မာည်းရူပ၊ ကျံရ်မေ ဆငည်း 19၊ နောင်ခေဝ်
အ်ုန်အီမိုႈဒီပဲန် တံပ်ကညာအာဏာဆီုက်ဇေဝ်ကဲ ကာည်း တံပ်ဆီုက်တအာင်း TNLA ကဲတ ပ္လေါည်ကတီုက်ကပဴင် ပလှံင်နောင်ခေဝ် ရဝ်အုမ္မတီးနီန် အ်ုန်အီမိုႈကညာစနိုက်ဘာ ကညာအာဏာဆီုက်ဇေဝ်ကဲ ပဴင်ယံမ်းဟာဝ်း တိုအီးအီႎဲႈဆီုက်ႎဲႈနာန်းကဲ အူအီးအောႏ။
တံပ်ဆီုက်တအာင်းကဲ ပ္လိူရ်ႈလေႈ အဒိူဝ် ကျံရ်မေ ဆငည်း 19 နီန်ကဲဒါႈ အမှိူဝ် ကျံရ်မေ ဆငည်း 18 ခီညှာ ကပံတ် 8 နြီဒိူန် အ်ုန်အီမိုႈ ကညာစနိုက်ဘာ ကညာအာဏာဆီုက်ဇေဝ်ကဲ လှံမ်ဒေတီုက်ဟာဝ်း ဦးအိုက်လှိုင် ဘိူန်းအဆာက် 27 ဆန်ုမ် အ်ုန်အီဂေါည် ပရဝ်အုမ္မတီး ဒီႎဲႈဆီုက်ႎဲႈနာန်းကဲအောႏ။
ကဝ်အီဂေါည်ခေဲင်ပ္လေါည်ကတီုက်ကပဴင်နီန် အူအီးက္လာင်းတဖုင်ယဲဆျှိုည်ဖီမျေဒါႈ ခေဲင်နှားနီန် ဒီပဲန်တံပ်ကညာအာဏာဆီုက်ဇေဝ်ကဲ ကာည်း TNLA ကဲတပ္လေါည်ကတီုက်ကပဴင် ပရဝ်အုမ္မတီး၊ တောင်းခမ်း ကာည်း ပရဝ်နောင်လင်နီန် ဘိူည်အာဝ်ပဲန်ပ္လေါည်ကတီုက်ကပဴင်မာ် ကညာအာဏာဆီုက်ဇေဝ်ကဲ ဂီုည်ဒါဒရူန်းကာည်း ပ္လေလာက်နာက်ဒါင်းပဴင်အောႏ။
“နှားနီန် ပ္လေါည်ကတီုက်ကပဴင်ကဲနီန် အ်ုန်ယေန်အူန်း။ ခည် ဆငည်း 17 ဒိူန်ဒီႈ ကဲဇူႈဒါကဒါႇဘန့်ဘွေး ပဴင်ဟာဝ်းပ္လေဒါင်း ကဒါႇရဝ်တောင်ကျ။ 3 အီးကတူႈဖေးဘာတ်”
ခည်ကျံရ်မေ ဆငည်း 14 ဒိူန်မာ် ကဲဒါယာန်ပ်ုရ်ဒေဲႈပျောႈဟာဝ်းပ္လေ ပထိင်ခြဲတံပ်ဆီုက်တအာင်း TNLA ကဲ ပလှံင်နောင်ခေဝ် ရဝ်သုံးဆယ်နီန် ကူန်ရဝ်မာဂါင်ကဲ 5 အီးတူႈဖေးဘာတ်ဟာဝ်းအောႏ။
ဘံန်လှဲဝ်ႏဟာဝ်း ပါင်ကမိုန်ကဲပကုင်ခယ် ကီုင်းကူမင်းနီန် ကညာအာဏာဆီုက်ဇေဝ်ကဲ ဒေဲႈပျောႈဟာဝ်းဘျုင် ပမာဝ်းႎံင်း၊ ရူကော၊ မိုဂူႈ ကာည်း ကုင်ငှေါ ဒီထိင်ခြဲ TNLA ကဲအောႏ။
TNLA ကဲဒါႈ ကဆီုဝ်ကူန်ရဝ်မာဂါင်ကဲ လိုအေ့မိူဝ်ႈအူန်းဆဒိ ကနာည်းလံပ်ဆီုက်နီန် ဂေါႇမိုႈ ကညာအာဏာဆီုက်ဇေဝ်ကဲ ဘိူည်ဇံင်းဒါ့်ဘည်ကတီုက်ကပဴင်နီန် ရောတ်ကျံရ်ဒိုည်ႇမေမာ် ကဲဂီုည်ဒါဒရူန်း ကာည်း ပ္လေလာက်နာက်ဒါင်း ဒါဘိုးယာန်ပ်ုရ်ပျောႈဟာဝ်းပ္လေ ပအရာပ်ထိင်ခြဲတံပ်ဆီုက်တအာင်း TNLA ကဲအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
