မာည်းရူပ၊ ကျံရ်နိုဗဲမ်ဘာ ဆငည်း 22၊ လာဆေဝ်
ဖုင်ဆျှိုည်ဖီမျေကဲ ဘိူန်းတခေါရ်နံပ် ဂေါႇပ်ုန်ဆူည်ႇ တံပ်ကညာအာဏာဆီုက်ဇေဝ်ကဲတ က္လိုတ်ဗီရ်နီန် တံပ်ကိုကာင် ကာည်း တံပ်ကညာအာဏာဆီုက်ဇေဝ်ကဲ ပဲန်လံပ်အရေးဆီုက်ကဲဂီုည်ဘ္လောမ်အူန်း နှာရိူဝ်ႇကီုင်းလာဆေဝ်အောႏ။
တံပ်ကညာအာဏာဆီုက်ဇေဝ်ကဲ ဆူည်ႇ တံပ်ကိုကာင်ကဲ က္လိုတ်ႎီရ်တောပ်ဒေင်လာဆေဝ် – ဆဘောနီန် ဂေါႇမိုႈ တံပ်ကိုကာင်ကဲ အာဝ်ရံပ်ခါမ်ပ်ုန်ဒါႈဒီန် စီပဲန်ခနားကဲ လံပ်အရေးဆီုက်နီန်လည်ဘ္လောမ်။
အ်ုန်အီဂေါည်ပကီုင်းလာဆေဝ် ကဝ်အီဒဲႈဆဒါင်အူအီး က္လာင်းဒါႈ ခေဲင်နှားနီန် နှာရိူဝ်ႇလာဆေဝ် ပနမ့်ပေါင် ကာည်း ပရဝ်သံလွင်နီန် တံပ်ကိုကာင်ကဲဂီုည် ဟာပ်ရဲင်ဘ္လောမ်ဆီုက်ကဲအောႏ။
ကဲဒါႈ “ ဘည်ခူရ်က္လာည်းခနားတံပ် ဆကဆ ကာည်း တံပ်ကိုကာင်ကဲ အ်ုန်ဆီုင်ဂီုည်ဘ္လောမ်။ ယိူဝ်းဘိုးကဲဒါႈ ကဲနံင်ရေဲန်ဘိုး ပါင်ကမိုန်ခေဲင်နှားနီန်။ တံပ်ကိုကာင်ကဲ အာဝ်က္လိုတ်ဒဲႈစိ။ ကဲနှေရ်လိူည်နံင်ႎီရ် ကပဴင်ဘိုးနှာရိူဝ်ႇကီုင်း”
ခည်ကျံရ်နိုဗဲမ်ဘာ ဆငည်း 11 ဒိူန် တံပ်ကိုကာင် MNDAA ကဲကာည်း တံပ်ကညာအာဏာဆီုက်ဇေဝ်ကဲ လည်ယိူဝ်းဖါ်ႈပလာဆေဝ်၊ တံပ်ကိုကာင်ကဲ ဗီရ်ပ္လေႈလေႈဖါ်ႈ တိုအီးတံပ်ကညာအာဏာဆီုက်ဇေဝ် ပ်ုန်ဘိူန်းကဲတိုည်း 200 အီးနီန်စီ အာဝ်ရံပ်ခါမ်စိပ်ုန်ဆူည်ႇကဲတ ကဲက္လိုတ်ဗီရ်နီန်အောႏ။
ဘံန်ဟောည်ႇကမိုန်ကဲနီန် တံပ်ကိုကာင် MNDAA ကာည်း တံပ်ကညာအာဏာဆီုက်ဇေဝ်ကဲ ခနားဂါရ် ပဲန်ဖါ်ႈလံပ်အရေးဆီုက်နီန်လည်ဘ္လောမ် ဆဲႈဒီန် တံပ်ပည်အာရ်ကဒါႇမာ် ဘိဟာဝ်းဘိုးကပု ဆဘောနီန်အူနှားလေႈ။
ဂေါႇပ်ုန်လီပ်ကမိုန်ဒဲႈခယ်နီန် တံပ်ကညာအာဏာဆီုက်ဇေဝ်ကဲ ဗီရ်ဘိူန်းဖါ်ႈကီုင်းလာဆေဝ်နီန် ဒေင် ဆဘော – လာဆေဝ် အ်ုန်အီတောပ်အရေးနီန်မိုႈ တံပ်ကိုကာင်ကဲထိင်ခြဲအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
