လိုည်းလာဝ်ဇာရ်၊ ကျံရ်အံက်တိုဘာ ဆငည်း 11၊ မာ၀်းႎံင်း
ကောန်အီပ်ုန်ဂေါည်ခေဲင်အရာပ်ဒီန်အူအီး က္လာင်းဒါႈ ကောန်အီပ်ုန် ကဝ်အီဂေါည် ပရ၀်နော်င်ပျီတ် လှံင်မာ၀်းႎံင်း ကပီုန်ဆျှံမ် ကဒါႇပိူည်နီန်အူအီး ငျားဖါ်ႈညဲ့မဴင် ဇိူင်အ်ုန်မာ် ကတ်ုတ်ဟာ၀်းပွံတ် အူကဒါႇအောႏ။
ခည်ကျံရ်အံက်တိုဘာ ဆငည်း 10 ခိင်ညှာ ကပံတ် 10နြီလေႈအူကဒည်ဒိူန် အ်ုန်ငျားဒေညဲ့ ခိင်ဒါႈအ်ုန် နံင်ဟာ၀်းရေဲန် လိုင်းတ၀်အေဲႈ အီဂေါည်ခေဲင် ႎါင်းဂါင်ကဲအောႏ။
ကောန်အီပ်ုန်ဂေါည်ခေဲင်အရာပ်ဒီန်အူအီး က္လာင်းဒါႈ မိုႈလိူည်ခေဲင်ႎါင်းဂါင် အ်ုန်ဒါႈနံင်ဟာ၀်းရေဲန် လိုင်းတဝ်အေဲႈ အ်ုန်ငျားလိူည်ညဲ့ ပဒေင်ခ္လေါႈဟာ၀်း ဟောည်ႇအူဂါင်မိုႈအူဂါင်ဒိူန်။ အာည်ႇဒီန်မာ် ကံပ်ခ္လေါႈဟာ၀်းခ္လေါႈႎီရ် ဆေအာ၀်ဘာည်း။ မိုႈလိူည်ဆငည်းဒီန် အ်ုန်စီကတူႈဟာ၀်း ကဲဒါႈ က၀်အီီငျားဒေညဲ့မဴင်ဒီန်မိုႈ မနာင်ဟော်မ် ဘိူန်းအဆာက် 40ဆန်ုမ်အောႏ။
အ်ုန်ဆီုပ်ဒါႈဘိုး ဂေါႇမဴင်တီႇခေဲင်ကတာည်း ဇိူင်အ်ုန်ကတ်ုတ်ဟာ၀်းဖါ်ႈ ကဒါႇ၀ဲ ကဒါႇတံမ်မာ် ဘိူန်းဟာ၀်းဘိုး ဒီဆဲ၀်အောႏ။
ဆာ်မိုႈကဇေန်နီး ဘိူန်းအယ်နံပ် မိုႈတ ကဲဟည်တိုန်းဟာ၀်း ကောန်အီပ်ုန် က၀်အီငျားဒေညဲ့မဴင်ဒီန် ကနာည်နံင်ဆနံမ်းတိုအ်ုန် ပယုင်ဆနံမ်ဒါင်း ပျီန်အူးလူန်နီန်ယာ့်အောႏ။
ခည်ကျံရ်အံက်တိုဘာ ဆငည်း 21ဒိူန်မာ် ကောန်အီမာည်း တိုအီးရ၀်နော်င်ပျီတ်ကာည်း ရ၀်ပါမလုပ် လှံင်မာ၀်းႎံင်းကဲ အာရ်အီး ငျားဖါ်ႈညဲ့မဴင် ယံမ်းဟာ၀်းအောႏ။
တောပ်ပည်စြာင်း ပ်ုန်ကစုအူန်း ဖုင်ယဲဆျှိုည်ဖီမျေ ဇူႈပံတ်ကျံရ်ဇံန်နႎရီ ရောတ်ဘံင်ကျံရ်အံက်တိုဘာ ခေဲင်10ကျံရ်နီန် ဂေါႇမဴင်တီႇခေဲင်ကတာည်းကာည်း ဂြိုခြီုင်လက်နာက်ဆီုက် အီကီုတ်ကဲနီန် တောပ်ပည်ကောမ်ကညောမ် 2အီး တိုအီးပကပီုန်ဆျှံမ်ကဒါႇပိူည်နီန် ဟည်ယံမ်းဟာ၀်းဖါ်ႈ 10အီး တောပ်ပည်ကောန်ကညောမ် 6အီး အီဘာတ်ဂေါည်ပွံတ် 27အီးအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
