မာည်းရူပ၊ ကျံရ်ဇူန် ဆငည်း 9၊ မာဝ်းႎံင်း
ကဝ်အီကဇောည်ဒဲႈ တတိုအီးဒဝ်ႎဲႈဖေးနာန်းနီန်အူအီး က္လာင်းတဆျှိုည်ဖီမျေဒါႈ ဂေါႇပ္လေါည်ကတီုက်ကပဴင် ရီမ်းကီုင်းနော်င်ခေဝ် ကပီုန်ဆျှံမ်ကဒါႇပိူည် တိုအီးရဝ် ကဲအီဒဝ်ႎဲႈဖေးနာန်း ကဒါႇမာဝ်းႎံင်း 700 အီးကဲနီန် လိုကနဲတ်ကမှည် ပ်ုန်ကဇောည်အောႏ။
ခေဲင်ကဲအီဒဝ်ႎဲႈဖေးနာန်း ကဒါႇမာဝ်းႎံင်းကဲနီန် ကဲဂေါည်ဖါ်ႈ ပကျောင်စဝ် အဝေရဝါသ 40အီး၊ ပကျောင်ပနောဘေဲႇပရိယတ္တိနီန် 30အီးကာည်း ပရဝ်နော်င်ပိင်ဒါင်း ၆၂၅အီး ဂဲကဲနီန် ဟည်လိုကနဲတ်ကမှည် ပ်ုန်ဟောမ်ပ်ုန်ဟာပ်ကာည်း ဂြိုခြီုင်ပ်ုန်ဒါအောႏ။
ကဝ်အီကဇောည်ဒဲႈ တတိုအီးဒဝ်ႎဲႈဖေးနာန်းနီန်အူအီး က္လာင်းတဆျှိုည်ဖီမျေဒါႈ “တံင်ဒါင်းပ်ုန်လိုကဲမိုႈ တဝ်ခေါႈကဲနီန်ကော်။ ဆာ်မိုႈတဝ်လှာ မိူဝ်ႈအေ့ဘည်ဒေဲႈလှူ တိုအီးခေဲင်ရဝ်ကဲ။ ကဲဟောမ်လိူည် အီမိူဝ်ႈအူန်း ပကျောင်စဝ်”
စြာင်းကဲနီန် အ်ုန်မိုႈဖါ်ႈ ကဲအီႎဲႈဖေးနာန်း ဒေဲႈဂေါည်ပကျောင်စဝ်ကာည်း ပကျောင်ပနောဘေဲႇနော်င်ပိင်ဒါင်းကဲ အ်ုန်ကီုတ်ဘိုးကဲအီႎဲႈ ဒေဲႈဂေါည်ပဂါင်ခြိူဝ်းမျိုးကဲ ဘည်ဒီႈဆွံန် ကဲအီဒဝ်ႎဲႈဖေးနာန်းကဲနီန် နံင်ဆမားဂီုန်းဒေဲႈအေ့အောႏ။
ဂေါႇမိုႈတံပ်ကညာအဏာဆီုက်ဇေဝ်ကဲ ႎီရ်တီုက်လီပ် ကနာည်နံင်ႎီရ်ဘိူန်း ကီုင်းနော်င်ခေဝ် အ်ုန်အီမိုႈဒီ ပ်ုန်ထိင်ခြဲအူန်း တံပ်ဆီုက်တအာင်းကဲနီန် စီပဲန်တိုအီးခေဲင်အရာပ် ကဲအီဂေါည်ရီမ်းကီုင်းကာည်း တိုအီးကဲအီဂေါည်ခေဲင်ကီုင်းနော်င်ခေဝ်ကဲနီန် ဘ်ုပ်ဒဝ်ႎဲႈဟာဝ်းအောႏ။
ဘိူန်းအယ်နံပ် မိုႈတပ္လေါည်ကတီုက်ကပဴင် ခနားတံပ်ကညာအာဏာဆီုက်ဇေဝ်ကဲကာည်း တံပ်ဆီုက်တအာင်းကဲ ပရဝ်ကံကြီးနီန် ဂီုည်ဒါ့်ဆီုပ်ပဲန်ဟာဝ်း ဘံင်ကျံရ်ဇူန် ဆငည်း 9နီန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
