မာည်းရူပ၊ ဆဲပ်တဲမ်ဘာ ဆငည်း 1 မာဝ်ႎံင်း
ကဝ်အီဂေါည်ခေဲင် ပ္လေါည်ကတီုက်ကပဴင်ကဲ က္လာင်းတဖုင်ဆျှိုည်ဖီမျေဒါႈ ဂေါႇဘည်ထိုးလီပ်ဒေဲႈ တံပ်ကညာအာဏာဆီုက်ဇေဝ်ကဲ ပရဝ်နောင်ပိန် ခေဲင်လှံင်မာဝ်းႎံင်းနီန် ဂီုည်ပဲန်ကရဲင်ဖါ်ႈ ပ္လေါည်ကတီုက်ကပဴင် ကဒါႇတံပ်ကညာအာဏာဆီုက်ဇေဝ်ကဲ ဘည်တိူဝ်လနီန်ဂီုည်းအောႏ။
ကဲဒါႈ တံပ်ဆီုက်တအာင်း ကာည်း တံပ်ကညာအာဏာဆီုက်ဇေဝ်ကဲ ပဲန်ပ္လေါည်ကတီုက်ကပဴင်နီန် ကဒါႇရဝ်နောင်ပိန် ကာည်း ခနားရဝ်ပင်တိန်နီန် ဂေါႇမိုႈတံပ်ပည်အာရ်ကဒါႇ ဂီုည်လည်ထိုးနီန် စီပဲန်ကရဲင်အောႏ။
ကဝ်အီဂေါည်ခေဲင် ပ္လေါည်ကတိုက်ကပဴင်နီန် အူအီးက္လာင်းတဖုင်ဆျှိုည်ဖီမျေဒါႈ“ ပ္လေါည်ကတီုက်ကပဴင်နီန် ဂီုည်ပဲန်ကရဲင်အူန်း။ ကဇေန်နီး ကဲဂီုည်တီုက်ဟာဝ်း နှာင်တံပ်ကညာအာဏာဆီုက်ဇေဝ်ကဲ က္လိုတ်ႎီရ် ဒါႇရဝ်ပင်တိန်နီန်။ မိုႈဘိုး တံပ်ကညာအာဏာဆီုက်ဇေဝ်ကဲ ဂီုည်ဂေါည်အူန်းခေဲင် ရဝ်နောင်ပိန်”။
ဂေါႇဘည်ထိုးဒေဲႈ တံပ်ကညာအာဏာဆီုက်ဇေဝ်ကဲ ပနောင်ပိန်နီန် ပ္လေါည်ကတီုက်ကပဴင်နီန် ဟည်လှေင် ကပံတ် 2 နှား ကဒါႇတံပ်ကညာအာဏာဆီုက်ဇေဝ်ကဲမာ် ညှံမ်ဘယ်စိခ္လေါႈ ရဝ်နောင်ပိန်နီန်အောႏ။
အူကဒါႇမာ် တံပ်ကညာအာဏာဆီုက်ဇေဝ်ကဲ ဟည်ဘယ်ဒေင်ထိင်ခြဲ ဒေင်ဂုတ်တွင်း အ်ုန်အီကတူည်ႇဒဲႈမာဝ်းႎံင်း ကာည်း နောင်ခေဝ်နီန် ဘံန်နံင်ႎိူဝ်ႈဒေင်ထာ့်ဂြိုနီန် ကဒါႇတံပ်ကဲမာ် ဟည်ဘိူန်းတိုန်း ဂြိုခြီုင်လာက်နာက် ကာည်း ရဲင်ဘ္လောမ်ဆီုက်နီန်အောႏ။
ဂေါႇပ္လေါည်ကတီုက်ကပဴင် ကဒါႇနောင်ပိန်နီန် တောပ်ပည်တိုအီးရဝ်နောင်ပိန်ကဲကာည်း ရဝ်အ်ုန်အီဂေါည်ရီမ်းရဝ်ကဲ 10 ရဝ်နီန် ကတူႈဒိုည်ႇဒဝ်အောႏ။
ခည်ကျံရ်အောဂ်ုတ် ဆငည်း 29 ဒိူန်မာ် ဂေါႇပ္လေလာက်နာက်ဒါင်း ပ်ုန်ပဴင်တံပ်ကညာအာဏာဆီုက်ဇေဝ်ကဲနီန် ဇောႈလဟာဝ်း ရဝ်အ်ုန်အီးေဂါည် ခနားကီုင်းမာဝ်းႎံင်း ကာည်း နောင်ပိန် တိုအီးရဝ် နားအိုက်ခန့်နီန် ကောန်အီမာည်း အူအီးအောႏ။
ဇူႈဒါ ခည်ကျံရ်အောဂ်ုတ် ဆငည်း 19 ဒိူန် ဆီုက်ငါးတံပ်ကညာအာဏာဆီုက်ဇေဝ် အ်ုန်အီဂေါည်ရဲင်ဘ္လောမ် ဒါပယာ်ႈနီန် ဇူႈကဒါႇနောင်ခေဝ် ခ္လေါႈဖါ်ႈအိုမ်ပ္လေါင်ဂုတ်ထိပ်နီန် ထိုးလီပ်ဒေဲႈ ဒီထိင်ခြဲ တံပ်ဆီုက်ဆျှံမ် SSPP ကဲ ပရဝ်နောင်ပိန်နီန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
