မာည်းရူပ၊ ကျံရ်ဆဲပ်တီမ်ဘာ ဆငည်း 18၊ လာဆေဝ်
ဖုင်ယဲဆျှိုည်ဖီမျေ တခေါရ်နံပ် မိုႈတကညာဆဴင်ရကာဝ် ဟည်ဟာဝ်းတိူဝ်ႈႎီရ်ဘိုး ရကာဝ် 100ကပျာဝ်း ပ်ုန်ဒေဲႈကဇောည် တားတီုင်ကပ္လိူင် ကပီုန်ဆျှံမ် တံပ်ကညာအာဏာဆီုက်ဇေဝ်ကဲ အ်ုန်အီမိုႈ တားအောင်အောင်နီန်တ ကနာည်ကဲအီဒဝ်ႎဲႈဖေးနာန်း ဒေဲႈရောတ်စာ်မ်းပကီုင်းလာဆေဝ် ဂေါႇပ္လေါည်ကတီုက်ကပဴင်မာဝ်းႎံင်းနီန်အောႏ။
တားတီုင်ကပ္လိူင်ကပီုန်ဆျှံမ်တားအောင်အောင်နီန် အ်ုန်ဒေဲႈကတူႈကငျားဖါ်ႈ တောပ်ကဲအီဒဝ်ႎဲႈဖေးနာန်း ဒေဲႈဂေါည်ပလူမ်ထုင်မှိူမ်ကာည်းဘေဲႇဘာန်းဆျှံမ်ကဲ ပကီုင်းလာဆေဝ် ခည်ကျံရ်ဆဲပ်တီမ်ဘာ ဆငည်း 10ဒိူန် အ်ုန်ဒေဲႈကဇောည်ဟာဝ်းဘိုး တောပ်ပည်ရကာဝ် 140ကပျာဝ်း တောပ်ဘိုးကတံမ်အျံရ်ကာည်း ခဝ်ႇဆောည်ကဲဂဲနီန်အောႏ။
ကောန်အီမာည်း ကဝ်အီဂေါည်ကဒံတ်တောပ် အီကဇောည်ဒဲႈတကဲအီဒဝ်ဖေးနာန်းနီန်အူအီး က္လာင်းတဆျှိည်ဖီမျေဒါႈ ခည်ကျံရ်ဆဲပ်တီမ်ဘာ ဆငည်း 16ဒိူန် ကညာဆဴင်ရကာဝ်ကဲ ဟည်ဒေဲႈတိူဝ်ႈႎီရ် ခေဲင်ရကာဝ်ပ်ုန်ကဇောည်အူန်း တားအောင်အောင်နီန် တလူမ်ထုင်မှိူမ်ကာည်းဘေဲႇဘာန်းဆျှံမ်ကဲ 120ကပျာဝ်းအောႏ။
“အ်ုန်ဒေဲႈလှူဟာဝ်း ခည်ဆငည်း 10ဒိူန်။ အ်ုန်တောပ် ရကာဝ်၊ ကတံမ်အျံရ်၊ ခဝ်ႇဆောည်။ ခည်ဆငည်း 16ဒိူန် ကဲစီဒေဲႈတာင်ႎီရ်ဘိုး ကဒါႇဂိုဒေါင်နီန် 120ကပျာဝ်း။ ကဲက္လာင်းဟာဝ်းဘိုး တဂိုဒေါင်ရကာဝ်ဒီန်ဒါႈ ငေါႈဟြာင်းငေါႈပ္လေႈရကာဝ်နီန်လိူည် ကံပ်အာဝ်နံပ်မိုႈတ လိုမှာန်းတအဆေ။ ခည်ဒေဲႈတိူဝ်ႈကဲတရကာဝ်ဒီန် အ်ုန်တောပ်ဘိုး အီရံပ်ဇီုင်းကပ္လိူင်ပ ထွေအုပ်ကဲ”
အ်ုန်ဆီုပ်ဒါႈဘိုး ဆာ်မိုႈကတံမ်အျံရ်၊ အိုမ်ပျြံင်ဟာပ်ကာည်း ခဝ်ႇဆောည်ကဲနီန် ညှံမ်မိူဝ်ႈစိအီဒေဲႈလာည်းႎီရ် ရကာဝ်မာ် နံင်မိုႈကဲအာဝ်ဒဲႈငေါႈ စီပဲန်ကညာဆဴင်ရကာဝ်ကဲနီန် ဒေဲႈတိူဝ်ႈႎီရ်ဘိုးအောႏ။
“ဂေါႇမိုႈကဲဒါႈနံင်လှူ ကဲစီဆူည်ႇအီးဒေဲႈတိုန်း ပလူမ်ထုင်မှိူမ်ကာည်း ဘေဲႇဘာန်းနီန်။ ဆငည်း 16ဒိူန် ကညာဆဴင်ရကာဝ်ကဲ ဟည်ဒေဲႈတိူဝ်ႈႎီရ်ဘိုး။ ဆီုင်ခည်ဆငည်း ဒေဲႈတိုန်းကဲ ကဲတံမ်းအူန်းအေ့ဒါႈ မည်နဲတ်ဒါဆဲ့ ရကာဝ်ကဲနီန်”
ဂေါႇပ္လေါည်ကတီုက်ကပဴင် ခနားတံပ်ကညာအာဏာဆီုက်ဇေဝ်ကဲကာည်း တံပ်ဆီုက်တအာင်း – TNLA ကဲ ပလှံင်မာဝ်းႎံင်း စီပဲန်တိုအီးခေဲင်အရာပ်ကဲ ဟည်ဒဝ်ႎဲႈဒိုႇဖေးနာန်း ဒေဲႈဂေါင်ခေဲင်ကီုင်းလာဆေဝ်နီန် ပေန်ဟြဲင်အီးအောႏ။
အူကဒါႇမာ် ဂီုည်မိူဝ်ႈအူန်းဘည်က္လာင်းဒါႈအီးတ တံပ်ကညာအာဏာဆီုက်ဇေဝ်ကဲ နံင်ဆမာဆူည်ႇအူန်း ကဲအီဒဝ်ႎဲႈဖေးနာန်းကဲနီန် ဟံပ်စာ့်ကာ့်တ ပ္လေါည်ရံရ်ႈက်ုရ်ရံရ် ပ်ုန်နံင်ရေဲန်ဟာဝ်းကဲဒီန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
