လိုည်းဇူန်မိုး၊ ကျံရ်ဒီဆဲမ်ဘာ ဆငည်း 17၊ အိုမ်ငျံရ်
ဘိူန်းအယ်နံပ်တောပ်ဘည်က္လာင်း ရမာအ်ုန်ကဲဒါ; ဒီဘိူန်းတံပ်ဆီုက်တအာင်း TNLA ကဲတထိင်ခြဲ ပလှံင်အိုမ်ငျံရ် ခေဲင်ခမိုရဝ်ပန်ဆော့ ပရဝ်အူရဝ်နီန် ကောန်အီမာည်း ကဝ်အီဂေါည်ကဒံပ်တောပ်ဂါင်ကဲ အ်ုန်အီဘိူန်းအဆာက် 22 ဆန်ုမ်နီန်အူအီး လီလာနဘာည်းဟာဝ်းတ ကောန်အီပ်ုန် အ်ုန်အီဘိူန်းအဆာက် 9 ဆန်ုမ်နီန်အူအီးအော။
မာလိုည်းအီ က္လာင်းဒါ; ခည်ကျံရ်ဒီဆဲမ်ဘာ ဆငည်း 7 စူန်အံပ် ကပံတ် 10 နြီဒိူန် ကဝ်အီဇီုဝ်လိုည်းအီ(ဇီုဝ်ခ္လါည်း)နီန် ခိင်ရေဲန်ကဲတပါင်ကမိုန်ပဂါင်ကဲ ကဝ်အီဇီုဝ် အောင်ကျိုးနီန် လီလာနဘာည်းဟာဝ်းတ လိုည်းအီ ကဝ်အီအီတ်ခေဲင်ဗှါင်းအီတ်နီန်အော။
“ ယဲဂေါည်ကဒါ,ကီုင်းတေင်နီ။ ပကီုင်တေင်နီနီန် ကဲအာဝ်ဗိူဝ်;ကျောင်ဒီ; ကောန်အောစီဒါနံင်ဟိုက်ကျောင်။ ကနာည်နံင်ဘိူန်းဟိုက်ကျောင်နီန် ယစီတိုန်းကဲဂေါည်တောပ်တာကဲ။ ဆငည်းဒီန် တာကဲစီရေဲန်ပါင်ကမိုန် ရခြူမ်ဂါင်။ ယာအ်ုန်စီဒါ;တဂါရ်ဗါဗည်း အီတ်ရအာည်,။ ကောန်ကညောမ်ကဲစီ ဟည်ဘိူန်းဒေအီတ်။ ကဲဒါ;ခိင်ဗိူဝ်;အ်ုန်တပ္လို;မာ် အာဝ်ယိူဝ်း။ ဟောည်,ဒီန် ကောန်ကညောမ် အာရ်အီးဂါရ်ဒီန်စီယာမ်းလေ;ရခြူမ်။ ခိင်ဒီန် တာကော်မ်တီရဝ်ကဲ ညှံမ်ဗီရ်စိ။ ဘံန်ဆမွံတ်တိူရ်; ကောန်ကညောမ်ဂါရ်ဒီန် စီနံပ်လာ်မို;တ အ်ုန်လီလာနဘာည်း။ ခိင်ဘာည်းဟာဝ်းကဲ ကောန်ကညောမ်ကဲ တော,အေ့ယာအ်ုန် ဂေါ,မို;ရခြူမ်ဂါင်ကဲဂီုည်ဆနံန် ကဲအာဝ်ယိူဝ်းစီပ်ုန်တော,ဂါရ်။ ဆာ်အယ်ဒါ;ဘည်နော;အော ဆိင်ပျံမ်းပွံတ် ကောန်အီမာည်းဒီန်”
ကဲဒါ; ကဝ်အီဇီုဝ်အောင်ကျိူးဒီန် ဂါင်းကဲဂေါည်ကဒံပ်တောပ်ဂါင် လိုည်းအီနီန် အာည်,ပဲန်ဟာဝ်းကဲတ အမှုလီလာနဘာည်းဟာဝ်းနီန်မာ် ကောန်အီမာည်းဒီန် တိူမ်ရံပ်တိုပိုင်းခန္ဓာလိုည်းအီဒီန်အော။
ကူန်မာလိုည်းအီကဲဒါ; ဆိင်ဒဲ;ကဲတိူဝ်;ဟာဝ်းအရေး တောပ်ပည်တြားဥပဒေ တကောန်အီမာည်း ကဝ်အီလူည်းအမှုဒီန်အော။
ကူန်လိုည်းအီဒီန် က္လာည်းဒါ; “ ဆာ်မို;အော ဆိင်ဒဲ;လိူည်ကဲတိူဝ်;အရေးတောပ်ပည် တြားဥပဒေနီန်။ ယဲမာ်အာဝ်ဘိူန်းစီ ရေဲန်ဟာဝ်းဘာည်းဆိင်ရေဲန်အယ်။ ကဒါ,ကဝ်အီလူည်,ဘိူည်ဒါရိူန်းဒေဲ;မှာန်းအခွါင်းမာ် ယဲအာဝ်ခွါင်းဒဲ;ယာ့်”။
ကဇေန်နီး ဖုင်ပလိက်အိုမ်ငျံရ် ပလိက် တံပ်ဆီုက်တအာင်း TNLAကဲ ဟည်တိုည်းအူန်း ကောန်အီမာည်းကဝ်လူည်,အမှုဒီန် ဒါ;နံင်တိူဝ်;ဟာဝ်းအရေးတောပ်ဘည်တြားဥပဒေနီန်အော။
ကဝ်အီကပ္လါႇဘေဲႇဆဒါင် – လိုည်းပို;ဆပေ
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
