နော်ဂျား၊ ကျံရ်ဇူန် ဆငည်း 15၊ မူစယ်
ဘိူန်းအယ်တခေါရ်နံပ် ခိင် မကဖ (5) ၊ CUSTOM၊ SB၊ CID ကာည်း ပလိက်ခေဲင်အရာပ်ကဲ ဟြီုက်စေတ်မေန်း တကားဘအူကြောင် အ်ုန်အီနံင်လီပ်ခေဲင်ကုင်ခယ်နီန် ပဂေက်ဆင်ဖြူ အ်ုန်အီမိုႈဂေက်လီပ်လေႈ ကုင်ခယ်ကာည်း ကုင်ကပိုမ်ဘြာန် အာရ်ကုင်နီန် စီဘိူန်းဒေတိုည်း မာဝ်းငျံရ် အီဂေါည် 300 ကီလိုနီန်အောႏ။
ဘိူန်းအယ်နံပ်တ ပလိက်ကဲအီနံပ်ဘည်မိုႈဘည်ဘာည်းကဲဒါႈ ဖုင်ကပိုမ်ကဲနီန် ကဲလီပ်စေတ်ဖါ်ႈ ခည်ကျံရ်ဇူန် ဆငည်း 10ဒိူန် ခေဲင်မာဝ်းငျံရ် 300 ကီလို ပ်ုန်ဘိူန်းကဲတတိုည်းဒီန် ကဲဟြာင်းအာပ်လိူည် ရကႎိုည် (နိုင်ငံတော်) 50 ကီလို 250 ကီလို ပ်ုန်ကီုတ်ဒီန် ကဲစီလည်ကကာႈကဆာင်း ခနားကဲအောႏ။
ခေဲင်ကညာကဲ (5) အီးနီန် အူအီးက္လာင်းဒါႈ ကဇေန်နီး ကဲဒါႈနံင်ပ္လေႈႎီရ် ကားတာင်မာဝ်းဒီန်ကာည်း ကညာကောႈကားဒီန် ကဲနံင်ႎိူဝ်ႈအမှု ဒါႈမိုႈအာဝ်မိူဝ်ႈကညာ၊ ကဲကမိုန်ဘိုး ကနာည်နှာင်းဘိမိုည်ႇ ကဆီုဝ်နံင်ဟြာင်းကဲ တလူမ်ဘ္လံက်ချှာင်တြား ဒါႈလိူည်မိုႈ 50 ကီလိုနီန်အောႏ။
“ခေဲင် 300 ကီလို ပ်ုန်ဘိူန်းတိုည်းဒီန် ဂြိုအောတောပ် 100ကီလိုလေႈ။ အီနီန် ကဲဒါႈနံင်ပ္လေႈႎီရ် ကညာကောႈကားကာည်း ကား။ ကဲက္လာင်းဒါႈ ဆာ်မိုႈဂြို နံင်အာဝ်ဘိူန်းစိ။ ဆာ်ဒါႈနံင်လီပ်ခေဲင်ကုင်ခယ် ဂီုည်ဒဲႈအူန်း ထာန်ပ္လ ဖုင်ကပိုမ်ကဲဒီန်။ ဘည်မိုႈအ်ုန် ဟည်ခ္လေါႈဟောည်ႇ ဂေက်ဘြာန် ကဒါႇခယ်ကဲ ႎီရ်ဆူည်ႇဘိုးႎီရ်ရဘံန်း။ ဘံန်ကပံတ်ႎီရ် ဖုင်ကပိုမ်ကဲဒီန် အာဝ်ဘိူန်းယာ့်အာဝ်တိုည်း”
ဘိူန်းအယ်နံပ် မိုႈတ ဖုင်ကပိုမ်ကဲအီဂေါည် ပဂေက်ဆင်ဖြူကဲနီန် ဘည်တိုည်းမှာန်းမှာန်းဂီုန်းရိူန်း တကဲအီတာင်ဒေဲႈ မာဝ်းငျံရ်၊ ဂြိုခြီုင်ချှဲန်၊ ဂြိုခြီုင်ဂါင်၊ ဆနံမ်ကာည်း အီမိူဝ်ႈငေါႈခံန်ကဲနီန် ဆာ်အာဝ်ဘယ်ဒဲႈ ရိူန်းထာန်မှာန်းကဲမာ် ကဲဆီမ်းအူန်းပွံတ် ဂြို တိုည်းအူန်းပွံတ်တိုအီးဂဲကဲနီန်အောႏ။
ကညာကားအူအီး က္လာင်းဒါႈ “ယဲမိုႈကညာကား အီအာမခါမ်အူန်း တာင်တိုန်းဂြိုကဲဒီန်ယာ့်။ ကညာဂြိုကဲ ဘိူည်ဟောည်ႇဒဲႈအူန်းရိူန်း ထာန်ပ္လအူန်းဖုင်ကပိုမ်ကဲဒီန်မာ် ကဲဆိင်တိုည်းခိင်မှော ကဲတိုည်းမှာန်းပွံတ်ရိူန်း။ ဂေါႇထာန်မှာန်းကဲဂီုန်း ဆာ်ကညာဂြိုကဲနီန် အာဝ်ဘယ်ဒေဒဲႈမာ် ကဲဟည်တိုည်းအူန်း စွဲလိူည်တြားတယဲ ကညာကား။ ကဲဘိူည်ပ္လေႈတိုအီး တိုည်းအူန်းဂြိုကဲဒီန်မာ် မိုႈလိူည်ယဲ ဘ်ုပ်ႎီရ်ႎျံတ်။ ဂေါႇဘည်ဒီန် ရေဲန်လိူည်အယ်ဟောမ်မာ် အာဝ်ဘာည်းဒါႈ”
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
