မာည်းဖိူမ်ဆငဲ၊ ကျံရ်နိုႎဲမ်ဘာ ဆငည်း 27၊ မာဝ်းႎံင်း
ကဝ်အီဂေါည်ကဒံတ်တောပ်အ်ုန်အူအီး က္လာင်းဒါႈ တံပ်ကညာအာဏာဆီုက်ဇေဝ်ကဲ ဘိအူန်းဖါ်ႈ ဂါင်ဂေါည်ကိုရဲအောင် အ်ုန်အီဂေါည်ပဇံင် (7) ကီုင်းမာဝ်းႎံင်း ကပီုန်ဆျှံမ်ကဒါႇပိူည်နီန် တိုအ်ုန်မာ် ကဲဟည်တိုည်းဟာဝ်းယာ့်အောႏ။
ကဲတိုည်းဟာဝ်း ကိုကျော်ရဲအောင်နီန် အိုရ်ဆီုင်ခည်ကျံရ်နိုႎဲမ်ဘာ ဆငည်း 18ဒိူန် မောကံပ်ရောတ် ကျံရ်နိုႎဲမ်ဘာ ဆငည်း 26 ညှံမ်မိူဝ်ႈစိ ဘည်ပ္လေႈဒဲႈကဲအောႏ။
“အာည်ႇနီန် အ်ုန်မိုႈအီတိူမ်ရေဲန်ဒေဲႈဇီုင်း တာဘြောင်ဂါင်ပယာႈအောႏ။ ခည်ထိင်ခြဲ တံပ်ဆီုက်တအာင်းကဲဒိူန်မာ် အ်ုန်တိူမ်ကတူႈအီးတိုည်း ဒါႈအ်ုန်မိုႈထဲဝ်စဲမ်။ အ်ုန်ကတူႈဖါ်ႈရောဂါ ဇိူင်ဖါတ် အ်ုန်ဂဲန်ဟာဝ်း ညှံမ်လှေင်စိ။ ကဇေန်နီးမာ် ကတူႈဘိုး တံပ်ကညာအာဏာဆီုက်ဇေဝ်ကဲ တိုည်းဟာဝ်း”
ကိုရဲအောင်နီန် အ်ုန်မိုႈခြိူဝ်းတအာင်းကာည်း ဘြာန် ဘိူန်းဖါ်ႈအဆာက် 40ဆန်ုမ်လေႈ ဘံန်ဟောည်ႇထိင်ခြဲ တံပ်ကညာအာဏာဆီုက်ဇေဝ်ကဲ တကီုင်းမာဝ်းႎံင်းနီန် ဆဲႈဒါႇ တံပ်ဆီုက်တအာင်း TNLA ကဲစွဲဖါ်ႈ တိုအီးခေဲင်အရာပ် ဒါႈမိုႈကဲကတူည်ႇကႎှါတောပ် တံပ်လံပ်တီုက်ႎှီုန်းကဲ စီတိုည်းကစံပ်ဟာဝ်းလာ် တိုအီးခေဲင်အရာပ်ကဲအောႏ။
ခည်ကျံရ်နိုႎဲမ်ဘာ ဆငည်း 11ဒိူန်မာ် ကဲတိုည်းဟာဝ်း ကိုရာဂျန်း အ်ုန်အီမိုႈခြိူဝ်းဂေါ်ရခြိူဝ်း အီႎိူဝ်ႈဆဴင်ခြီုင်ဆဲင်ကယ် ပနှာရိူဝ်ႇကီုင်းမာဝ်းႎံင်းနီန် တောပ်ပ်ုန်စွဲကဲတ ဒါႈမိုႈအ်ုန်ကတူည်ႇကႎှုတောပ် ဘာည်းရကႎိုည်နီန် ခည်ကျံရ်နိုႎဲမ်ဘာ ဆငည်း 13 ခိင်ညှာ ကပံတ် 11နြီဒိူန်မာ် တံပ်ကညာအာဏာဆီုက်ဇေဝ်ကဲ တိုည်းဟာဝ်းဘိုး ကောန်အီပ်ုန် ဘိူန်းအဆာက် ကပံတ် 50ဆန်ုမ် အ်ုန်အီဂေါည် ပအရာပ် (3) ကီုင်းမာဝ်းႎံင်းနီန် အူအီးအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
