မာည်းရူပ၊ ကျံရ်ဒီဆဲမ်ဘာ ဆငည်း 10၊ လာဆေဝ်
တိုအီးဂေါည်ခေဲင်ကီုင်းကဲ က္လာင်းတဆျှိုည်ဖီမျေဒါႈ ဘံန်ဟောည်ႇလေႈဒေဲႈဆဒါင် မိုႈတကဲရေဲန်ပါင်ကတော် ပဇံင် (5) ကီုင်းလာဆေဝ် ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန် တံပ်ကညာအာဏာဆီုက်ဇေဝ်ကဲ ဟည်တောပ်ဒေတိုည်းအောႏ။
ကဲဒါႈ ဘံန်ဟောည်ႇပ္လိူရ်ႈ ဆျှိုည်ဖီမျေ တဆဒါင် ပ်ုန်ႎိူဝ်ႈအူန်းကဲတ ပါင်ကတော်ဒါင်းခေဲင်ႎါင်း အ်ုန်အီဂေါည်ပမာန်အာည်ဂိုရ် ဇံင် (5) ကီုင်းလာဆေဝ်နီန် ခည်ကျံရ်ဒီဆဲမ်ဘာ ဆငည်း 9ဒိူန် ကဲဟည်ရေဲန်ဟာဝ်း ဘည်တိုည်းကဲဂဲနီန်အောႏ။
ကောန်အီမာည်းလာဆေဝ် ကဝ်အီယိူဝ်းဒါငါည်အ်ုန်နီန်အူအီး က္လာင်းတဆျှိုည်ဖီမျေဒါႈ ကဒါႇတံပ်ကညာအာဏာဆီုက်ဇေဝ်ကဲ ဒါပွံတ်ကားဆီုက် ဒေဲႈဆီမ်းဟာဝ်းဒိုႇ ဂြိုခြီုင်ပ်ုန်ဒါကဲပ ဒီပါင်ကတော်ဒီန် ဆာ်မိုႈအီႎိူဝ်ႈပါင်ကတော် အာဝ်မိူဝ်ႈစိ ဘည်တိုည်းဟာဝ်းကဲအောႏ။
အ်ုန်ဒါႈ “ကဲဟည်တိုည်းဟာဝ်းဒိုႇ။ ကဲဒါကားဆီုက် ဒေဲႈတိုည်းဟာဝ်း။ ကဲဒေဲႈဆီမ်းဟာဝ်းဒိုႇ ပဒဲန်ဒါလာ်ႎိူဝ်ႈပါင်ကတော်ဒီန် တောပ်ဆီုက်ကဲ 4ကြောင်။ ဆာ်မိုႈတိုအီး အာဝ်ယိူဝ်းစိ ကဲတိုည်း”
ပါင်ကတော်ဒီန် တောပ်ပည်တားကပီုန်ဒါင်း ကဲဒဲႈဖါ်ႈရိူန်း တတီုင်ဌာနကဲ ႎိူဝ်ႈဟာဝ်းဘြည်ပေန်ကျံရ်အောႏ။
တိုအီးခေဲင်ကီုင်းကဲဒါႈ ဘံန်ဟောည်ႇထိင်ခြဲ တံပ်ကညာအာဏာဆီုက်ဇေဝ်ကဲတ ကီုင်းလာဆေဝ်နီန် ဘည်ဂီုန်းဒေဲႈ ပါင်ကတော်ပဇံင် 5 မာန်အာည်ဂိုရ် တိုအီးဒါခံင်မဝ်းကဲနီန်မာ် ဂီုန်းဒေဲႈခည်းအောႏ။
ခည်ကျံရ်နိုႎဲမ်ဘာ ဆငည်း 25 ခိင်ညှာဒိူန်မာ် မိူဝ်ႈဖါ်ႈဘည်တောပ် တံပ်ကညာအာဏာဆီုက်ဇေဝ်ကဲ တပဴင် ဂေါႇပ်ုန်ပဴင်ကဲဒီန် ကောန်အီမာည်း 1အီးယံမ်းဖါ်ႈ ဘာတ်ဟာဝ်း 2အီးအောႏ။
ဆဲႈဒါႇဒီန် ခည်ကျံရ်နိုႎဲမ်ဘာ ဆငည်း 5ဒိူန်မာ် ဖုင်ပလိက်တံပ်ကညာအာဏာဆီုက်ဇေဝ်ကဲ 3အီး ဘဒေဲႈဖါ်ႈကား ပဂါင်အီဂေါည်ပရေကန်တောင်နီန် ကဲလီပ်စေတ်ဖါ်ႈခံင်မဝ်း မှာန်းဟာဝ်းရိူန်းတကဲ 20ဆဲန်အောႏ။
ဂေါႇပ်ုန်လီပ်ကမိုန်ခယ် ဒီခေဲင်ကီုင်းလာဆေဝ် အ်ုန်အီမိုႈဒီပ်ုန်ထိင်ခြဲအူန်း တံပ်ကိုးကာင်း – MNDAA ကဲနီန် ကဲဘ်ုပ်အာပ်ႎီရ်ဖါ်ႈ တတံပ်ကညာအာဏာဆီုက်ဇေဝ်ကဲ ခေဲင်ကျံရ်အေပ်ြုရ်ဒိူန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
