သူတော်စိန်၊ ကျံရ်မေ ဆငည်း 22၊ မူစယ်
ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းတဆျှိုည်ဖီမျေဒါႈ မိူဝ်ႈအေ့ ဘည်မှာန်း ကညာအပြီးကဲ တတိုအီးရေဲန်ဇီုင်း ကဲအီယိူဝ်ႇကဒါႇကီုင်းမူစယ် ကပီုန်ဆျှံမ်ကဒါႇပိူည် အ်ုန်အီမိုႈကအူရ် ကုင်ခယ်ကာည်း ကုင်ကပိုမ်ဘြာန် ဒါႈနံင်ဟာဝ်းရေဲန်ဇီုင်းပကုင်ခယ်ကဲဒိူန် ရိူန်းယူန် 3ဟြဲင် (ရိူန်းဘြာန် 18ဆဲန်) အောႏ။
အ်ုန်ဒါႈ ကောန်ကုင်ကပိုမ်ဘြာန် ကဲအီအာဝ်ဘိူန်း ပ္လါႇဘေဲႇတောႇဇီုင်းကာန်ကဲဒိူန် ကညာအပြီး ကဲအီဂေါည်ပကီုင်းမူစယ်ကဲနီန် ဂီုည်ဒါပ္လါႇဘေဲႇတောႇဇီုင်းကာန်ကျာ မှာန်းရိူန်းယူန် 3ဟြဲင် ရေဲန်ဒဲႈကောန်ကုင်ကပိုမ်ဘြာန် ကဲအီနံင်ဟာဝ်းရေဲန်ဇီုင်းကဲဒီန် လီပ်တောပ်ဒေင် အာဝ်လီပ်တြားအောႏ။
အ်ုန်ဒါႈ ကညာအပြီးကဲ ဒါဖါ်ႈပ္လါႇဘေဲႇတောႇဇီုင်းကာန်ကျာ ဒါကဘ္လျ TBP (7) ဆငည်းနီန် ခ္လံဝ်းတိုအီးကဲအီနံင်ဟာဝ်းရေဲန်ဇီုင်း ကဒါႇကုင်ခယ်ကဲဒိူန်၊ ဆာ်မိုႈရိူန်းယူန် 2ဟြဲင် ဘ်ုပ်ဒဲႈပွံတ်အူစာ်န်း ဆာ်မိုႈ 1ဟြဲင် စီဘ်ုပ်ဒဲႈလိူည် ခိင်ရောတ်စာ်မ်းခေဲင်ကုင်ခယ်အောႏ။
ကောန်အီပ်ုန် ကပီုန်ဒါင်း ဧရာဝတီ လှံင်ကျုံပျော် အ်ုန်အီရောတ်စာ်မ်း ကဒါႇကီုင်းမူစယ်နီန် အူအီး က္လာင်းဒါႈ “ဆာ်ပဲန်ဒေဲႈပျဆနာ အယ်ဘိူည်ဟာဝ်းက္လာင်းတကဲမာ် ကဲနံင်ကတူႈလိူည်အေႈ။ ပ်ုန်ကဇောည်ဆေမာ် ကဲအာဝ်ဒဲႈ။ အီဒါႈအူန်း ရိူန်းယူန် 2ဟြဲင် ပ်ုန်ဘိူန်းခ္လံဝ်း ဖုင်ကဲအီဒါ ပ္လါႇဘေဲႇတောႇဇီုင်းကာန်ကျာကဲတယဲနီန် ကဲဘ်ုပ်ဒဲႈတဖုင်စုင်ကဲနီန် အူကဒည်။ ဂေါႇမိုႈအယ်အာဝ်ဘယ်ဂေါည် ကဒါႇကီုင်းကဒါႇရဝ်အယ် စီဟိုက်ဒေဲႈကဒါႇမူစယ်နီန်ကော်။ ပလိက်ကဲ ဆံမ်အာဝ်မိူဝ်ႈလာ့် ဘည်လည်ကဇိူရ်ႈနောႈဖိူမ်နီန်။ ကဲလိူည်ကံပ်တောပ်ဘိုးဒေခ္လံဝ်း”
