မာည်းရူပ၊ ကျံရ်အောဂ်ုတ် ဆငည်း 20၊ မာဝ်းႎံင်း
ကဝ်အီဂေါည်ခေဲင်ပ္လေါည်ကတီုက်ကပဴင်နီန်အူအီး က္လာင်းတဆျှိုည်ဖီမျေဒါႈ ဂေါႇမိုႈတံပ်ကညာအာဏာဆီုက်ဇေဝ်ကဲ ထိုးလီပ် စီပဲန်ကတီုက်ကပဴင် ခနား တံပ်ကညာအာဏာဆီုက်ဇေဝ်ကဲကာည်း TNLA ကဲ ပဲန်ရဲင်ခည်း ရီမ်းရဝ်နော်င်ပေင် လှံင်မာဝ်းႎံင်းနီန်အောႏ။
ဆီုက်ငါး တံပ်ကညာအာဏာဆီုက်ဇေဝ်ကဲ ထိုးလီပ်ဖါ်ႈ ကဒါႇပ်ုန်ပ္လချှာင်ရဝ်ရဲဂိုရ်နီန် ခည်ကျံရ်အောဂ်ုတ် ဆငည်း 19ဒိူန် ကဇေန်နီး ကဲဟည်ရောတ်စာ်မ်း ကဒါႇရဝ်ထန်းတပင်ယာ့်အောႏ။
ကဝ်အီဂေါည်ခေဲင်ပ္လေါည်ကတီုက်ကပဴင်နီန်အူအီး က္လာင်းတဆျှိုည်ဖီမျေဒါႈ “ပဲန်ရဲင်ခည်း ပ္လေါည်ကတီုက်ကပဴင်။ ကဇေန်နီး တံပ်ကညာအာဏာဆီုက်ဇေဝ်ကဲ ဒေဲႈပ္လေႈအူန်းတံပ်ကဲ ပကော်င်မူး ဘိုန်းရဝ်ထန်းတပင်ကာည်း ရဝ်အဲနီန်။ တံပ်ကညာအာဏာဆီုက်ဇေဝ်ကဲ ထိုးကစံပ်ပွံတ်။ ဆဲႈဒါႇဒီန် ကဲဒါဘိုးယာန်ပ်ုရ်ဂျက် ဒေဲႈပျောႈပ္လေ”
ရီမ်းရဝ်နော်င်ပေင်ဒီန် အ်ုန်မိုႈဒီဟာဝ်းႎီရ် တံပ်ဆီုက်ဆျှံမ် – SSPP ကဲ ဘံန်ဟောည်ႇလီပ်ဒေဲႈ ဆီုက်ငါးတံပ်ကညာအာဏာဆီုက်ဇေဝ် ခည်ကျံရ်အောဂ်ုတ် ဆငည်း 19ဒိူန် အာဝ်ယိူဝ်းယာ့် SSPP ကဲ ဒီပဲန်ပ္လေါည်ကတီုက်ကပဴင်ဒီန်ကာည်း ပရဝ်ထန်းတပင်ဒီန်အောႏ။
ဂေါႇပ္လေလာက်နာက်ဒါင်းကာည်း ဖေးရာန်ယာန်ပ်ုရ် တံပ်ကညာအာဏာဆီုက်ဇေဝ်ကဲ ခေဲင်ပ္လေါည်ကတီုက်ကပဴင်နီန် ဘည်ယံမ်းဟာဝ်းတိုအီးရဝ်ကဲမာ် မိူဝ်ႈဖါ်ႈ ဆာ်မိုႈခူရ်က္လာင်း စဲင်စဲင်ဟြဟြ ညှံမ်နံပ်စိအောႏ။
ဂေါႇပ္လေါည်ကတီုက်ကပဴင် ရဝ်နော်င်ပေင်ကဲကာည်း တိုအီးရဝ်ကဲအီဂေါည်ရီမ်းပဲန်ပ္လေါည်ကတီုက်ကပဴင်ကဲနီန် ဟည်ဒဝ်ႎဲႈဟာဝ်းဒိုႇ ဒီလောတ်ဖေးအောႏ။
ကနာည်နံင်ဘိူန်းနံပ် စဲင်စဲင်ဟြဟြ တောပ်အီကဆီုဝ်ကဆဲင် လံပ်အရေးဆီုက်ကဇေန်နီးနီန် ဖုင်ယဲဆျှိုည်ဖီမျေ ဆီုင်ဒါ့်ကတူည်ႇအူန်းတ လိုည်းယေအူး အ်ုန်အီမိုႈအီမိူဝ်ႈ အခွါင်းအရေးကြောႈက္လာင်း ခေဲင် PSLF/TNLA နီန်အောႏ။
တိုအီးကဲအီဂေါည် ခေဲင်ပ္လေါည်ကတီုက်ကပဴင်ကဲနီန် က္လာင်းဒါႈ ကဲဟည်ရဲန်အူန်းဖါ်ႈ လံပ်အရေးဆီုက် ကဒါႇမာဝ်းႎံင်ကာည်း မိုဂူႈ ကဇေန်နီး ကဲဟည်ရောတ်ဒေဲႈ ဘိုန်းရဝ်ဒိုးပင် အ်ုန်အီဂေါည်တောပ်ဒေင် နော်င်ခေဝ်ကာည်း မိုဂူႈနီန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
