မာည်းဖိူမ်ဆငဲ၊ ကျံရ်အံက်တိုဘာ ဆငည်း 8၊ မာဝ်းႎံင်း
ဖုင်ယဲဆျှိုည်ဖီမျေ တခေါရ်နံပ် မိုႈတ ဂေါႇတံပ်ကညာအာဏာဆီုက်ဇေဝ်ကဲ ဒါယာန်ပ်ုရ်ဒေဲႈပျောႈဟာဝ်း ပ္လေဘျုင် ခေဲင်ရဝ်မယ်ဟုန် အ်ုန်အီဂေါည်ရီမ်းကီုင်းမိူင်းလိုင် လှံင်မာဝ်းႎံင်း ဒီပ်ုန်ထိင်ခြဲအူန်း တံပ်ဆီုက်တအာင်း – PSLF/TNLA ကဲ စီပဲန်တောပ်ပည်ကောန်ကညောမ် တိုအီး 10အီး ယံမ်းဟာဝ်းပွံတ် ဒီဒီန်အူစာ်န်းအောႏ။
ခည်ကျံရ်အံက်တိုဘာ ဆငည်း 7 ခိင်ဆံန်ကပံတ် 12နြီလေႈအူကဒည်ဒိူန် တံပ်ကညာအာဏာဆီုက်ဇေဝ်ကဲ ဒါဂျက်ဖိုက်တာ ဒေဲႈပျောႈဟာဝ်း ပ္လေဘျုင် ပေါင် 250 ခေဲင်ရဝ်ကဲနီန် 2ပိုင်းအောႏ။
ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းဒါႈ “ကဲဒါယာန်ပ်ုရ် ဒေဲႈပျောႈဟာဝ်း ခိင်ဆံန် 12နြီ။ တိုအီးရဝ်ယံမ်း 10အီး၊ ဘာတ် 3အီး”
ခေဲင်ကဲအီယံမ်းဟာဝ်းဒီန် ဘည်တောပ်အ်ုန်တ မာည်းအအူး ဘိူန်းအဆာက် 2ဆန်ုမ် ခေဲင်ကဲအီဘာတ်ဒီန်မာ် တောပ်ဖါ်ႈကောန်ကညောမ် 2အီး လလူလေဲဝ်ဟာဝ်းဘိုး ဂါင်ဂေါည် 6ကြောင်အောႏ။
ခည်ကျံရ်အံက်တိုဘာ ဆငည်း 7 အာည်ႇနိုက် 7နြီဒိူန်မာ် တံပ်ကညာအာဏာဆီုက်ဇေဝ်ကဲ ပျောႈဟာဝ်းဘိုး ပ္လေဘျုင် ပကျောင်စဝ် ပုဗ္ဗာရုံ အ်ုန်အီဂေါည်ခေဲင်ကီုင်းအိုမ်ငျံရ်နီန်အောႏ။
ဂေါႇမိုႈ တံပ်ကညာအာဏာဆီုက်ဇေဝ်ကဲ ပျောႈကစံပ်ဟာဝ်း ပ္လေဘျုင် ခေဲင်အိုမ်ငျံရ်၊ အိုမ်ယ်ုရ်၊ ဆဘော၊ မာဝ်းႎံင်းကဲနီန် စီပဲန်တိုအီးဟာဝ်းယံမ်းဟာဝ်း 20အီးအာဝ်ယောမ်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
