လိုည်းဇူန်မိုး၊ ကျံရ်အောဂ်ုတ် ဆငည်း 22၊ နောင်ပိန်
ဂေါႇပ္လေါည်ကတီုက်ကပဴင် ခနားတံပ်ကညာအာဏာဆီုက်ဇေဝ်ကဲ ကာည်း တံပ်ဆီုက်တအာင်း TNLA ကဲ တိုအီး အရာပ် အီႎဲႈဒေဲး ဖေးဆီုက်ဖေးနာန်း ယိူဝ်ႇကဒါႇလှံင်မာဝ်းႎံင်း ရဝ်နောင်ပိန် ကဲအီရောတ် ခေဲင်ကီုင်းလာဆေဝ် 70 အီးနီန် လိုကနဲတ်ကမှည် ပ်ုန်ဟောမ်ပ်ုန်ဟာပ်နီန်။
ကဝ်အီမိူဝ်ႈ ဇီုင်းကပ္လိူင်ခေဲင်ဖုင် FYO ကဲအူအီး က္လာင်းဒါႈ ခည်ကျံရ်အောဂ်ုတ် ဆငည်း 20 ကာည်း အမှိူဝ် ကျံရ်အောဂ်ုတ် ဆငည်း 21 နီန် တိုအီးကဲအီဒဝ်ဒေဲႈကဒါႇနောင်ပိန် အီရောတ်ခေဲင်လာကီုင်းဆေဝ်နီန် ဟည်ဂေါည် 70 အီးအောႏ။
“ ကဲပါ်ဒိုႇဒိုည်ႇ ကဲဒေဲႈရဲ့လိူည် တိုအီးဆူနာကဲ ပယုင်ဆနံမ်။ ကဲတိုအီးရဝ်ကဲ လည်ရဲ့လိူည်ခနားကဲ။ ကဇေန်နီး ကဲဂေါည်လိူည် ပယုင်ဆနံမ်။ ယဲဟည်ရေဲန်ဒဲႈ ဒီနံင်ဂေါည်ကဲ။ အာမဒါင်းအ်ုန် ယဲတိူဝ်ႈဟာဝ်း ကနာည်နံင်ဟောမ်နံင်ဟာပ်ကဲ”
ကဇေန်နီး ဖုင်အီကဇောည် FYO ကဲမိုႈ အီရေဲန်ဒဲႈ ဒီဂေါည်ကာည်း ပ်ုန်ဟောမ်ပ်ုန်ဟာပ်နီန် ကနည်အီႎဲႈဖေးႎဲႈနာန်းကဲဒီန်အောႏ။
ကနာည်နံင်ဟောမ်နံင်ဟာပ် တိုအီးအီႎဲႈဖေးႎဲႈနာန်း တောန်ဆငည်းနီန် အ်ုန်လိုကနဲတ်ကမှည် ပ်ုန်ဟောမ်ပ်ုန်ဟာပ် ကဲအီဆိင်ကဇောည်ဒဲႈလှေနီန် ဘိူန်းအေ့ကတူည်ႇ 09-980595307 ဒေဲႈတောပ်ဖုင် FYO ကဲအောႏ။
ခေဲင်ကဲအီႎဲႈဒေဲႈဖေးဆီုက်ဖေးနာန်းကဲ 70 အီးနီန် တောပ်ပည် ကောန်ကညောမ် 6 အီး 34 အီးနီန် မိုႈဒိုည်ႇအီကတူႈဖေးဘာတ် ကဇေန်နီန် ကဲရံပ်ခါမ်ဘည်ဆနံမ်းနီန်အောႏ။
ဂေါႇပ္လေါည်ကတီုက်ကပဴင် ခနား တံပ်ကညာအာဏာဆီုက်ဇေဝ်ကဲ ကာည်း တံပ်ဆီုက်တအာင်း TNLA နီန် ဆဲႈဒါ တိုအီးရ၀်နောင်ပိန်ကဲ တိုအီးရဝ်ဇီးပင်၊ ပင်ပေါ၊ ပင်တိန်၊ ပင်တီး၊ ကျောင်းကုန်း၊ ဖီသစ်၊ ခေးနင်း ကာည်း ရဝ်လွယ်ကုန်နီန် ဟည်ကတူႈဒိုည်ႇဒဝ်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
