မာည်းရူပ၊ ကျံရ်ဇူန်လည် ဆငည်း 7၊ နောင်ခေဝ်
ကဝ်အီဂေါည်ခေဲင်ပ္လေါည်ကတိုက်ကပဴင်ကဲ က္လာင်းဒါႈ ဒီဘိူန်းတံပ်ဆီုက်တအာင်း PSLF/TNLA ကဲတထိင်ခြဲ ရီမ်းပြောကီုင်းနောင်ခေဝ်နီန် ဂေါႇမိုႈ တံပ်ကညာအာဏာဆီုက်ဇေဝ်ကဲ ဂီုည်ထိုးလီပ်ဒေဲႈစီပဲန်ကရဲင် ပ္လေါည်ကတီုက်ကပဴင်နီန်အောႏ။
ကဲအီထိုးလီပ်ဒေဲႈ ကဒါတောင်ခမ်းနီန်မာ် ဟည်ရောတ် ပရဝ်မျက်ချင်းနု အ်ုန်အီကဒိုင်းတောပ် ကီုင်းနောင်ခေဝ်နီန် 4 မဲင် ဆီုက်ငါး ကဲအီထိုးလီပ်ဒေဲႈကဒါႇရဝ်အုမ္မတီးနီန်မာ် ဟည်ရောတ်ရီမ်းပြောရဝ် ကျောက်ကြမ်း အ်ုန်အီကဒိုင်းတောပ် ကီုင်းနောင်ခေဝ်နီန် 4 မဲင်အောႏ။
ကဝ်အီဂေါည်ခေဲင်ပ္လေါည်ကတီုက်ကပဴင်နီန် အူအီးက္လာင်းတဖုင်ဆျှိုည်ဖီမျေဒါႈ“ ပ္လေါည်ကတီုက်ကပဴင်နီန် အ်ုန်ပဲန်တောန်ဆငည်း။ ဘည်ခူရ်က္လာည်းအ်ုန် တံပ်ကညာအာဏာဆိုက်ဇေဝ်ကဲ ညှံမ်မိူဝ်ႈစိ ဘည်ဘယ်ကဲဒေလီပ်ခေဲင်ကီုင်းနောင်ခေဝ်”။
တယ်လီဂရမ်အ်ုန်အီထောက်ခါမ် တံပ်ကညာအာဏာဆီုက်ဇေဝ်ကဲ ကိက်ပ္လိူရ်ႈဝါဒဖြန့်ဒါႈ ဆီုက်ငါးတံပ်ကညာအာဏာဆီုက်ဇေဝ်ကဲ ဟည်ဘယ်ဒေလီပ်ခေဲင်ကီုင်းနောင်ခေဝ်အောႏ။
တိုအီးအရာပ်ကဲက္လာင်းဒါႈ ဂေါႇပ္လေါည်ကတီုက်ကပဴင် ကီုင်းနောင်ခေဝ်နီန် တိုအီးခေဲင်ကီုင်းနောင်ခေဝ် ကာည်း တိုအီးအရာပ်ကဲ ဒဝ်ဒိုည်ႇအောႏ။
တံပ်ကညာအာဏာဆီုက်ဇေဝ်ကဲ ကနာည်နံင်ႎီရ်ဘိူန်းကဲတလာ်ထိင်ခြဲ ကီုင်းနောင်ခေဝ် ပ်ုန်ကတူႈကဲတ က္လိုတ်ႎီရ်နီန် ကဲဒါပွံတ် ဆီုက်ငါး 2 ဒီထိုးလီပ်ဒေဲႈ ဟည်လှေင်ကပံတ် 5 ကျံရ်နီန်မာ် ဂေါႇမိုႈကဒါႇတံပ်ဆီုက်တအာင်းကဲမာ် ဟည်ႎီရ်တီုက်ဟာဝ်းနီန် ညှံမ်မိူဝ်ႈစိဘည်ဘယ်ကဲတ လာ်ထိင်ခြဲ ကီုင်းနောင်ခေဝ်နီန်အောႏ။
တံပ်ကပိုမ် ကာည်း တံပ် TNLA ကဲ တီုက်ဘိူန်းဟာဝ်း တောပ်ပည် တံပ်အ်ုန်အီမိုႈ တံပ်ဒါင်းဒုံး စနဲ (606)နီန် ကာည်း တံပ်ခမရ -114 နီန် ဟောည်ႇဒီန် စီတီုက်ဘိူန်းဟာဝ်းလာ် ကီုင်းနောင်ခေဝ်နီန် ခည်ဆန်ုမ် 2024 ကျံရ်ဇူန်လည် ဆငည်း 10 ဒိူန်အောႏ။
ကဝ်အီဘိူန်း အခွါင်းအရေးကြောႈက္လာင်းခေဲင် PSLF/TNLA ကဲ အ်ုန်အီမိုဝ်ႈ လိုည်းယေဦးက္လာင်း ခေဲင်ပ်ုန်ကဘ္လာင်းကဲတဆဒါင် ခည်ကျံရ်ဇူန်လည် ဆငည်း 5 ဒိူန်ဒါႈ တံပ်ဆီုက်တအာင်းကဲ ကနာည်နံင်အာဝ်က္လိုတ်ႎီရ်ကဲ ဒါႇကီုင်းလာခေဝ်နီန် ကဲနံင်ဆီုပ်တီုက်ဟာဝ်းအူန်းအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
