မာည်းဖိူမ်ဆငဲ၊ ကျံရ်အံက်တိုဘာ ဆငည်း 12၊ မာဝ်းႎံင်း
ဖုင်ယဲဆျှိုည်ဖီမျေ တခေါရ်နံပ် မိုႈတ တံပ်ကညာအာဏာဆီုက်ဇေဝ်ကဲ ပျောႈဟာဝ်းဖါ်ႈပ္လေဘျုင် ပရဝ်ကဒေါဆံင်း အ်ုန်အီဂေါည်ခေဲင်လှံင်မာဝ်းႎံင်းနီန် ကဲဒါႈပ္လေဒီန် ဇောႈကဒူႈဟာဝ်း ရီမ်းတံပ် တံပ်ဆီုက်ဆျှံမ် – SSPP ကဲအောႏ။
အ်ုန်ပဲန်ဟာဝ်း ခည်ကျံရ်အံက်တိုဘာ ဆငည်း 11 ခိင်ဆံန်ကပံတ် 1နြီလေႈအူကဒည်ဒိူန် ကဒါႇတံပ်ကညာအာဏာဆီုက်ဇေဝ်ကဲ ပျောႈဟာဝ်း ထာင်နံင်မိုႈ ပ္လေဘျုင် ပေါင် 250နီန် 2ပိုင်းအောႏ။
တိုအီးကဲအီခေဲင်အရာပ်ဒီဒီန်နီန်အူအီး က္လာင်းတဆျှိုည်ဖီမျေဒါႈ ဂေါႇပ်ုန်ပျောႈဟာဝ်းကဲဒီန် နံင်ဆမာလအေ့ ကဒါႇ တံပ်ဆီုက်ဆျှံမ် – SSPP ကဲအောႏ။
“ကဲပျောႈဟာဝ်း ပခနားငေါ့လွယ်ရင်ကာည်း ကဒေါဆံင်း အ်ုန်အီမိုႈဂေါင်ဂေါည် SSPP ကဲဒီန်ယာ့်။ ဆာ်မိူဝ်ႈဒေဲႈ ဘည်တိူဝ်လကဲနီန်မာ် နံင်တိူဝ်လိူည် SSPP ကဲယာ့်။ ဆာ်မိူဝ်ႈဒီကော် ဆာ်အာဝ်မိူဝ်ႈမာ် မိုႈအာဝ်မိူဝ်ႈ”
ရဝ်ကဒေါဆံင်းနီန် အ်ုန်ဂေါည်ဖါ်ႈ တေဲင်ကီုင်းကုင်ငှေါ ပရဝ်ကဲဒီန် ဘည်မိူဝ်ႈတံပ် SSPP တံပ် TNLA ကဲမာ် ဟာဝ်းႎီရ်ဖါ်ႈ ဂေါႇဘည်ဒီန် စီပဲန် တံပ်ကညာအာဏာဆီုက်ဇေဝ်ကဲ ပျောႈဟာဝ်းပ္လေဘျုင်အောႏ။
ညှံမ်မိူဝ်ႈစိ ဘည်ရိူရ်ႈလေႈ SSPP ကဲ တပ္လါႇဘေဲႇ တောပ်အီကဆီုဝ်ကဆဲင် တဘည်ပျောႈကဲတပ္လေဘျုင်ဒီန်အောႏ။
တံပ်ကညာအာဏာဆီုက်ဇေဝ်ကဲနီန် ကဲတောပ်ဒေ ပျောႈဟာဝ်းဖါ်ႈ ပ္လေဘျုင်ပအရာပ်ထိင်ခြဲအူန်း TNLA ကဲခည်ဂီုန်း ဂေါႇဘျုင်ပ်ုန်ပျောႈကဲဒီန် တိုအီးရဝ်ကဲ ဟည်ယံမ်းဟာဝ်း 31အီးယာ့်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