ဘိူန်းအယ်တခေါရ်နံပ် မိုႈတ ပဂေက်နန်းတော်ဒီန် ဘိူည်မိူဝ်ႈ ပလိက်၊ SB၊ CID ကာည်း ပလိက်ဒံန်ခြဲအီကဇိူရ်ႈကယံင်းတိုအီး ကနာည်နှာင်းပ်ုန်ဟြာည်ကမာ်ႈ အီုင်ဂ္လံတ်ရာဇဝူတ်မာ် SB၊ CID ကာည်း ပလိက်ဒံန်ခြဲအီကဇိူရ်ႈကယံင်းတိုအီးကဲဒီန် ဂီုည်ကပိုမ်ရေဲန်ဟောမ်လိူည် တောပ်ကညာအပြီး ကဲအီမိုႈတိုအီးဆမာခ္လံဝ်းကဲဒီန်အောႏ။
“တိုအီးရဝ် ဆကဴင်ကဒါႇပိူည် ရဘံန်းမြင်းခြံ ကဲအီလီပ်ဟာဝ်းခေဲင်ကုင်ခယ် 19အီးနီန် ဂေါႇမိုႈပ္လါႇဘေဲႇတောႇဇီုင်းကာန်ကဲမိုႈအီကျာ စီပဲန်ခယ်အာဝ်ရံပ်ခါမ် တိုည်းႎီရ်ဘိုးကဲကဒါႇမူစယ်။ ခိင်ဒီန် ပလိက်ကဲဂေါည်အူန်း ပဂေက်နန်းတော်။ ဂေါႇမိုႈကဲ 19အီးနီန် အာဝ်ဆမာရေဲန်ဆေ စီပဲန်ကဲဟာဝ်းက္လာင်းတပလိက်ကဲဒီန် ဆေမာ်ကဲအာဝ်ရေဲန်ဒဲႈ။ ဂေါည်အူကဇီန် ဆီုက်ရဝ်ကဲစီဒေဲႈ ဒါကားတောႇဟာဝ်းကဲ။ မောကံပ်ရောတ်ကဇေန်နီး အာဝ်ဘိူန်းမ ကဆီုပ်ကဘားတကဲ။ ႎှုင်မာ်ဘိအူန်း။ ဘံန်ဟာဝ်းက္လာင်းတ ခူန်တီုင်စေတ်မေန်းတိုအီး ပနန်းတော်ဒီန် ကဲက္လာင်းလိူည်ကနာည်နံင်ဟာဝ်းႎိူဝ်ႈအမှု ပလူမ်ပလိက်။ ယဲမာ် ဂေါႇမိုႈယဲယော ဆီုက်ရဝ်ကဲ စီပဲန်ယဲအာဝ်ယမဟာဝ်းႎိူဝ်ႈအမှုဒီန်”
ဆဲႈဒါႇဒီန် ပဂေက်နန်းတော်မာ် ဖုင်ပလိက်ကဲအီ ဒံန်ခြဲလံပ်ကဇိူရ်ႈကယံင်းတိုအီး ပမူစယ်ကဲနီန် ဂီုည်မှာန်းရိူန်း အူအီး ယူန် 100 တကောန်ကုင်ကပိုမ်ဘြာန် ကဲအီနံင်ဟာဝ်းရေဲန်ဇီုင်းကာန် တောပ်ပ္လါႇဘေဲႇတောႇဇီုင်းကာန် ကဒါႇကုင်ခယ်ကဲနီန် တောန်ဆငည်းအောႏ။
ပံပ်ရေင် BP အ်ုန်အီဘိူန်းဟာဝ်းႎီရ် ကအူရ်ကုင်ခယ်ကာည်း ကုင်ကပိုမ်ဘြာန် အာရ်ကုင်နီန် ကဲခွါင်းဒဲႈလိူည် တိုအီးကဲအီမိူဝ်ႈ စြာင်းရဟောမ်ရမာ လှံင်အေဲမ်ခြီရ်ကာည်း လှံင်မူစယ်ကဲဒိူန် ဘိူန်းရေဲန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
