ပိုႈလဘား၊ ကျံရ်နိုႎဲမ်ဘာ ဆငည်း 16၊ မာဝ်းႎံင်း
ပကီုင်းမာဝ်းႎံင်း ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ႎီရ်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန် ကဲတိုည်းဟာဝ်းကောန်အီပ်ုန်အူအီး ဒါႈမိုႈအ်ုန်ကတူည်ႇကႎှတောပ် တံပ်ဆီုက်တအာင် TNLA ကဲအောႏ။
ကောန်အီမာည်း ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းတဆျှိုည်ဖီမျေဒါႈ ခည်ကျံရ်နိုႎဲမ်ဘာ ဆငည်း 13 ခိင်ညှာကပံတ် 11နြီဒိူန် တံပ်ကညာအာဏာဆီုက်ဇေဝ်ကဲ တိုည်းဟာဝ်းကောန်အီပ်ုန် ဘိူန်းအဆာက် ကပံတ် 50ဆန်ုမ် အ်ုန်အီဂေါည်ခေဲင်ကီုင်းမာဝ်းႎံင်း အရာပ် (3)နီန် အူအီးအောႏ။
“ဂါင်ဆီုက်မာ် အာဝ်မိုႈ။ ကဲဒေဲႈဘိဟာဝ်းဂါင် ဒါႈမိုႈကဲတိုည်းထာ့် တ TNLA ကဲ။ ကဲဒေဲႈဘိဟာဝ်းဖါ်ႈ ဂါင်ခေဲင်အရာပ်ဒီန် 4ကြောင် စီတိုည်းဟာဝ်းလာ် ကောန်အီပ်ုန်အူအီး အ်ုန်အီဂေါည်ပဒီဒီန်အောႏ။ မောကံပ်ရောတ်ကဇေန်နီး ကဲညှံမ်ပ္လေႈလေႈစိအ်ုန်”
ကောန်အီမာည်းဒီန် ဆီုပ်က္လာင်းဒါႈဘိုး ဆဲႈဒါႇဒီန် ဆာ်ကဲယိူဝ်း တဇိက်အ်ုန်အီမိုႈစနဲဆီုက်၊ လာင်ယာန်၊ ပျက္ခဒိင်၊ ထီဇီုင်းပိင်ငျာခြိူဝ်းတအာင်း၊ ရူပ်ရာင်ကဲဂဲနီန်မာ် ကဲတိုည်းဟာဝ်းဖါ်ႈ ဒါႈမိုႈအီးကဆီုဝ်ကဆဲင်တောပ် TNLA ကဲအောႏ။
ဘိူန်းအယ်နံပ် တောပ်ပ်ုန်က္လာင်း တိုအီးခေဲင်အရာပ်ကဲဒါႈ ဇူႈပွံတ်ခည်ကျံရ်နိုႎဲမ်ဘာ ဆငည်း 12ဒိူန် ပဂါင်ခြိူဝ်းမျိုးတအာင်း ပငြိမ်းချမ်းရေးကုန်း အ်ုန်အီအာဝ်မိူဝ်ႈတိုအီးဂေါည်နီန်မာ် တံပ်ကညာအာဏာဆီုက်ဇေဝ်ကဲ လီပ်ချဲဖါ်ႈ တောပ်ပည်ဂြိုခြီုင်ပ်ုန်ဒါခေဲင်ဂါင် ပရိဘောဂကဲဂဲနီန်မာ် ကဲဆီမ်းဟာဝ်းဒိုႇအောႏ။
ဘာည်းလိူည်ဒီန် ခည်ကျံရ်နိုႎဲမ်ဘာ ဆငည်း 11ဒိူန်မာ် ကဲတိုည်းဟာဝ်းဘိုး ကိုရာဂျန်း အ်ုန်အီမိုႈ ခြိူဝ်းမျိုးဂေါ်ရခါး ဂေါည်ပကကာႈဆဴင် BBB နှာရိူဝ်ႇကီုင်းမာဝ်းႎံင်းနီန် ဒါႈမိုႈအ်ုန်ကတူည်ႇကႎှတောပ် တံပ်ဆီုက်တအာင်း TNLA ကဲအောႏ။
တောပ်ဘည်စြာင်းပ်ုန်ဘိူန်းအူန်း ဖုင်ယဲဆျှိုည်ဖီမျေ တိုအီးကဲအီကတူႈတိုည်း ခေဲင်ကီုင်းမာဝ်းႎံင်း ပ်ုန်ဒါႈကဲတ ဂေါႇမိုႈကဲကတူည်ႇကႎှတောပ် TNLA ကဲနီန် ဟည်မိုႈဖါ်ႈ 5အီးအာဝ်ယောမ် ဂါင်အီကတူႈဘိကဲနီန် ဟည်မိုႈ ပေန်ကိူရ်ကြောင်ယာ့်အောႏ။
တိုအီးခေဲင်အရာပ်ကဲ က္လာင်းတဆျှိုည်ဖီမျေဒါႈ ဆဲႈဒါႇဒီန် ပကီုင်းဆဘော အ်ုန်အီမိုႈ ဒီပ်ုန်ႎီရ်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန်မာ် ကဲအီကတူႈဘိဟာဝ်းဂါင်ဂေါည်နီန် ဟည်ဂေါည်ဖါ်ႈ 40ကြောင်လေႈ တိုအီးခေဲင်ကီုင်းမံင်ခ္လမာ် ကဲဟည်တိုည်းအူန်းအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
