ်ဒါင်းဒုံး စနဲ (606)နီန် ကာည်း တံပ်ခမရ -114 နီန် ဟောည်ႇဒီန် စီတီုက်ဘိူန်းဟာဝ်းလာ် ကီုင်းနောင်ခေဝ်နီန် ခည်ဆန်ုမ် 2024 ကျံရ်ဇူန်လည် ဆငည်း 10 ဒိူန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
