မာည်းရူပ၊ ကျံရ်ဇူန် ဆငည်း 5၊ လာဆေဝ်
တိုအီးခေဲင်ကီုင်းလာဆေဝ်ကဲ က္လာင်းတဆျှိုည်ဖီမျေဒါႈ ကဲဟည်ဇူႈဒေႎိူဝ်ႈဟာဝ်း ကျောင်ပနောဘေဲႇချှံန်တံင်ဇူႈ ခေဲင်ကီုင်းလာဆေဝ် ကပီုန်ဆျှံမ်ကဒါႇပိူည် အ်ုန်အီမိုႈ ဒီပ်ုန်ႎီရ်ထိင်ခြဲအူန်း တံပ်ကညာအာဏာဆီုက်ဇေဝ်ကဲ ဂေါႇမိုႈနောႈမှည် ကနာည်လံပ်ကတ်ုမ် စီပဲန်ကောန်ဒဲႇကဲအီဟိုက်ကျောင်ကဲနီန် ဟည်ဘြေ့ဒေဲႈအောႏ။
ကူန်မာကောန်ကျောင်အူအီး က္လာင်းတဆျှိုည်ဖီမျေဒါႈ တံပ်ကညာအာဏာဆီုက်ဇေဝ်ကဲ ႎိူဝ်ႈဒေဲႈဖါ်ႈ ကျောင်ပနောဘေဲႇ ခေဲင်ကီုင်းလာဆေဝ်နီန် ခည်ကျံရ်ဇူန် ဆငည်း 2ဒိူန် ဆာ်မိုႈကောန်ကျောင် ကဲအီဒေဲႈဟိုက်ကျောင်နီန် ဘြေ့မှယ်ဒိုရ်အာည်ႇနီန်အောႏ။
“ဟည်ဇူႈဒေႎိူဝ်ႈ ဆငည်းရႎါည်းဒိူန်။ အာဝ်ဂီုန်းစိ ဘာည်းအာည်ႇနီန်။ ဆာ်မိုႈ အထက – 9 အ်ုန်ဂေါည်လိူည် အူကဒည်အာည်ႇနီန်။ တံင်ဒါင်းအ်ုန်မိုႈ ဆာ်ပဲန်ဒေဲႈ ပ္လေါည်ကတီုက်ကပဴင် နောႈမှည်အူန်း ဖေးရာန်ယာန်ပ်ုရ် ဆျှောတ်တဲက်ဒုင်ကဲနီန်”
တောပ်ဘည်စြာင်း ဆန်ုမ်ပနောဘေဲႇ တံက်ကညာအာဏာဆီုက်ဇေဝ်ကဲ ခည် 2023-2024 ဒိူန် ကျောင်ခေဲင်ကီုင်းလာဆေဝ်နီန် ပါ်ဒိုႇဒိုည်ႇ ဂေါည် 240 ကျောင် ဆာ်မိုႈကဇေန်နီး တံပ်ကညာအာဏာဆီုက်ဇေဝ်ကဲ ဘယ်လိူည်ဒေႎိူဝ်ႈကျောင် ခေဲင်ကီုင်းလာဆေဝ်နီန် 40လေႈအောႏ။
ဆာ်မိုႈကျောင် 20ကျောင် အီဂေါည်နှာရိူဝ်ႇကီုင်းနီန်မိုႈ တံပ်ကိုးကာင်းကဲ ပ္လိူရ်ႈလေႈဒါႈ ကဲနံင်အွံရ်ႎိူဝ်ႈဟာဝ်းအောႏ.
ဂေါႇပ်ုန်လီပ်ကမိုန်ခယ် ဘံန်ဟောည်ႇဆဖော ကနာည်နံင်ဇံင်းဒါ့် လံပ်ကတီုက်ကပဴင် ခနား MNDAA ကာည်း တံပ်ကညာအာဏာဆီုက်ဇေဝ်ကဲနီန် တံပ်ကိုးကာင်းကဲ ဟည်ဘ်ုပ်လည်လေႈဟာဝ်းဖါ်ႈ ဒါႇကီုင်းလာဆေဝ် ခည်ကျံရ်အေပ်ြုရ် ဆငည်း 21 ဒိူန် ဟောည်ႇဒီန် တံပ်ကညာအာဏာဆီုက်ဇေဝ် ဟည်လီပ်ကပါ်ႇကပံန် လံပ်ဘြောင်ချှာင်ကဲအောႏ။
တီုင်ကပ္လိူင်လံပ်ပိင်ငျာ ကညာအာဏာဆီုက်ဇေဝ်ကဲ ပ္လိူရ်ႈလေႈဒါႈ တံပ်ကညာအာဏာဆီုက်ဇေဝ်ကဲ ဟည်ႎိူဝ်ႈဒေဲႈဖါ်ႈ ကျောင်ပနောဘေဲႇ ခေဲင်ကုင်ကပိုမ်ဘြာန်နီန် ခည်ကျံရ်ဇူန် ဆငည်း 2ဒိူန် ဆာ်မိုႈကောန်ကျောင် ကဲအီဒေဲႈအာပ်ကဲနီန် ဂေါည်တိုအီး 60ဆဲန်လှိူဝ်း (6119260) အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
