မာည်းရူပ၊ ကျံရ်ဇူန်လည် ဆငည်း 1၊ နောင်ခေဝ်
ဖုင်ယဲဆျှိုည်ဖီမျေတခေါရ်နံပ် ဒီဘိူန်းတံပ်ဆီုက်တအာင်း TNLA ကဲတထင်ခြဲ ကနာည်နံင်ႎီရ်ဘိူန်းကဲတ ကီုင်းနောင်ခေဝ်နီန် တံပ် ကညာအာဏာဆီုက်ဇေဝ်ကဲ ဟည်ရောတ်ရီမ်းပြောကီုင်းနောင်ခေဝ် ပရဝ်မျက်ချင်းနုနီန်အောႏ။
တိုအီးအရာပ်နောင်ခေဝ်ကဲ က္လာင်းတဖုင်ဆျှိုည်ဖီမျေဒါႈ ရဝ်မျက်ချင်းနုနီန် အ်ုန်ကဒိုင်းတောပ်လိူည် ကီုင်းနောင်ခေဝ် ပ်ုန်ထိင်ခြဲတံပ်ဆီုက်တအာင်း TNLA ကဲ 4 မဲင်
အမှိူဝ် ကျံရ်ဇူန် ဆငည်း 30 ဒိူန်မာ် TNLA ကာည်း တံပ်ကညာအာဏာဆီုက်ဇေဝ်ကဲ ပဲန်ဟာဝ်းပ္လေါည်ကတီုက်ကပဴင် ပရဝ်မျက်ချင်းနု ကာည်း ရဝ်နောင်ဩ။
“ ပ္လေါည်ကတီုက်းကပဴင်နီန် အ်ုန်ပဲန်ပရဝ် နောင်ဩ ကာည်း ပရဝ်မျာက်ချင်းနု။ ဆကဆကဲ ဟည်ရောတ်ဒေဲႈ ပရ၀်မျက်ချင်းနုနီန်”
အမှိူဝ် ကျံရ်ဇူန် ဆငည်း 30 ဒိူန် တယ်လီဂရမ်ချန်နယ် လှေအ်ုန်အီထောက်ခါမ် တံပ်ကညာအာဏာဆီုက်ဇေဝ်ကဲ ကိက်ဒါႈ ကဲဟည်ဘယ်ဒေထိင်ခြဲ ရဝ်မျက်ချင်းနု ကာည်း ရဝ်နောင်ဩနီန်အောႏ။
ကဲဒါႇတံပ်ဆီုက်တအာင်းကဲမာ် ယိူဝ်းလိူည် ကဲပ္လိူရ်ႈလေႈ ဘံန်ကျံရ်ဇူန် ဆငည်း 27 ဒိူန် ဆဲႈဒီန် TNLA ကာည်း တံပ်ကညာအာဏာဆီုက်ဇေဝ်ကဲ ပဲန်ဟာဝ်းဘိုး ပ္လေါည်ကတီုက်ကပဴင် ပရဝ်မျက်ချင်းနု၊ လုံဝယ်၊ ညဏ်တော၊ နောင်လင် ကာည်း နောင်ဩအောႏ။
တံပ်ကညာအာဏာဆီုက်ဇေဝ်ကဲ ကနာည်နံင်ႎီရ်ဘိူန်းကဲတလာ်ထိင်ခြဲ ကီုင်းနောင်ခေဝ်နီန် ဒါပွံတ်ရဲင်ဘ္လောမ်ဒါဟြဲင်လေႈ ထိုးလီပ်ဒေဲႈဖါ်ႈ ကဒါႇတံပ်ဆီုက်တအာင်း TNLA ကဲမာ် ကနာည်နံင်အာဝ်ဇောႈကီုင်းနောင်ခေဝ်နီန် ဟည်ႎီရ်တီုက်ဟာဝ်းဘိုးအောႏ။
တိုအီးအရာပ်ကဲ က္လာင်းတဖုင်ဆျှိုည်ဖီမျေဒါႈ ဂေါႇပ္လေါည်ကတီုက်ကပဴင် ရီမ်းပြောကီုင်းနောင်ခေဝ်နီန် ကူန်ရဝ်မာဂါင်နောင်ခေဝ် ဒဝ်ဟာဝ်းအူဟြဲင်လေႈအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
