သူတော်စိန်၊ ဇွန်လ ၁၃ ရက်၊ မူဆယ်
တရုတ်-မြန်မာနယ်စပ် မူဆယ်မြို့ ဟိုနားရပ်ကွက် ကားလေးဝန်းအနီးရှိ ပြည်သူ့စစ်ပိုင် ကျားဖြန့်ရုံမှာ ပြည်သူ့စစ်ဖက်က ကြီးကြပ်သူနဲ့ ကျားဖြန့်နည်းပညာရှင် တရုတ်နိုင်ငံသားတို့ ခိုက်ရန်ဖြစ်ပွားပြီး တရုတ်နိုင်ငံသား နည်းပညာရှင်ဖက်က အမျိုးသားတစ်ဦး ပွဲချင်းပြီး သေဆုံးသွားခဲ့ပြီး နှစ်ဦး ဒဏ်ရာရခဲ့တယ်လို့ စုံစမ်းသိရှိရပါတယ်။
ဖြစ်စဉ်ဟာ ပြီးခဲ့တဲ့ မေလ ၁၀ ရက် ည ၁၂ နာရီအချိန်မှာ ဖြစ်ပွားခဲ့တာဖြစ်ပြီး ဒဏ်ရာရခဲ့တဲ့ တရုတ်နိုင်ငံသား နှစ်ဦးထဲမှ တစ်ဦးဟာ ဒီနေ့ ဇွန်လ ၁၃ ရက် မနက် ၉ နာရီဝန်းကျင်မှာပဲ ထပ်မံသေဆုံးသွားတာကြောင့် သေဆုံးသူ နှစ်ဦးဖြစ်သွားတယ်လို့ ကျားဖြန့်နဲ့ နီးစပ်သူတစ်ဦးက ပြောပါတယ်။
“မှားတာက ပြည်သူ့စစ်က မှားတာ။ တရုတ်နည်းပညာရှင်တွေက သူတို့ဂျုတီပြီးလို့ နားနေတာကို ပြည်သူ့စစ်က မူးပြီး ဆဲလို့ ရန်ဖြစ်ကြတာ။ တရုတ်ဖက်က တစ်ယောက်သေတယ်။ နောက်တစ်ယောက်က ဒီမနက် ၈ နာရီ ၄၅ မိနစ်မှာ အတွင်းကြေဒဏ်ရာနဲ့ ထပ်သေတယ်”
အဲဒီ လူသေမှု ဖြစ်ပွားတာနဲ့ ပတ်သက်ပြီး ကျားဖြန့်ရုံပိုင်ရှင်ဖြစ်သူ ဦးအိုက်မျိုးက CID ရဲတပ်ဖွဲ့နဲ့ SB သတင်းတပ်ဖွဲ့တို့ရဲ့ အကူအညီနဲ့ အလောင်းကိုဖျောက်ဖျက်ခဲ့တယ်လို့ CID ရဲသတင်းပေးထံမှ သိရှိရပါတယ်။
မူဆယ်မြို့ထဲမှာ ကျားဖြန့်ရုံ ၁၂၉ ရုံရှိတဲ့အထဲမှာ လိုင်းကြေးပေးပြီး နောက်ထပ် ၁၄ ရုံ ထပ်တိုးဖွင့်လှစ်လိုက်တာကြောင့် စုစုပေါင်း ကျားဖြန့်ရုံ ၁၄၃ ရုံ ရှိလာတယ်လို့ ပြည်နယ်ဒန၊ ခရိုင်ဒန၊ SB၊ CID နဲ့ ခရိုင်ရဲမှူး PSO တို့ရဲ့ လိုင်းကြေးကောက်ယူတဲ့ စာရင်းဇယားတွေအရ သိရပါတယ်။
ထပ်တိုးတဲ့ ကျားဖြန့်ရုံ (၁၄) ရုံမှာ ကောင်းမူးတုန် ရပ်ကွက် အုပ်ချုပ်ရေးမှူးဟောင်းရဲ့ အိမ်ရှေ့မှာ (၁) အိမ်၊ ရှေ့လမ်းကြားတွင် (၃) အိမ်၊ လက်ရှိ အုပ်ချုပ်ရေးမှူးအသစ်ရဲ့ အိမ်အနီးမှာ (၁) အိမ်၊ စွမ်စော်ရပ်ကွက် အုပ်ချုပ်ရေးရဲ့ အိမ်ရှေ့လမ်းမှာ (၃) အိမ်၊ တွင်းစတာဟိုတယ်ဘေး လမ်းကြားမှာ (၂) အိမ်နဲ့ ဟိုနားရပ်ကွက်မှာ (၄) အိမ် ထပ်တိုး ဖွင့်လှစ်ထားတာ ဖြစ်ပါတယ်။
လိုင်းကြေးမှာ အရင်ထက် သိန်း (၃၀) ပိုပေးရတာကြောင့် ကျားဖြန့်ရုံတစ်ရုံရဲ့ တစ်လနှုန်းထားမှာ သိန်း (၃၃၀) ဖြစ်သွားပြီး SB, CID, ခရိုင်ဒန, ပြည်နယ်ဒန၊ မြို့နယ်ရဲတပ်ဖွဲ့မှူးနဲ့ ခရိုင်ရဲတပ်ဖွဲ့မှူးတို့ကို အချိုးကျပေးရတယ်လို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
