ယာရူစိင်၊ ကျံရ်ဇူန် ဆငည်း 13၊ လာဆေဝ်
တိုအီးခေဲင်ကီုင်းလာဆေဝ်အူအီး က္လာင်းတဆျှိုည်ဖီမျေဒါႈ တိုအီးအူဖုင် ကဲအီကိုင်းဒါလာက်နာက် လီပ်စိုန်ဟာဝ်း ဆဴင်ႎှုင်အူလှေ အ်ုန်အီဂေါည် ရီမ်းကျောင်မာန်ဆူ ဒီကစုဂီုန်းတိုအီး ခေဲင်ကီုင်းလာဆေဝ်၊ ကပီုန်ဆျှံမ်ကဒါႇပိူည် အ်ုန်အီမိုႈ ဒီပ်ုန်ႎီရ်ထိင် တံပ်ကညာအာဏာဆီုက်ဇေဝ်ကဲအောႏ။
အမှိူဝ် ကျံရ်ဇူန် ဆငည်း 12 ခိင်ဆံန် 2နြီလေႈဒိူန် တိုအီးကဲအီဘဒေဲႈကား Crown ကာည်း ကိုင်းဒေဲႈဆနာတ်နီန် 5အီး ကဲနှဲဖါ်ႈဒါဆနာတ် တိူဝ်ႈဟာဝ်းဒိုည်ႇႎှုင်ခေဲင်ဆဴင်ဒီန်အောႏ။
“ကဲဒါႈ အီတောပ်ဟာဝ်းဂီုန်းမိုႈ i-Phone ။ ဆာ်မိုႈထာန်တိူဝ်ႈဟာဝ်းကဲ ညှံမ်နံပ်စိကတီးကရီး။ ဆဲႈဒါႇႎှုင် ရိူန်းမာ်တောပ်ဟာဝ်းဒိုည်ႇ”
ဘိူန်းဘိုးအယ်နံပ် တောပ်ပ်ုန်က္လာင်းတိုအီးခေဲင်အရာပ်ကဲဒါႈ ခိင်ဆငည်း အမှိူဝ်ဒိူန်မာ် တိုအီးအာရ်အီး နှဲဖါ်ႈဆနာတ်တတာဂံတ်အူအီး စိုန်ဟာဝ်းဆဲင်ကယ်အ်ုန် ရီမ်းလူမ်ကြံ့ခိုင်ရေး အ်ုန်အီဂေါည်ပဇံင် 1 ခေဲင်ကီုင်းလာဆေဝ်နီန်အောႏ။
ဘိူန်းအယ်နံပ်တတိုအီးခေဲင်အရာပ်ကဲဒါႈ ဒီပဲန်ဂီုန်းအမှုစိုန်ကဲနီန် မိုႈဒိုည်ႇ အီကိုင်းဒါလာက်နာက်အောႏ။
ဘံန်ဟောည်ႇလီပ်ဒေဲႈ တံပ်ကညာအာဏာဆီုက်ဇေဝ်ကဲ ခေဲင်ကီုင်းလာဆေဝ်နီန် ဇူႈပွံတ်ကျံရ်အေပ်ြုရ် ဆငည်း 22 ရောတ်ကျံရ်ဇူန် ဆငည်း 12နီန် အမှုစိုန်၊ အမှုကိုႈကာည်း အမှုကဖါႇ ဟည်ပဲန်ဒေဲႈ 20လိူဝ်ႈ အာဝ်ယောမ်အောႏ။
တံပ်ကညာအာဏာဆီုက်ဇေဝ်ကဲ ဟည်ဘိူန်းအခွါင်း ႎီရ်အူပ်ဘြောင်ကီုင်းလာဆေဝ်နီန် တောပ်ပ်ုန်ကဇောည်ဒဲႈခယ်ကဲ ခည်ကျံရ်အေပ်ြုရ် ဆငည်း 22ဒိူန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
