လိုည်းဇူန်မိုး၊ ကျံရ်နိုႎဲမ်ဘာ ဆငည်း 12၊ မာဝ်းႎံင်း
ဘိူန်းအယ်နံပ် ပလှံင်းမာဝ်းႎံင်း ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ႎီရ်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန် ကဲဟည်တိုည်းဟာဝ်းဘိုး ကောန်အီမာည်းအူအီး ဒါႈမိုႈအ်ုန်ကတူည်ႇကႎှတောပ် တံပ်ဆီုက်တအာင်း TNLA ကဲကာည်း တံပ်လံပ်တီုက်ႎှီုန်းကဲအောႏ။
ကောန်အီမာည်း ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းဒါႈ တံပ်ကညာအာဏာဆီုက်ဇေဝ်ကဲ တိုည်းဟာဝ်း ကိုရာဂျန်း အ်ုန်အီမိုႈခြိူဝ်းဂေါ်ရခါး ပဆဴင်ဂြိုခြီုင်ဆဲင်ကယ် အီဂေါည်ပကကာႈဒေင် ဆဴင် BBB နှာရိူဝ်ႇကီုင်းမာဝ်းႎံင်းနီန် ခည်ကျံရ်နိုႎဲမ်ဘာ ဆငည်း 11ဒိူန်အောႏ။
“မိုႈ နပတ ကဲဒေဲႈတိုည်းဟာဝ်း ဂေါ်ရခါး ပဆဴင်ဂြိုခြီုင်ဆဲင်ကယ် အီဂေါည်ပကကာႈဒေင်ဆဴင် BBB နှာရိူဝ်ႇကီုင်းနီန် ဒါႈအ်ုန်မိုႈ အီတိုန်းထာ့်”
ဘာည်းလိူည်ဒီန် ခည်ကျံရ်နိုႎဲမ်ဘာ ဆငည်း 25ဒိူန်မာ် တံပ်ကညာအာဏာဆီုက်ဇေဝ်ကဲ တိုည်းဟာဝ်းကိုပြူးကာည်း တာဘြောင်ဇံင် (1) ကီုင်းမာဝ်းႎံင်း အ်ုန်အီရံပ်လာည်းဇီုင်းကပ္လိူင် လံပ်ဘြောင်ချှာင် ခည်ထိင်ခြဲ TNLA ကဲဒိူန်အောႏ။
ဆဲႈဒါႇဒီန် ခည်ကျံရ်အံက်တိုဘာ ဆငည်း 26ဒိူန်မာ် တံပ်ကညာအာဏာဆီုက်ဇေဝ်ကဲ ဒေဲႈတိုည်းဟာဝ်း တာဘြောင်ဇံင် (6) ကဲအောႏ။
တံပ်ကညာအာဏာဆီုက်ဇေဝ်ကဲနီန် ဇူႈပွံတ် ကျံရ်အံက်တိုဘာ နှားဖိုန်ဒိူန် ကဲဟည်တောပ်ဒေ ဘိဟာဝ်းဂါင်ခေဲင်ကီုင်းမာဝ်းႎံင်းနီန် မံင်ခ္လ ဒါႈမိုႈ ကဲမိူဝ်ႈဘည်ကတူည်ႇကႎှတောပ် TNLA ကဲအောႏ။
တောပ်ဘည်စြာင်းပ်ုန်ဘိူန်းအူန်း ဖုင်ယဲဆျှိုည်ဖီမျေ ဂါင်ကဲအီကတူႈဘိဟာဝ်း ခေဲင်ကီုင်းမာဝ်းႎံင်းနီန် ဟည်မိုႈ 7ဂါင်အာဝ်ယောမ်ကာည်း ကဲအီကတူႈတိုည်းမာ် ဟည်မိုႈ 5အီးအာဝ်ယောမ်ယာ့်အောႏ။
ဘာည်းလိူည်ဒီန် ပကီုင်းဆဘော အ်ုန်အီမိုႈဒီပ်ုန်ႎီရ်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန်မာ် ကဲတိုည်းဟာဝ်းဖါ်ႈ ကောန်အီမာည်း 25အီးကာည်း ကောန်အီပ်ုန် 10အီး ဒါႈမိုႈကဲကတူည်ႇကႎှတောပ် TNLA ကဲ ႎှါင်းဆဴင်ကာည်း ဂါင်ဂေါည်မာ် ကဲဟည်ဘိဟာဝ်း 90ကြောင်လေႈယာ့်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
