မာည်းဖိူမ်ဆငဲ၊ ကျံရ်နိုႎဲမ်ဘာ ဆငည်း 6၊ အိုမ်ငျံရ်
ဘိူန်းအယ်နံပ်တ တိုအီးခေဲင်အရာပ်ကဲဒါႈ အီရံပ်ဇီုင်းကပ္လိူင်ကဲ ဘိူည်ဘြဲဆားဒေင် ခနားအိုမ်ငျံရ်ကာည်း လာဆေဝ် အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်း – PSLF/TNLA ကဲနီန်မာ် ဂေါႇမိုႈဒေင်နီန်ဟည်ႎီရ်လူလေဲဝ်ဟာဝ်း စီပဲန်အ်ုန်ကီန်းခည်း ကနာည်တိုအီးခေဲင်အရာပ် ကဲအီဟာဝ်းႎီရ်ကဲနီန်အောႏ။
ပအိုမ်ငျံရ်နီန် ဇူႈပွံတ်ကဒည်ကျံရ် ဆဲပ်တဲမ်ဘာဒိူန် ဂေါႇမိုႈကားတာင်သတ္ထုကဲနီန် တာင်ဇံန်ဖါ်ႈ ထာန်ခါမ်ဒေင် ခနားအိုမ်ငျံရ်ကာည်း ရဝ်အီနိုင်း လှံင်လာဆေဝ် စီပဲန်ဒေင်ဟည်လူလေဲဝ်ဟာဝ်းအောႏ။
ကဝ်အီနံပ် ဘည်တာင်သတ္ထုနီန်အူအီး က္လာင်းဒါႈ “အာည်ႇနီန် ကဲတာင်ဘံင် တာန် 80ဒီးကော်။ စံမ်ဘ်ုပ်လူလေဲဝ်ယာ့်။ ကဇေန်နီး ကဲဟည်ပယောမ်လာ်ဒါ တာင်ယာ့်”
အီရံပ်ဇီုင်းကပ္လိူင်ကဲ ဘိူည်ဘြဲဆားဒေင် ခနားအိုမ်ငျံရ်ကာည်း မာန်စာမ်နီန်ဒါ ကျောက်စရဝ်၊ ဒေင်မာဝ်းကတာည်းကဲနီန်မာ် ဂေါႇမိုႈဘည်ဟာဝ်းႎီရ် ကားတာင်သတ္ထုကဲနီန်ညှံမ်ဇံင်း စီပဲန်ဒေင်ကဲဒီန် ဟည်ႎီရ်လူလေဲဝ်ဟာဝ်းဘိုးအောႏ။
တိုအီးခေဲင်အရာပ် ကဝ်အီဟာဝ်းႎီရ်တောပ်ဒေင်ဒီန်အူအီး က္လာင်းဒါႈ “ကဲဟည်ဒါမာဝ်း ႎီရ်ပနိုက်ဒဲႈဒေင် ခနားအိုမ်ငျံရ်ကာည်း မာန်စာမ်နီန်ယာ့်။ မိုႈလိူည် ဆာ်ကားဒါင်းကဲနီန် ႎီရ်ဟာဝ်း နံင်လူဟာဝ်းဘိုး။ ဆာ်မိုႈဒေင်မာန်စာမ်ကာည်း အီနိုင်းနီန် ကားဒဲႇအာဝ်ဘိူန်းယာ့်ဟာဝ်း။ ဒီတက္လိုက်ကဲဒီန် အ်ုန်လှေဲမ်ခည်း”
ဖုင်ယဲဆျှိုည်ဖီမျေ လေႈတခေါရ်တိူရ်ႈ ခေဲင်ကျံရ်အံက်တိုဘာ နှားဖိုန်ဒိူန် ကဲဘိူည်ဘြဲဆား ကစံပ်ဒေင်ခနား အိုမ်ငျံရ်ကာည်း မာန်စာမ်နီန်မာ် ဆာ်မိုႈဒေင် ယိူဝ်ႇမာန်စာမ်ဟာဝ်းကဒါႇ အိနိုင်းနီန် ညှံမ်မိူဝ်ႈစိ ဘည်ဘြဲဆားကဲတဒေင်နီန်အောႏ။
ဂေါႇမိုႈဒေင် မာန်စာမ်ကာည်း အီနိုင်းနီန် လူမောကံပ်အာဝ်ဘိူန်းႎ စီပဲန်ကညာကား အိုမ်ယ်ုရ်၊ မာန်စာမ်ကဲ ရာမ်ႎဟာဝ်းလိူည် ဒေင်အိုမ်ငျံရ် – မိူင်းယေန် – အီနိုင်းကဲနီန်အောႏ။
ကနာည်နံင်ဘိူန်းနံပ် ခူရ်က္လာည်း ဘည်ႎီရ်ဘြဲဆား ကနာည်နှာင်းတိုအီးခေဲင်အရာပ်ကဲ ဘိူန်းဒေဟာဝ်းႎီရ်ကျကျနန တောပ်ဒေင်အီလူလေဲဝ်ဟာဝ်းဒီန် ဖုင်ယဲဆျှိုည်ဖီမျေ ဆီုင်ဒါ့်တိုန်းအူန်းဘေဲႇ တလိုည်းယေအူး အ်ုန်အီမိုႈအီမိူဝ်ႈ အခွါင်းအရေးကြောႈက္လာင်း ခေဲင် PSLF/TNLA ကဲနီန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
