မာည်းရူပ၊ ကျံရ်နိုႎဲမ်ဘာ ဆငည်း 25၊ လာဆေဝ်
တိုအီးခေဲင်အရာပ်ကဲ က္လာင်းတဆျှိုည်ဖီမျေဒါႈ ပ်ုန်လေႈဒေဲႈဆဒါင် ဒါႈမိုႈ တံပ်ကိုးကာင် MNDAA ကဲ က္လိုတ်ႎီရ်နီန် လံပ်ဘြောင်ချှာင် တံပ်ကိုးကာင်း ကဲအီဂေါည်နှာရိူဝ်ႇကီုင်းလာဆေဝ်ကဲနီန် ဆီုင်ဂီုည်ကပါ်ႇကပံန်အူန်း အာဝ်မိူဝ်ႈစိ ဘည်က္လိုတ်ႎီရ်ကဲအောႏ။
ကောန်အီမာည်း ကဝ်အီဂေါည်ခေဲင်အရာပ်လာဆေဝ်နီန်အူအီး က္လာင်းဒါႈ ဇီုင်းကာန်လံပ်ဘြောင်ချှာင် MNDAA ကဲ ဂီုည်ကပါ်ႇကပံန်ဆေဖါ်ႈ ပရဝ်ဟိုယ၊ နမ့်ပေါင်၊ မယ်ဟန်ကာည်း နောင်မွန် လှံင်လာဆေဝ်ကဲနီန် ရူရ်ႈဆဴင်မာ် ကဲဟည်ႎီရ်ကဲပ်ဘိုးအောႏ။
အ်ုန်ဒါႈ “မောကံပ်ရောတ်ကဇေန်နီး ညှံမ်မိူဝ်ႈစိ ဘည်က္လိုတ်ႎီရ်ကဲ။ ကဲကံပ်ရဲန်ဘိုး ကနာည်နံင်ႎီရ်ကဲပ်ရူရ်ႈဆဴင်။ ဆာ်မိုႈ ထာန်ယိူဝ်းအယ်တငါဝ်း တံပ်ကိုးကာင်းကဲ နံင်အာဝ်က္လိုတ်စိ။ ႎါးအောမာ် ယံင်းဆဴင်ပက္လာႈ နမ့်ပေါင်”
တံပ်ကိုးကာင်းကာည်း တံပ်ကညာအာဏာဆီုက်ဇေဝ်ကဲ လည်ကတူႈကငျားဖါ်ႈ ပကီုင်းလာဆေဝ် ခည်ကျံရ်နိုႎဲမ်ဘာ ဆငည်း 11ဒိူန် ယိူဝ်ႇတတံပ်ကညာအာဏာဆီုက်ဇေဝ်ကဲ ဆူည်ႇတံပ်ကိုးကာင်းကဲ က္လိုတ်ႎီရ်ရဘံန်း ဘံန်မိုႈကဒါႇကိုးကာင်းကဲ အာဝ်ရံပ်ခါမ် စီပဲန်ကဲပ္လေႈႎီရ်လိူည် ဆီုက်တံပ်ကညာအာဏာဆီုက်ဇေဝ် ပ်ုန်ဘိူန်းကဲတတိုည်းအူန်း 200အီးဒိူန်အောႏ။
ဂေါႇတံပ်ကညာအာဏာဆီုက်ဇေဝ်ကဲ ဆူည်ႇကဲက္လိုတ်ႎီရ်ဒီန် စီပဲန် လံပ်အရေးဆီုက် ခနားတံပ်ကိုးကာင်းကာည်း တံပ်ကညာအာဏာဆီုက်ဇေဝ်ကဲ လည်ခြဲင်ႏဖါ်ႈနှာရိူဝ်ႇကီုင်းလာဆေဝ် ကပုဆဘောမာ် ကဲလည်ဘိအူန်းဖါ်ႈ မောကံပ်ရောတ်ကျံရ်နိုႎဲမ်ဘာ ဆငည်း 24 ညှံမ်မိူဝ်ႈစိ ဘည်ႎီရ်ႎိူဝ်ႈဒဲႈကဲအောႏ။
ဆာ်မိုႈအီကဆီုဝ်ကဆဲင်တောပ် ခူရ်က္လာည်း နှာရိူဝ်ႇကီုင်းလာဆေဝ်ဒီန် ညှံမ်မိူဝ်ႈစိ ဘည်ရိူရ်ႈလေႈ တံပ်ကိုးကာင်းကဲကာည်း တံပ်ကညာအာဏာဆီုက်ဇေဝ်ကဲ တပ္လါႇဘေဲႇအူမျိုးအူလှေအောႏ။
ကဇေန်နီး တံပ်ကညာအာဏာဆီုက်ဇေဝ်ကဲ ထိင်အူန်းလိူည် ခေဲင်ကီုင်းလာဆေဝ် ဆာ်မိုႈဒေင်ဆဘောကာည်း လာဆေဝ် အ်ုန်အီအရေးဒါင်းနီန်မိုႈ တံပ်ကိုးကာင်းကဲ အီထိင်ခြဲအူန်းအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
