ပို့လဘား၊ ဇူလိုင် ၃ ရက်၊ မူဆယ်
စစ်ကောင်စီထိန်းချုပ်ထားတဲ့ ရှမ်းမြောက် မူဆယ်မြို့မှာ ယာဉ်ထိန်းရဲတွေက ဒေသခံတွေဆီ အကြောင်းအမျိုးမျိုးပြပြီး ငွေတောင်းတာတွေရှိနေတယ်လို့ ဒေသခံတွေက ပြောပါတယ်။
မူဆယ်မြို့ သိန်းသန်းချီကားကြီးကွင်းအနီးရှိ မီးပွိုင့်မှာ စစ်ကောင်စီတပ်ရဲ့ ယာဉ်ထိန်းရဲတွေက အကြောင်းအမျိုးမျိုးပြပြီး ဆိုင်ကယ်တစ်စီးကို ငွေ ၈ သောင်းကနေ ၁ သိန်းနဲ့ ကားတစ်စီးကို ၂ သိန်းနီးပါးတောင်းတာ ရှိတယ်လို့ မူဆယ်မြို့ဒေသခံအမျိုးသားတစ်ဦးက ပြောပါတယ်။
“သူတို့မထင်သလိုကောက်တယ်။ ၂ ပတ်ရှိပြီ အဲလိုတောင်းတာ။ ယာဉ်တွေမောင်းလာတာ လမ်းကြောင်းမမှန်လို့ဆိုပြီး ပြည်သူတွေဆီ တောင်းနေတာ။ အမှန်ဆို အဲလောက်က ခွင့်လွှတ်ပေးလို့ရတာပဲ။ သူတို့ တောင်းတဲ့ ပိုက်ဆံမပေးရင် ရုံးပို့ပေးလိုက်ရမလားဆိုပြီး ပြောတယ်။ ရုံးရောက်ရင် ဒီထပ်အများကြီးပိုပေးရမှာတဲ့။ အမှုအမျိုးမျိုးရှိတယ်။ တစ်မှုကို ၃ သောင်းနဲ့ပေးရမယ်။ လိုင်စင်မဲ့တွေ ဦးထုပ်မဆောင်းတဲ့အမှုတွေ ပေးရမှာ”လို့ ပြောပါတယ်။
အဲဒီသိန်းသန်းချီကားကြီးဂိတ်မှာရှိတဲ့ မီးပွိုင့်မှာ ယာဉ်စည်းကမ်းမလိုက်နာတဲ့သူတွေကိုသာ ယာဉ်ထိန်းရဲတွေက ငွေတောင်းတာ ဖြစ်တယ်လို့ နောက်ထပ်အမျိုးသားတစ်ဦးက ဆက်ပြောပါတယ်။
“မီးပွိုင့်နားမှာ သူတို့ကောက်တာရှိတယ်။ အဲဒီမီးပွိုင့်မှာ မီးနီတာကို မရပ်ဘဲ ဖြတ်နေတဲ့သူတွေကိုတော့ သူတို့တောင်းတယ်။အဲဒီမီးပွိုင့်ကလည်း အရင်က သူတို့မဖွင့်ဘူးလေ။ အခုမှသူတို့စဖွင့်တာ။ မကြည့်မိတဲ့သူက ဖြတ်တာပဲလေ။ အဲလိုမျိုး စည်းကမ်းမလိုက်နာဘူးဆိုပြီး ငွေတောင်းနေတာ”လို့ ဆိုပါတယ်။
ဒါ့အပြင် မူဆယ်မြို့မှာရှိတဲ့ နယ်စပ်ဂိတ်တွေမှာလည်း နယ်စပ်ဂိတ်က တာဝန်ရှိသူနဲ့ ရဲတွေက ဒေသခံတွေဆီကနေ နည်းမျိုးစုံနဲ့ မကြာခဏငွေညစ်နေတာကြောင့် အခက်အခဲကြုံနေရတယ်လို့ အထက်ပါအမျိုးသားက ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
