လိုည်းဇူန်မိုး၊ အောဂ်ုတ် ဆငည်း 9၊ မူစယ်
ဖုင်ယဲတခေါရ်နံပ် ဒီဘိူန်းတံပ်ကညာအာဏာဆီုက်ဇေဝ်ကဲတထိင်ခြဲ ပကီုင်းမူစယ် ဖုင်အီတောပ်ဖါ်ႈဒေစိုန်အီးစီ ပျံမ်းဟာဝ်းအီးနီန် ဖုင်ဆီုက်ရဝ်ကဲ ဘိူန်းဒေတိုည်းဟာဝ်းကဲအောႏ။
ကဝ်အီနံပ် ဘည်မိုႈဘည်ဘာည်းနီန် အူအီးက္လာင်းတဖုင်ဆျှိုည်ဖီမျေဒါႈ ခည်ကျံရ်အောဂ်ုတ် ဆငည်း 1 ဒိူန် ကောန်အီမာည်း နံင်ဘိူန်းအဆာက် ကပံတ် 20 ဆန်ုမ်နီန် 3 အီး ခိင်လီပ်စိုန်ကဲတ ဟိုတယ်ဟော်မုန်း အ်ုန်အီဂေါည် တေဲင်ဒေင်မင်္ဂလာမူစယ်နီန် ဖုင်ဆီုက်ရဝ် နမ့်ခမ်းမြို့မ( 2)ကဲစီ ဘိူန်းဒေတိုည်းဟာဝ်းကဲအောႏ။
“ ကဲဘိူန်းဒေတိုည်းဟာဝ်း ဖုင်အီစိုန်ပဖြားတောင်ပေါ်ဒိူန်။ ကဲဘိူန်းတိုည်းကဲ ပဟော်တယ်ဟော်မုန်း။ ခိင်ဒါကဲတ နံင်ဒေဲ;စိုန် ခေဲင်ဟိုတယ်ဟောမုန်းဒီန်။ ကဲစီကတူႈတိုည်း။ ဘံန်ဟောည်ႇဘိူန်းကဲတတိုည်းကဲ ခိင်စေတ်မေန်းအီးတကဲ စိနံပ်လာ်ႈကဲမိုႈဖုင်စိုန် အီပျံမ်းဟာဝ်းတိုအီး ပဖြားတောင်ပေါ်နီန်။ လိူဝ်ႈအာည်ႇဒိူန် ကောန်အီပ်ုန်အ်ုန်အီကတူႈဖါ်ႈစိုန်စီယံမ်းဟာဝ်းဒိူန်မာ် မိုႈလိူည်ဖုင်ကဲအီပျံမ်းဟာဝ်း”
ခည်ကျံရ်ဇူန်လည် ဆငည်း 26 ခီညှာ 9 ဒိူန် ဖုင်စိုန်ကဲဒီန် စိုန်ဟာဝ်းကောန်အီပ်ုန် အ်ုန်အီဘိူန်းအဆာက် 40 ဆန်ုမ်နီန်အူအီး ပဖြားတောင်ပေါ်နီန် စီကိုႈယံမ်းဟာဝ်းဘိုး ကောန်အီပ်ုန်ဒီန် ဒါဘိုတ်အ်ုန်အောႏ။
ဖုင်စိုန်ကဲဒီန် ကဲဂေါည် 4 အီး ကဇေန်နီး ဖုင်ဆီုက်ရဝ်ကဲ ဘိူန်းဒေတိုည်းဟာဝ်း 3 အီး 1 အီးနီန် အ်ုန်ဆီုင်ဂီုည်ဒဝ်လောတ်။
ကောန်အီမာည်းနီန် ဆီုပ်ဒါႈဘိုး ပ်ုန်ဘိူန်းကဲတတိုည်း ကောန်အီမာည်း 3 အီးကဲဒီန် ဖုင်ဆီုက်ရဝ်ကဲ ဟည်ပဴင်ယံမ်းကဲ ခည်ကျံရ်အောဂ်ုတ် ဆငည်း 6 ဒိူန် ကဝ်အီဒဝ်လောတ်အူအီးဒိူန်မာ် ကဲဂီုည်ဆီုပ်ဟြီုက်အူန်းအ်ုန်အောႏ။
“ ခည်ဆငည်း 1 ဒိူန် ကဲဘိူန်းတိုည်း 2 အီး။ ဘံန်ရောတ်အူဆငည်း ကဲစီဘိူန်းဘိုးတိုည်းအူအီး။ အူအီးနီန် အ်ုန်ဆီုင်ဂီုည်ဒဝ်လောတ်။ ပ်ုန်ဘိူန်းကဲတတိုည်းတိုအီးကဲဒီန်မာ် ကဲဟည်ပဴင်ယံမ်း။ ဂေါႇဆေဘာည်း စီပဲန်ပဴင်ယံမ်းကဲမိုႈ ဖုင်ကဲဒီန် ဆာ်ကဲစိုန်အီး ကဲကိုႈအီး ပျံမ်းဟာဝ်းအီး။ ဂေါႇဘည်ဒီန် ဖုင်ဆီုက်ရဝ်ကဲမာ် ပဴင်ယံမ်းဟာဝ်းကဲ”
ခည်ကျံရ်ဇူန်လည် ဆငည်း 25 ခီညှာဒိူန်မာ် ပမူစယ် ခေဲင်ဇံင် ကောင်းမူလွယ်နီန် ကောန်အီမာည်း အီဘဒေဲႈ ကား 3 အီးကဲ ရံပ်တိုည်းလာည်းဟာဝ်းရိူန်း ကောန်အီပ်ုန် အီဘဒေဲႈဆဲင်ကယ်နီန်အူအီး။
ဆဲႈဒီန် ခည်ကျံရ်ဇူန်လည် ဆငည်း 24 ဒိူန်မာ် ခေဲင်ဇံင်ဟူမွန်နီန် တေဲင်ဒေင်ဒါင်း ရအာည်ႇဆဴင်ပီတိနီန် ကောန်အီမာည်း 2 အီး ကာည်း ကောန်အီပ်ုန် 2 အီး ပဲန်ဟာဝ်းလည်ကပဴင်ခနားကဲ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
