မာည်းရူပ၊ ကျံရ်အောဂ်ုတ် ဆငည်း 5၊ မူစယ်
တံပ်ကညာအာဏာဆီုက်ဇေဝ်ကဲ ပ္လိူရ်ႈလေႈခည်ကျံရ်အောဂ်ုတ် ဆငည်း 3 ဒိူန်ဒါႈ ပအရာပ်ဘိူန်းကဲတထိင်ခြဲ ခေဲင်ကီုင်းမူစယ်နီန် ကဲအခ္လါည်းဒဲႈ တိုအီးခယ် ကဲအီရေဲန်ဇီုင်းကာန်ကျားဖြန်နီန် 256 အီးအောႏ။
ကဲဒါႈ ကဲဇူႈဒါကျံရ်ဇူန်လည် ဆငည်း 28 ရောတ် ဆငည်း 30 နီန် တိုည်းဟာဝ်းကဲအီရေန်ဇီုင်းကာန်ကျားဖြန်ခေဲင်လှံင်မူစယ် ဘံန်ရောတ် ဇူန်လည် ဆငည်း 31 နီန်စီ ခ္လါည်းအာပ်ဒဲႈလာ်တ ခယ်ကဲအောႏ။
တောပ်ခေဲင်ပ္လါႇဘေဲႇပ်ုန်ပ္လိူရ်ႈလေႈကဲ ဂါင်ဒီဂေါည်ကဲ 15 ကြောင်၊ ကာမ်ပျူတာ 30 ပိုင်း ကာည်း တောပ်ပည်ႎှုင်ကဲ ဂြိုကဲဟံရ်မာ် ကဲဘိူန်းဒေဆီမ်းဟာဝ်းအောႏ။
တိုအီးအရာပ်မူစယ် ကောန်အီမာည်းအူအီး က္လာင်းတဖုင်ဆျှိုည်ဖီမျေဒါႈ တံပ်ကညာအာဏာဆီုက်ဇေဝ်ကဲ တောပ်လိူည်ဒေတိုည်းဟာဝ်း တိုအီး အီရေဲန်ဇီုင်းကာန်ကျားဖြန် ကဲအီအာဝ်ဒဲႈရူရ်ႈတကဲ ကဇေန်နီး ခေဲင်ကီုင်းမူစယ် ကဲအီရေဲန်ဇီုင်းကာန်ကျားဖြန်နီန် အ်ုန်ဂီုည်မိူဝ်ႈဂီုန်းအူန်းအောႏ။
အ်ုန်ဒါႈ “ ခိင်လီပ်တိုည်းဟာဝ်းကဲတ ကျားဖြန်ကဲအီအာဝ်ဒဲႈရူရ်ႈနီန် ကဲစီဆူည်ႇ ကဲအီဒဲႈရူရ်ႈတကဲရလှဲဝ်။ ကဇေန်နီး ပမူစယ် ကဲအီရေဲန်ဇီုင်းကာန် ကျားဖြန်ကဲနီန် အ်ုန်ဂီုည်မိူဝ်ႈအူန်းဘိုး ”
ဖုင်ယဲဆျှိုည်ဖီမျေ တခေါရ်နံပ် ခေဲင်ယုင်ကျဖြန့် အ်ုန်အီဂေါည်ပမူစယ်နီန် တိုအီးခယ် ကဲအီကတူႈယံင်းမာ်မိူဝ်ႈ ဆဲႈဒီန် ကဲအီအာဝ်ဘယ်ဒေခ္လဝ်းရိူန်းကဲနီန်မာ် မိူ၀်ႈအေ့ဘည်ကတူႈကဲတအီငါ်ႈအောႏ။
ခည်ကျံရ်ဇူန် ဆငည်း 16 ဒိူန်မာ် တံပ်ကညာအာဏာဆီုက်ဇေဝ်ကဲ ပ္လိူရ်ႈလေႈဒါႈ ခိင်လီပ်ယာ်ႈဟာဝ်းကဲတ ယုင်ကျားဖြန်အ်ုန်အီဂေါည် ခေဲင်ဇံင်စွမ်စော် ကာည်း ကောင်းမူတုန်နီန် ကဲဘိူန်းဒေတိုည်းဟာဝ်း တိုအီးခယ်အီရေဲန်ကျားဖြန်ကဲ 41 အီး တိုအီးဘြာန်ကဲ 97 အီးအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
