လိုည်းဇူန်မိုး၊ ကျံရ်ဆဲပ်တဲမ်ဘာ ဆငည်း 29၊ လုံဝယ်
တံပ်ဆီုက်တအာင်း TNLA ကဲ ပ္လိူရ်ႈလေႈဒါႈ ဒီပဲန်ကရဲင် ပ္လေါည်ကတီုက်ကပဴင် ခေဲင်လှံင်မာဝ်းႎံင်းနီန် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ်ပျောႈဟာဝ်းဘျုင် 30 ပိုင်း ကာည်း ဘျုင်တောပ်ကော်င် 3 ပိုင်းအောႏ။
ခည်ကျံရ်ဆဲပ်တဲမ်ဘာ ဆငည်း 28 ဒိူန် တံပ်ကညာအာဏာဆီုက်ဇေဝ်ကဲ ဘံန်ပျောႈ ဟောည်ႇကဲတဘျုင်တောပ်ကော်င် ခေဲင်ရဝ်လုံဝယ်နီန် ကဲလီပ်ဟာဝ်းဘိုး ခေဲင်ရဝ်စီ တိုက်ဟာဝ်းဘိုးဂါင်ဂေါည်အောႏ။
ဘံန်ဟောည်ႇပျောႈဟာဝ်းကဲတ ဘျုင်တောပ်ကော်င်ဒီန် ကောန်ဆီုက် TNLA ကဲ ပဲန်မံဝ်း၊ ဟိူရ်၊ ပဲန်အာဝ်ဂေါည်တခိူည်း၊ ပဲန်နူန်ူး ကာည်း ပဲန်တိုက်ဖိူမ်းချာ်န်း ကဇေန်နီး ကောန်ဆီုက်ကဲ 3 အီး ကတူႈရံပ်ခါမ် ဘည်ဆနံမ်းနီန်အောႏ။
အ်ုန်အီဂေါည်ခေဲင်ပ္လေါည်ကတီုကပဴင် ကဝ်အီဒဲႈဆဒါင်းနီန် က္လာင်းဘည်ခူရ်က္လာည်း ပ္လေါည်ကတီုက်ကပဴင်ကဇေန်နီးဒါႈ “ ကဇေန်နီး ကဲထိုးဟာဝ်းကဒါႇမိုင်းတင် အ်ုန်အီဂေါည်တောပ်ဒေင်မိုဂူႈနီန်။ တောပ်မာဝ်းႎံင်းမာ် ဟည်ကဒံပ်။ ကဲဟည်ရောတ်ရီမ်းပြော ရဝ်ခိုမုန်းနီန်”။
ဘာည်းလိူည်ဒီန် အမှိူဝ် ကျံရ်ဆဲပ်တဲမ်ဘာ ဆငည်း 29 ဘံန်ဆံန် ကပံတ် 1 နြီလေႈအိုည်ကိူရ်မနေတ်ဒိူန်မာ် တံပ်ကညာအာဏာဆီုက်ဇေဝ်ကဲ ဒါဒရုန်းပျောႈဟာဝ်းဘျုင် ခေဲင်ရဝ်ခိုမုန်း အ်ုန်အီဂေါည် ခေဲင်ကီုင်းမာဝ်းႎံင်းနီန် ဂါင်ဂေါည်ပေန်ခ္လမာ် လူလှဲဝ်ႏဟာဝ်းအောႏ။
တံပ်ကညာအာဏာဆီုက်ဇေဝ် ကဲအီထိုးဟာဝ်းကနာည်နှာင်းႎီရ်ဘိူန်း ကီုင်းမာဝ်းႎံင်းနီန် ဘံန်အမှိူဝ် ကျံရ်ဆဲပ်တဲမ်ဘာ ဆငည်း 29 ဒိူန် ကဲဟည်ရောတ် ပရဝ်ခိုမုန်း အ်ုန်အီဂေါည်ကဒံပ်တောပ်ကီုင်းမာဝ်းႎံင်းနီန် ကဒါႇတံပ်ဆီုက်တအာင်းကဲမာ် ဂီုည်ဆီုပ်တီုက်ဟာဝ်း ကနာည်နှာင်းအာဝ်ဇောႈ ကီုင်းမာဝ်းႎံင်းနီန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
