ယာရူစိင်၊ ကျံရ်ဇူန်လည် ဆငည်း 8၊ လာဆေဝ်
တိုအီးကီုင်းလာဆေဝ်ကဲ က္လာင်းတဖုင်ဆျှိုည်ဖီမျေဒါႈ ဒီဘိူန်းတံပ်ကညာအာဏာဆီုက်ဇေဝ်ကဲတထိင်ခြဲ ပကီုင်းလာဆေဝ်နီန် ဆဴင်ခြီရ်အူဆဴင် ကတူႈအီစိုန်၊ တောပ်ဟာဝ်း ရိူန်း 200 ဆဲန် ခြီရ် 75 ကျာပ်အောႏ။
ခည်ကျံရ်ဇူန်လည် ဆငည်း 4 ဒိူန် ပကီုင်းလာဆေဝ် ခေဲင်ဇံင် 9 ရီမ်းပြောဘူတာနီန် တိုအီးအူဖုင်ကဲ လီပ်စိုန်ဟာဝ်း ဆဴင်ခြီရ်အူဆဴင်အောႏ။
“ ဆဴင်အ်ုန်အီငျားအီစိုန်မိုႈ ဆဴင်ခြီရ် အ်ုန်အီဂေါည် ရီမ်းပြောဘူတာ။ ငျားပွံတ် ခိင်ႎိူဝ်ႈအ်ုန်တဆဴင် တိုအီးအူဖုင်ကဲ ဘဒေဲႈဖါ်ႈကားစီ လီပ်စိုန်ဟာဝ်း။ အ်ုန်အာဝ်တောပ်ဟာဝ်းဒိုည်ႇစိခြီရ် ကညာဆဴင်ဒီန်။ မိုႈလိူည်အ်ုန်တောပ်ဂီုန်းပ်ုန်ဒေဲႈအာပ်အီးဒီႈ။ ဂေါႇဘည်ဒီန် ခြီရ်မိုႈ 75 ကျာပ်”
တိုအီးအရာပ်ကဲက္လာင်းဒါႈ ဘံန်ႎီရ်အူပ်ဘြောင်တံပ်ကညာအာဏာဆီုက်ဇေဝ်ကဲတ ကီုင်းလာဆေဝ်နီန် တောပ်ပည်အီဘြားႎံရ်ငံရ် တိုအီဘြား၊ စိုန်ကဲနီန် အာဝ်မိူဝ်ႈစိ ဘည်ဘယ်ကဲတဒေတိုည်းဟာဝ်းအီလူည်ႇအမှုကဲဒီန်အောႏ။
ခည်ကျံရ်ဇူန်လည် ဆငည်း 18 ဒိူန်မာ် ပကီုင်းလာဆေဝ် ခေင်ဇံင် 4 ဒေင် 4 နီန် ကောန်အီပ်ုန်အူအီး ကတူႈအီကပျောအ်ုန်ဒါ ရဂ်ုပ်ဖါႇဟာဝ်းႎှုင်နီန်မာ် တိုအီးအရာပ်ကဲ ဘိူန်းဒေတိုည်းဟာဝ်းအ်ုန်အောႏ။
ဘာည်းလိူည်ဒီန် ခည်ကျံရ်ဇူန် ဆငည်း 17 ဒိူန်မာ် ခေဲင်ဇံင် 3 နီန် ကောန်အီမာည်း ကဝ်အီဘြား ဆဲင်ကယ် ပဆဴင်အကင်နီန် တိုအီးအရာပ်ကဲ ကစုဒါဘိူန်းဒေတိုည်းဟာဝ်းအ်ုန်အောႏ။
ဘံန်ဟောည်ႇလီပ်ဒေဲႈတံပ်ကညာအာဏာဆီုက်ဇေဝ်ကဲ ခေဲင်ကီုင်းလာဆေဝ်နီန် ဇူႈဒါကျံရ်အေပြုရ် ရောတ်ကျံရ်ဇူန် 12 ဒိူန် အမှုဘြား၊ အမှုလည်ကိုႈ၊ အမှုကဖါႇနီန် ပဲန်ဟာဝ်းအမှု 20 လိူဝ်ႈအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
