နော်ဂျား၊ ဇွန်လ ၁၆ ရက်၊ မူဆယ်
တရုတ်-မြန်မာနယ်စပ် မူဆယ်မြို့က လောင်းကစားရုံတစ်ခုမှာ ရိုက်နှက်နှိပ်စက်ခံရလို့ ထွက်ပြေးလာတဲ့ မိန်းကလေးငယ်နှစ်ဦးဟာ မူဆယ်မြို့မရဲစခန်းကို သွားရောက်အကူအညီတောင်းခံခဲ့ပေမဲ့ ကူညီပေးတာမရှိဘူးလို့ မိန်းကလေးငယ်နှစ်ဦးက ပြောပါတယ်။
မူဆယ်မြို့ ဆင်ဖြူဂိတ်အနီးရှိ ပြည်သူ့စစ်ပိုင် လောင်းကစားရုံမှာ ဖဲဝေတဲ့အလုပ် လုပ်ကိုင်နေတဲ့ မိန်းကလေး (၂) ဦးက ရိုက်နှက်နှိပ်စက်ခံရတာကြောင့် ပြီးခဲ့တဲ့ ဇွန်လ (၉) ရက် နေ့လည်ပိုင်းမှာ မူဆယ်မြို့မရဲစခန်းထံကို သွားရောက် အကူအညီတောင်းခံခဲ့တာ ဖြစ်ပါတယ်။
“ရဲတွေက ဘာအကူအညီမှ မပေးဘူး။ အမှုဖွင့်ပြီးတော့ သမီးတို့က ရဲတွေကို ပြောတယ်။ သမီးတို့ မပြန်ရဲဘူး။ ကူညီပေးပါဦးဆိုတော့ အနားမှာရှိတဲ့ (တာဝန်မှူး) ရဲတစ်ယောက်က ဒီမှာ မိန်းကလေးတွေ နေလို့မရဘူး။ တည်းခိုခန်း သွားနေလို့ ပြောတယ်။ သမီးတို့ရဲ့ မှတ်ပုံတင်ကို သိမ်းထားလို့ တည်းခိုခန်းတည်းဖို့ ပြန်တောင်းပေးပါလို့ ပြောတာကို အမှုပြီးမှ စခန်းမှာ လာထုတ်တဲ့။ တကယ့်ကို အကြင်နာတရားမရှိတဲ့ ရဲတွေ။ အမှုဖွင့်တယ်သာ ပြောတယ်။ ခုထိ ဘာမှလည်း မဆက်သွယ်ဘူး”ဆိုပြီး ကာယကံရှင်မိန်းကလေးကငယ်က ရွှေဖီမြေကို ပြောပါတယ်။
အဲဒီအမျိုးငယ်တွေဟာ နေ့ရောညပါ အလုပ်ဆင်းနေရတာကြောင့် အလုပ်ထွက်ဖို့ ပြောဆိုရာကနေ သူဌေးနဲ့ မန်နေဂျာတို့ရဲ့ ရိုက်နှက်နှိပ်စက်တာ ခံရတာဖြစ်ပြီး အခုလို ရဲစခန်းထံသို့ သွားရောက်အကူအညီ တောင်းခံရတာလို့ ဆိုပါတယ်။
“အရင်တုန်းက ကူညီပါရစေဆိုပြီး ဆိုင်းဘုတ်တင်ထားတာတောင် ဘာအကူညီမှ မရတာ။ အခု အဲဆိုင်းဘုတ်ဖြုတ်လိုက်တော့။ ရဲက ပြည်သူကို ကူညီရမယ်ဆိုတာ မေ့သွားလို့ ထင်တယ်။ ဘာအကူညီမှ မပေးတော့ဘူး။ သူတို့က လစာအလကားယူပြီး လိုင်းကြေးကောက်စားရမယ်ပဲ ထင်နေကြတာ။ ရဲက ရဲနဲ့မတူတော့ဘူး”ဆိုပြီး အထက်ပါ မိန်းကလေးငယ်က ဆက်ပြောပါတယ်။
လက်ရှိ အခင်းဖြစ်ပွားရာ ဖဲရှိုးရုံဟာ နမ့်ခမ်းမြို့မပြည်သူ့စစ်ရဲ့ (နာယက) ရဲ့ သားက တာဝန်ယူထားတဲ့ လောင်းကစားရုံဖြစ်ကြောင်း လိုင်းကြေးကောက်ခံတဲ့ စာရင်းတွေအရ သိရပါတယ်။
အလုပ်အကိုင်ရှားပါးမှုတွေကြောင့် အနယ်နယ်အရပ်ရပ်က မိန်းကလေးငယ်တွေဟာ မူဆယ်ရှိ ဖဲရုံနဲ့ ဂိမ်းရုံတွေမှာ လာရောက်အလုပ်လုပ်ကိုင်ကြပြီး အခုလို ပုံစံမျိုး မကြာခဏကြုံတွေ့ရသလို တချို့လည်း တရုတ်မယားအဖြစ် ရောင်းစားခံရပြီး တချို့လည်း ပြည့်တန်ဆာအဖြစ် ရောင်းစားခံရတာမျိုးလည်း ရှိကြောင်း သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
