မာည်းရူပ၊ ကျံရ်ဇူန် ဆငည်း 11၊ နော်င်ခေဝ်
တိုအီးဂေါည်ခေဲင်ကီုင်းနော်င်ခေဝ်ကဲ က္လာင်းတဆျှိုည်ဖီမျေဒါႈ ဂေါႇပ္လေါည်ကတီုက်ကပဴင် ရီမ်းပြောကီုင်းနော်င်ခေဝ် ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်း – PSLF/TNLA ကဲ စီပဲန် တိုအီးဂေါည်ခေဲင်ကီုင်းနော်င်ခေဝ်ကဲ ဟည်ရာမ်ဒဝ်ႎဲႈဒိုည်ႇပါ်ကီုင်းအောႏ။
ကဲဒါႈ ဘံန်ဟောည်ႇရောတ်ဒေဲႈ တံပ်ကညာအာဏာဆီုက်ဇေဝ်ကဲ ခေဲင်ရဝ်ကံကြီး အ်ုန်အီဂေါည်ရီမ်းပြောကီုင်းနော်င်ခေဝ်နီန် ဂေါႇမိုႈကဲဒါလာက်နာက်ဒါင်း ပဴင်လီပ်ခေဲင်ကီုင်းနော်င်ခေဝ် စီပဲန်တိုအီးကီုင်းကဲ အာဝ်ယဂေါည် ဘ်ုပ်ဒဝ်ႎဲႈဟာဝ်းအောႏ။
“တိုအီးခေဲင်ကီုင်းကဲ ဟည်ရာမ်ဒဝ်ႎဲႈဒိုည်ႇပါ်ကီုင်း။ ခေဲင်ကီုင်း ကီုတ်လိူည်စရူစရီတ်။ ဆာ်မိုႈအီမိူဝ်ႈရိူန်းကဲဒိူန် ကဲႎဲႈဟာဝ်း ကဒါႇအိုမ်ယ်ုရ်။ အီဒဝ်ႎဲႈကဒါႇ မာဝ်းႎံင်း၊ နော်င်ပေင်းကဲနီန်မာ်မိူဝ်ႈ။ အီဒဝ်ႎဲႈကဒါႇ အင်ဝိုင်းမာ်မိူဝ်ႈ”
ဘိူန်းအယ်နံပ်မိုႈတ ပ္လေါည်ကတီုက်ကပဴင် ခနားတံပ်ဆီုက်တအာင်းကာည်း တံပ်ကညာအာဏာဆီုက်ဇေဝ်ကဲ ဂီုည်ဆီုပ်ရဲင်အူန်း ပရဝ်ကံကြီး အ်ုန်အီကဒိုင်းတောပ် ကီုင်းနော်င်ခေဝ် 7မဲင်ႏနီန် ဘံင်ကျံရ်ဇူန် ဆငည်း 11နီန်အောႏ။
ဂေါႇမိုႈ လာက်နာက်ဒါင်း ပ်ုန်ပဴင်လီပ် တံပ်ကညာအာဏာဆီုက်ဇေဝ်ကဲ ခေဲင်ကီုင်းနော်င်ခေဝ် ခည်ကျံရ်ဇူန် ဆငည်း 6ဒိူန် တာအတူ ဘိူန်းအဆာက် 37ဆန်ုမ် အ်ုန်အီဂေါည်ဇံင်က္လာႈနီန် ဟည်ကတူႈဟာဝ်း ဖေးဘာတ်အောႏ။
ဆဲႈဒါႇဒီန် ခည်ကျံရ်ဇူန် ဆငည်း 4 ခိင်ဆံန်ဒိူန်မာ် ဂေါႇလာက်နာက်ဒါင်း ပ်ုန်ပဴင်တံပ်ကညာအာဏာဆီုက်ဇေဝ်ကဲ ကောန်အီပ်ုန် 2အီး ကာည်း ကောန်အီမာည်း 2အီး ကဲအီဂေါည်ပဇံင်က္လာႈနီန် ဟည်ကတူႈဟာဝ်းဘိုး ဖေးဘာတ်အောႏ။
ဂေါႇပဲန်ပ္လေါည်ကတီုက်ကပဴင် ပလှံင်နော်င်ခေဝ် စီပဲန်လိုည်းယေအူး အ်ုန်အီမိုႈအီမိူဝ်ႈ အခွါင်းအရေးကြောႈက္လာင်း ခေဲင် PSLF/TNLA နီန် ဆာ်ႈဟိုရ်ကနာည်နှာင်း ကူန်ရဝ်မာဂါင်ကဲ အူန်းဆဒိခြဲတ်ခြဲတ် ကနာည်လံပ်ကတ်ုမ်နီန် ပပ္လေါည်ကဘ္လာင်းဆဒါင် ပ်ုန်ရေဲန်ဒေဲႈကဲ ခည်ကျံရ်ဇူန် ဆငည်း 5ဒိူန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
