ယာရူစိင်၊ ဆဲပ်တဲမ်ဘာ ဆငည်း 24၊ အိုမ်ငျံရ်
တိုအီးအရာပ်ကဲ ကောန်အီမာည်းအူအီး က္လာင်းတဖုင်ဆျှိုည်ဖီမျေဒါႈ ဒီဘိူန်းတံပ်ဆီုက်တအာင်း PSLF/TNLA ကဲတထိင်ခြဲ ခေဲင်လှံင်အိုမ်ငျံရ် ပရဝ်ပန်သပြေနီန် ပဲန်ဟာဝ်းအမှုဆဲယ်ကယ်လည်ကဒူႈ ကောန်အီမာည်းအူအီး ယံမ်းဟာဝ်းအောႏ။
ကဲဒါႈ ခည်ကျံရ်ဆဲပ်တဲမ်ဘာ ဆငည်း 22 ခီညှာကပံတ် 10 နြီဒိူန် ဆဲင်ကယ်အ်ုန်အီယိူဝ်ႇ ရဝ်ပန်လုံနီန်လည်လေႈဟာဝ်း ကာည်း ကဝ်အီယိူဝ်ႇဟိုက်ဒေဲႈ ပရဝ်ပန်သပြေနီနိ ပဲန်ဖါ်ႈပဒူႈ ကဝ်အီဘဆဲင်ကယ်ဆိုက်တွဲဒီန်မိုႈ ယံမ်းဟာဝ်းပွံတ်အောႏ။
တိုအီးအရာပ်ကဲ ကောန်အီမာည်းအူအီး က္လာင်းဒါႈ “ ကဝ်အီဘဆဲင်ကယ်ဆိုက်တွဲဒီန်စိ တာင်တိုအီး 3 အီး။ ကဝ်အီယိူဝ်ႇဒေဲႈ ပန်လုံ လေႈဟာဝ်းဒီန်စီ မဝ်းအိုမ်ဆနံမ်။ ခေဲင်အီတောပ်ဒေဲႈကဲအူအီး ကတူႈဖေးဘာတ်ကဆဝ်း ကဇေန်းနီ စီရပ်ခါမ်ဘည်ဆနံမ် ပယုင်ဆနံမ်ဒါင်းလာဆေဝ်။ မိူဝ်ႈဘိုးကဝ်အီတောပ်ဒေဲႈကဲအူအီး ကာည်း ကောန်အ်ုန်စီအာဝ်ဘာည်းစိဆေ”။
ကဝ်အီဘဆဲင်ကယ်ဆိုက်တွဲ အ်ုန်အီဇီုဝ် ကွီခမ်းဆွဲမိုႈ အီယံမ်းဟာဝ်း ကဝ်အီဇီုဝ် တာဟိုမောဝ်စီ ကတူႈဖေးဘာတ်ကဆဝ်း ကဝ်အီယိူဝ်ႇလေႈ ပန်လုံကဝ်အီဇီုဝ် ဦးအိုက်စီး စီတည်အ်ုန်ကပ်ုတ်ဟာဝ်းအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
