မာည်းရူပ၊ ကျံရ်ဇူန်လည် ဆငည်း 29၊ နော်င်ခေဝ်
ကဲအီဂေါည်ခေဲင်ပ္လေါည်ကတီုက်ကပဴင်ကဲနီန် က္လာင်းတဆျှိုည်ဖီမျေဒါႈ ဘံန်ဟောည်ႇထိင်ခြဲ တံပ်ကညာအာဏာဆီုက်ဇေဝ်ကဲတ ကီုင်းနော်င်ခေဝ်နီန် ကဲဟည်ထိုးလီပ်ဖါ်ႈကဒါႇရဝ် အီဂေါည်တောပ်ဒေင် နော်င်ခေဝ်ကာည်း မိုဂူႈ ကဇေန်နီး တံပ်ကညာအာဏာဆီုက်ဇေဝ်ကဲ ဟည်ႎီရ်ဘိူန်းဒေထိင်ခြဲ ရဝ်သုံးဆယ်နီန်ယာ့်အောႏ။
တံပ်ကညာအာဏာဆီုက်ဇေဝ်ကဲ ထိုးလီပ်ဖါ်ႈ ကဒါႇဒေင်ကကာႈအုမ္မတီး ခေဲင်နှားကဲနီန် ကဲဟည်ဘယ်ဖါ်ႈဒေ ႎီရ်ထိင်ခြဲရဝ်သုံးဆယ် အ်ုန်အီဂေါည်တေဲင်ဒေင် နော်င်ခေဝ်ကာည်း မိုဂူႈ ရီမ်းပြောရဝ်သုံးဆယ်ဒီန်မာ် ဆီုင်ဒါ့်ဆီုပ်ပဲန် ပ္လေါည်ကတီုက်ကပဴင်အောႏ။
ကဝ်အီဂေါည်ခေဲင်ပ္လေါည်ကတီုက်ကပဴင်နီန်အူအီး က္လာင်းတဆျှိုည်ဖီမျေဒါႈ “ကဒါႇတံပ်ကညာအာဏာဆီုက်ဇေဝ်ကဲ ႎီရ်ထိုးလီပ်။ တံပ်ကညာအာဏာဆီုက်ဇေဝ်ကဲ ထိုးလီပ်ပွံတ် ဘံင်သံဘို၊ ကဒါႇဟိုနော်င်။ ဒါဘိုးယာန်ပ်ုရ် ဒေဲႈပျောႈပ္လေ”
ဆာ်မိုႈကဒါႇ TNLA ကဲ ပ္လိူရ်ႈလေႈ ခည်ကျံရ်ဇူန်လည် ဆငည်း 27ဒိူန်ဒါႈ တံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ဒေဲႈပျောႈဖါ်ႈ ပ္လေပရဝ်ဟိုခို လှံင်နော်င်ခေဝ် ခည်ကျံရ်ဇူန်လည် ဆငည်း 26ဒိူန် တိုအီးရဝ်ကဲ ဟည်ဘာတ်ဟာဝ်း 3အီးအောႏ။
ကီုင်းနော်င်ခေဝ် အ်ုန်အီမိုႈပ်ုန်ထိင်ခြဲအူန်း TNLA ကဲကာည်း တံပ်ကပိုမ်ကဲနီန် လှေင်ဘြည် 1ဆန်ုမ်လှိူဝ်း ကဲဟည်ဘ်ုပ်ပ္လေႈႎီရ် တတည်းတံပ်ကညာအာဏာဆီုက်ဇေဝ်ကဲ ခည်ကျံရ်ဇူန်လည် ဆငည်း 16ဒိူန်အောႏ။
ဘံန်ဟောည်ႇထိင်ခြဲ တံပ်ကညာအာဏာဆီုက်ဇေဝ်ကဲတ ကီုင်းနော်င်ခေဝ်နီန် ဂီုည်ယိူဝ်းကဲပ္လိူရ်ႈ ပြံတ်ဝါဒ ဒါမိုႈကဲဟည်ရေဲန် ဇီုင်းကာန်လံပ်ႎီရ်ပျိူဝ်ႇယိူဝ်ႇ ခေဲင်ကီုင်းနော်င်ခေဝ်နီန် တောပ်ပည် လံပ်ဘြောင်ချှာင်၊ လံပ်ခေါခါႇကာည်း လံပ်ပိင်ငျာ ကဲဂဲနီန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
