ပိုႈလဘား၊ ကျံရ်ဇူန်လည် ဆငည်း 25၊ မူစယ်
ဘိူန်းအယ်တခေါရ်နံပ် မိုႈတ တံပ်ကညာအာဏာဆီုက်ဇေဝ်ကြ စေတ်ရဲင်ဘိုး ဒီလီပ်လေႈကီုင်း ကဒါႇဒေင် 105မဲင်ႏကာည်း ဒေင်ဟာဝ်းကဒါႇ အေဲမ်ခြီရ် ပကီုင်းမူစယ် ကပီုန်ဆျှံမ်ကဒါႇပိူည် အ်ုန်အီမိုႈ ဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန်အောႏ။
တိုအီးခေဲင်အရာပ်ကဲ က္လာင်းတဆျှိုည်ဖီမျေဒါႈ ခေဲင်နှားနီန် တံပ်ကညာအာဏာဆီုက်ဇေဝ်ကဲ စေတ်ရဲင်ဒေဲႈဖါ်ႈ တိုအီးကဲအီယိူဝ်ႇကဒါႇ ကီုင်းအေဲမ်ခြီရ် အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်း – PSLF/TNLAကဲကာည်း 105မဲင်ႏ အ်ုန်အီမိုႈဒီပ်ုန်ကပိုမ် ထိင်ခြဲအူန်း ဖုင်ဘဝ်ကီုက်ဒါင်း 3ဖုင်ကဲ ဟိုက်ဒေဲႈကဒါႇကီုင်းမူစယ်နီန်အောႏ။
ကောန်အီမာည်း ကဝ်အီဂေါည်ကီုင်းအေဲမ်ခြီရ်နီန်အူအီး က္လာင်းတဆျှိုည်ဖီမျေဒါႈ “ကဲစေတ်ပကပီုက်ပါင်ခံမ်းကာည်း လော်ည်ဆုတောင်း။ ကဲစေတ်ရဲင်ပ လော်ည်ဆုတောင်း။ မှောပဲနံင်ဟာဝ်း။ ဒီမှောပဲယိူဝ်ႇ။ ပဲနံင်ႎီရ်ပရဝ်? ကဲဆမွံတ် ဇီုင်းဆေပဲမိူဝ်ႈ။ ဟောည်ႇဒီန် ကဲမှာန်းတိူရ်ႈ ကဘ္လျကနံဝ်းတိုယဲ။ တိူဝ်ႈစေတ်ဘိုးႎှုင်။ ကဲကံပ်စေတ်မာ် ကဲညှံမ်ဒဲႈစိယဲလီပ်ခေဲင်ကား။ ဆူည်ႇဘိုးယဲအံက်လှေင် နှာရိူဝ်ႇ”
ကောန်အီမာည်း ကဝ်အီဂေါည်ကီုင်းအေဲမ်ခြီရ်နီန်အူအီး က္လာင်းဒါႈ ဆဲႈဒါႇဒီန် ဘည်ဂေါည်ဂေါည်မိူဝ်ႈ တံပ်ကညာအာဏာဆီုက်ဇေဝ်ကဲ တိုည်းကောန်တဘိုက် ကဲအီယိူဝ်ႇကဒါႇအေဲမ်ခြီရ် ဟိုက်ဒေဲႈကဒါႇမူစယ်နီန် ဘည်အာဝ်ဘိူန်းကတူည်ႇကႎှ အီဟြာည်ကမာ်ႈဟာဝ်းကဲနီန်မာ် မိူဝ်ႈအေ့အောႏ။
ကောန်အီမာည်းဒီန် က္လာင်းဒါႈ “ကောန်အီမာည်းအေဲမ်ခြီရ် အ်ုန်အီဟိုက်ဟာဝ်းကဒါႇမူစယ်နီန်အူအီး မောကံပ်ရောတ်ကဇေန်နီး အာဝ်ဘိူန်းစိကတူည်ႇကႎှတအ်ုန်။ အ်ုန်ဟိုက်ဟာဝ်း ဟည်ဘိူန်းကပံတ် 10ဆငည်းယာ့်။ နှားကဲနီန် ဂေါည်ဂေါည်ယိူဝ်းတငါဝ်း အီတိုည်းတိုအီးကာည်း ဘည်ကမာ်ႈဟာဝ်းတိုအီးကဲဂဲနီန်။ ဆာ်အယ်ယိူဝ်ႇကဒါႇအေဲမ်ခြီရ်ကာည်း ကဒါႇ 105မဲင်ႏ ဟိုက်ဒေဲႈကဒါႇမူစယ်နီန် ကဲရာမ်စေတ်ကဆဝ်းခည်း။ ဆာ်ယိူဝ်ႇကဒါႇမူစယ်ႎီရ် ကဲအာဝ်ရာမ်စေတ်စိ”
ဇူႈပွံတ်ကျံရ်ဇူန် နှားဖိုန်ဒိူန် တံပ်ကညာအာဏာဆီုက်ဇေဝ်ကဲ စေတ်ကဆဝ်းဖါ်ႈ ပဂေက်ပါင်ခံမ်း အာဝ်ခွါင်းစိတိုအီးကဒါႇ အေဲမ်ခြီရ်ကဲ ဒေါတိူဝ်ႈလာည်း လည်ဟောမ်ဟာပ်၊ ဂြိုခြီုင်စာက်ကာည်း လည်မံင်လှေကဲဒိူန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
