ပိုႈလဘား၊ ကျံရ်ဇူန်လည် ဆငည်း 6၊ မူစယ်
တိုအီးခေဲင်အရာပ်ကဲ က္လာင်းဒါႈ တံပ်ကညာအာဏာဆီုက်ဇေဝ်ကဲ စေတ်ရဲင်ဘည်ဒေါတိူဝ်ႈလည် ယိူဝ်ႇကဒါႇကီုင်းမူစယ် အ်ုန်အီမိုႈဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲ ဟာဝ်းကဒါႇကီုင်းအေဲမ်ခြီရ် အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်း TNLA ကဲအောႏ။
ကညာကားအူအီး က္လာင်းဒါႈ ဇူႈပွံတ်ကျံရ်ဇူန် နှားဖိုန်ဒိူန် ကဲဂီုည်စေတ်ရဲင် ပဂေက်ပါင်ခံမ်း ကဒါႇလေႈနှာရိူဝ်ႇကီုင်းမူစယ် အာဝ်ခွါင်းစိအီးဒေါလီပ် လည်ပ်ုန်ဟောမ်ပ်ုန်ဟာပ်၊ ဂြိုခြီုင်စာက်ကာည်း လည်မံင်ခ္လကဲဒိူန် ကဒါႇအေဲမ်ခြီရ်အောႏ။
“ကဲစေတ်လိူည်ကား ပ်ုန်ဆိင်စေတ်ကဲ။ ဆာ်မိုႈကညာကား ကဲအီတာင်ဂြိုခြီုင် တောန်ဆငည်းကဲဒိူန် ကဲစေတ်အေ့။ ကညာကားမံင်ခ္လကဲဒိူန် ဂြိုဆာ်ဂီုန်းဖါ်ႈ ကဲအာဝ်ယယာ့်တာင်။ ဂေါႇမိုႈကဲမှာန်းဂီုန်းကဆဝ်းရူရ်ႈ ဂြူကမာည်းကဲဒိူန်လိူည် ကဲကံပ်အာဝ်ဒဲႈအီးတာင်။ မံင်ခ္လ အီတာင်လိူည်ဒါဆဲင်ကယ်။ ကညာကားမံင်ခ္လကဲဒိူန်မာ် ဒဲႈဖါ်ႈရိူန်းထာန်မှာန်းကဲ တာင်”
မိူဝ်ႈဘိုးကောန်အီမာည်းအူအီး က္လာင်းဒါႈ နံင်ဆမာမိုႈ ဂေါႇတံပ်ကညာအာဏာဆီုက်ဇေဝ်ကဲ တောပ်ဒေတိုည်း ကျားဖျန် ကဲအီဂေါည်ပကီုင်းမူစယ် ခည်ကျံရ်ဇူန် ဆငည်း 6 ဘိုန်းဒေဲႈဒိူန် စီပဲန်ကဲစေတ်ကဆဝ်းဘာည်းကဇေန်နီးအောႏ။
“ပဂေက်ပါင်ခံမ်းဒီန် ကဲအာဝ်ဒဲႈယာ့် အီးတာင်ဂြိုခြီုင်။ ခံင်မိုႈကဲတိုည်း ကျားဖျန်ကဲ။ ဂေါႇမိုႈကဲယော ကျားဖျန်ကဲ တောပ်ဒေဲႈခေဲင်ကားတာင်ဂြိုခြီုင်ကဲဒီန် စီပဲန်ကဲအာဝ်ဒဲႈအီးတာင် ဂြိုခြီုင် ဘာည်းကဇေန်နီး”
ခည်ဆန်ုမ် 2024 ကျံရ်နိုႎဲမ်ဘာ ဆငည်း 27ဒိူန်မာ် တံပ်ကညာအာဏာဆီုက်ဇေဝ်ကဲ တိူမ်ဘိအေ့ အီးတာင်ဂြိုခြီုင် ယိူဝ်ႇကဒါႇဂေက်ပါင်ခံမ်း ဟာဝ်းကဒါႇအေဲမ်ခြီရ်နီန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
